Read De Bibel JHF Josua 8 Bible Online

Josua 8 - De Bibel JHF bible

Josua 8

¹Un de Har räd too Josua: Ha nich Angst un vezoag nich! Nemm aulet Kjrichsvolkj met die un moak die opp, go nopp no Ai. Kjikj, ekj ha däm Kjennich von Ai un sien Volkj un siene Staut un sien Launt en diene Haunt jejäft.

²Un du saust aun Ai un aun sienem Kjennich doonen, soo aus du aun Jericho un aun sienem Kjennich jedonen hast; doch sienen Raup un sien Vee däaw jie fa junt nämen. Laj die eenen Hinjahault jäajen de Staut, aun äarem Rigjen.

³Doa muak sikj Josua un aulet Kjrichsvolkj opp, om no Ai nopp too gonen. Un Josua wäld 30 000 Maun ut, striedfoadje Mana, un schekjd dee bie Nacht auf.

⁴Un hee befool an un säd: Kjikjt, jie sellen däm Hinjahault jäajen de Staut sennen, em Rigjen de Staut; got nich too wiet vonne Staut auf, sonda siet aula reed.

⁵Un ekj un aulet Volkj, daut bie mie es, wie wellen no de Staut gonen; un daut saul passieren, wan see rutkomen, ons entjäajen, aus daut ieeschte Mol, soo well wie ver an wajchranen.

⁶Un see woaren rutkomen hinja ons häa, bat wie an vonne Staut aufjeräten ha; dan see woaren sajen: See ranen fa ons aus daut ieeschte Mol! Un wie wellen ver an ranen.

⁷Dan sell jie junt ut däm Hinjahault oppmoaken un de Staut nämen, un de Har, jun Gott, woat an en june Haunt jäwen.

⁸Un daut saul passieren, wan jie de Staut enjenomen ha, soo sell jie de Staut met Fia aunstekjen; nom Wuat Gottes sell jie doonen. Kjikjt, ekj ha junt daut befoolen.

⁹Un Josua schekjt an auf, un see jinjen em Hinjahault un hilden tweschen Betel un Ai, wastlich von Ai. Un Josua brocht jane Nacht enne Medd vom Volkj too.

¹⁰Un Josua muak sikj tiedich Zemorjes opp un mostad daut Volkj; un hee jinkj nopp, hee un de Eltestasch von Israel, ver däm Volkj häa no Ai.

¹¹Un aulet Kjrichsvolkj, daut bie am wia, jinkj nopp un kaumen noda, un kaumen de Staut jäajenäwa; un see loagaden sikj nuadlich von Ai, un de Läacht wia tweschen an un Ai.

¹²Oba hee haud bie 5000 Maun jenomen un an em Hinjahault tweschen Betel un Ai jestalt, wastlich vonne Staut.

¹³Un soo stalden see daut Volkj opp, daut gaunze Loaga, daut nuadlich vonne Staut wia, un dee äa Hinjahault wastlich vonne Staut; un Josua jinkj en dee selje Nacht medden enne Läacht.

¹⁴Un daut passieed, aus de Kjennich von Ai daut sach, doa spooden sikj de Mana de Staut un muaken sikj tiedich opp un jinjen rut, Israel entjäajen toom Kaumf, hee un aul sien Volkj, aun däm bestemden Uat, ver de Läacht. Hee wist oba nich, daut am em Rigjen de Staut een Hinjahault jelajcht wia.

¹⁵Un Josua un gaunz Israel leeten sikj von an schlonen un randen oppem Wajch no de Wieste.

¹⁶Doa wort daut gaunze Volkj, daut enne Staut wia, toop jeroopt, om an notojoagen; un see juagen Josua no un worden vonne Staut aufjeschnäden.

¹⁷Un daut bleef kjeen Maun en Ai un Betel äwa, dee nich hinja Israel häa utjegonen wia; un see leeten de Staut op un juagen Israel no.

¹⁸Doa säd de Har too Josua: Strakj dien Spies, dee en diene Haunt es, jäajen Ai ut; dan ekj well daut en diene Haunt jäwen. Un Josua strakjt däm Spies, dee en siene Haunt wia, jäajen de Staut ut.

¹⁹Un de Hinjahault muak sikj schwind von siene Städ opp un rand, aus hee siene Haunt utstrakjt, un see kaumen enne Staut un neemen dee en; un see spooden sikj un stekjten de Staut met Fia aun.

²⁰Un de Mana von Ai dreiden sikj om un sagen, un kjikj, de Ruak vonne Staut stieech opp nom Himmel; un see hauden kjeene Krauft, doahan ooda dorthan too ranen. Dan daut Volkj, daut no de Wieste han jerant wia, dreid sikj om jäajen de Vefolja.

²¹Dan aus Josua un gaunz Israel daut sagen, daut de Hinjahault de Staut enjenomen haud, un de Ruak vonne Staut oppstieech, doa dreiden see om un schluagen de Mana von Ai.

²²Oba jane kaumen ut de Staut an entjäajen, soo daut see medden tweschen Israel wieren, dee eene von hia un de aundre von doa. Un see schluagen an, bat an kjeen Wajchranenda ooda Entkomna äwableef.

²³Un däm Kjennich von Ai jreepen see läwendich un brochten am no Josua.

²⁴Un daut passieed, aus Israel (daut Warjen) aule Bewona von Ai oppe Stap, un enne Wieste, woa see an nojejoagt wieren, omjebrocht hauden, un see aula, derch dee schoape Schwieets jefollen, bat see oppjeräwen wieren, doa kaum gaunz Israel trigj no Ai, un see schluagen an met däm schoapen Schwieet.

²⁵Un aula dee aun disem Dach follen, soo aus Mana uck aus Frues, wieren 12 000, aule Enwona von Ai.

²⁶Un Josua trock siene Haunt, dee hee met däm Spies utjestrakjt haud, nich trigj, bat maun aule Bewona von Ai vebaunt haud.

²⁷Blooss daut Vee un de Raup von jane Staut plindad Israel fa sikj, nom Wuat Gottes, daut hee däm Josua befoolen haud.

²⁸Un Josua vebrend Ai un muak doavon eenen eewjen Trimmahupe, bat opp disem Dach.

²⁹Un däm Kjennich von Ai leet hee aun eenem Boom henjen bat Oppenowent; un biem Sonnenunjagank befool Josua, un see neemen sienen Doodeskjarpa vom Boom rauf un schmeeten am aun däm Engank vom Stautdooa un muaken eenen groote Steenhupen äwa am, dee bat opp disem Dach doa es.

³⁰Doa bud Josua däm Harn, däm Gott Israels, eenen Aultoa oppem Boajch Ebal,

³¹soo aus Moses, de Kjnajcht Gottes, de Kjinja Israel befoolen haud, aus em Jesazbuak Moses jeschräwen es, eenen Aultoa von gaunze Steena, äwa dee met kjeenem Iesa jefoaren wia. Un see opfaden doabowen däm Harn Brauntopfa un schlachten Dankopfa.

³²Un hee schreef doa opp de Steena eene Aufschreft vom Jesaz Moses, daut hee fa de Kjinja Israel jeschräwen haud.

³³Un gaunz Israel un de Eltestasch un Väastona un siene Rechta stunden aun dise un aun jane Sied de Lod, de Priesta un de Leviten, jäajenäwa, dee de Bundeslod druagen, de Framda aus de Eenheimischa, de eene Halft jäajen däm Boajch Gerisim han un de aundre Halft jäajen däm Boajch Ebal han, aus Moses, de Kjnajcht Gottes, aum Aunfank befoolen haud, daut Volkj Israel too säajnen.

³⁴Un nodäm laus hee aule Jesazes Wieed, däm Säajen un däm Fluch, no aulem, waut em Jesazbuak jeschräwen es.

³⁵Daut wia kjeen Wuat von aulem, waut Moses befoolen haud, daut Josua nich de gaunze Jemeent Israel väalaus, met Frues un de Kjinja un däm Framden, dee en äare Medd wia.