Read De Bibel JHF Josua 7 Bible Online

Josua 7 - De Bibel JHF bible

Josua 7

¹Un de Kjinja Israel worden Ontru aun däm Vebaunten; un Achan, de Sän Karmis, vom Sän Sabdis, vom Sän Serach, vom Staum Juda, neem von däm Vebaunten; un de Oaja Gottes flaumd jäajen de Kjinja Israel opp.

²Un Josua schekjt Mana von Jericho no Ai, daut bie Bat-Awen, oostlich von Betel, licht, un räd to an un säd: Got nopp un kjikjt junt daut Launt aun. Un de Mana jinjen nopp un kjikjten sikj Ai aun.

³Un see kaumen trigj no Josua un säden to am: Lot nich daut gaunze Volkj noppgonen; bie twee ooda 3 000 Maun muchten noppgonen un Ai schlonen; bemieej nich daut gaunze Volkj doahan, dan dee sent weinje.

⁴Doa jinjen vom Volkj bie 3000 Maun nopp; oba see randen ver de Mana von Ai;

⁵un de Mana von Ai schluagen von an bie 36 Maun, un see juagen an no bat ver däm Dooa von Schebarim un schluagen an aum raufgonen vonne Boaj. Dan veschmolt daut Hoat vom Volkj un wort aus Wota.

⁶Un Josua vereet siene Kjleeda un foll ver de Lod Gottes opp sien Aunjesecht oppe Ieed, bat Oppenowent, un de Eltestasch von Israel, un see schmeeten Stoff opp äare Heipta.

⁷Un Josua säd: Ach, Har, Gott! Wuarom hast du dit Volkj äwa däm Jordan gonen loten, om ons enne Haunt de Amorita to jäwen, ons too Grunt too rechten? Oo haud wie ons daut doch jefaulen loten un wieren aun jane Sied vom Jordan jebläwen!

⁸Bitte, Har, waut saul ekj sajen, nodäm Israel ver siene Fiend däm Rigjen jedreit haft?

⁹Un wan de Kanaanita daut hieren un aule Laundesbewona, soo woaren see ons omrinjen un onse Nomes vonne Ieed utroden; un waut woascht du fa dienem groote Nomen doonen?

¹⁰Doa räd de Har too Josua: Kjikj opp! Wuarom lichst du dan opp dien Aunjesecht?

¹¹Israel haft jesindicht, un haben uk mienen Bunt äwaträden, däm ekj an jejäft ha; un haben uk vom Vebaunten jenomen un uk jestolen un daut uk veheimlicht un daut uk unja äarem Jereetschoft jelajcht!

¹²Un de Kjinja Israel woaren nich ver äare Fiend bestonen kjennen; see woaren ver äare Fiend däm Rigjen dreien, dan see sent toom Baun jeworden. Ekj woa nich mea met junt sennen, wan jie nich däm Baun ut june Medd vetiljen.

¹³Kjikj opp, heilj daut Volkj un saj: Heilicht junt opp Morjen; dan soo sajcht de Har, de Gott Israels: Een Baun es en diene Medd, Israel; du woascht ver diene Fiend nich bestonen kjennen, bat jie däm Baun ut june Medd wajchdoonen.

¹⁴Un jie sellen Zemorjes doatoo komen no äare Stam; un daut saul passieren: Dee Staum, dee de Har trafen woat, saul nodakomen no äare Jeschlajchta; un daut Jeschlajcht, daut de Har trafen woat, saul nodakomen no äare Hiesa; un daut Hus, daut de Har trafen woat, saul Maun fa Maun nodakomen.

¹⁵Un daut saul passieren: Wäa met däm Baun jetroffen woat, dee saul met Fia vebrent woaren hee un aules, waut hee haft; dan hee haft däm Baun Gottes äwaträden un eene Schaund en Israel begonen.

¹⁶Un Josua muak sikj tiedich Zemorjes opp un leet Israel nodakomen, no äare Stam; un daut wort de Staum Juda jetroffen.

¹⁷Un hee leet de Jeschlajchta Juda nodakomen; un hee troff daut Jeschlajcht de Sarchita. Un hee leet daut Jeschlajcht de Sarchita Maun fa Maun nodakomen; un daut wort Sabdi jetroffen.

¹⁸Un hee leet sien Hus no de Mana nodakomen; un daut wort Achan jetroffen, de Sän Karmis, vom Sän Sabdi, däm Sän Serach, vom Staum Juda.

¹⁹Un Josua säd to Achan: Mien Sän, jeff doch däm Harn, däm Gott Israels, de Iea un laj am een Bekjantnis auf; un doo mie doch to weeten, waut du jedonen hast; veheimlich daut ver mie nich!

²⁰Un Achan auntwuad Josua un säd: Woarhauft, ekj ha jäajen däm Harn, däm Gott Israels, jesindicht, un soo, un soo ha ekj jedonen:

²¹Ekj sach unja däm Raup eenen scheenen Mauntel ut Sinear un 200 Schekel Selwa un eene goldne Stang, 50 Schekel äa Jewicht, un mie jefoll daut, un ekj neem daut; un kjikj, dee sent em Ennalichen von mienem Zelt enne Ieed vegrowt un daut Selwa doa unja.

²²Un Josua schekjt Booten han, un see randen nom Zelt; un kjikj, daut wia en sienem Zelt vegrowt un daut Selwa doa unja.

²³Un see neemen daut ut däm Ennalichen vom Zelt un brochten daut no Josua un no aule Kjinja Israel, un see läden daut ver däm Harn han.

²⁴Doa naum Josua, un gaunz Israel met am, Achan, däm Sän Serach, un daut Selwa un däm Mauntel un de goldne Stang, un siene Säns un siene Dajchta, un siene Rinda un siene Äsel un sien Kjlienvee, un sien Zelt un aules, waut hee haud, un see brochten an rut en daut Tol Achor.

²⁵Un Josua säd: Woo hast du ons em Onjlekj jebrocht! De Har woat die aun disem Dach em Onjlekj brinjen! Un gaunz Israel steenijden am, un see vebrenden an met Fia un schmeeten Steena opp an;

²⁶un see muaken eenen groote Steenhupen äwa am, dee bat disem Dach doa es. Un de Har leet von siene Zorngloot auf. Doarom jeef maun däm Uat däm Nomen Tol Achor bat opp disem Dach.