Read De Bibel JHF Josua 9 Bible Online

Josua 9 - De Bibel JHF bible

Josua 9

¹Un daut passieed, aus aul dee Kjennichs daut hieeden, dee aun dise Sied vom Jordan wieren, oppe Boaj un enne Läacht un aum gaunzen Eewa vom groote Mäa jäajenäwa däm Libanon, de Hetita un de Amorita, de Kanaanita, de Perisita, de Hewita un de Jebusita;

²doa vesaumelden see sikj aula toop, om jäajen Josua un jäajen Israel too kjamfen.

³Oba aus de Bewona von Gibeon hieeden, waut Josua aun Jericho un aun Ai jedonen haud,

⁴doa haundelde see met Lest [un neemen Äten met sikj] un neemen oole Sakj fa äare Äsel, un aufjenutzte un jeflekjte un toopjebungne Wienladasch,

⁵un aufjenutzte un jeflekjte Schoo aun äare Feet, un aufjenutzte Kjleeda opp sikj; un daut gaunze Broot von äarem Äten wia utjedrieecht un vestokt.

⁶Un see jinjen no Josua nom Loaga no Gilgal un säden to am un to de Mana von Israel: Ut eenem wieden Launt sent wie jekomen, un nu moak een Bunt met ons.

⁷Oba de Mana von Israel säden toom Hewita: Veleicht wonst du en miene Medd, un woo saul ekj eenen Bunt met die moaken?

⁸Un see räden too Josua: Wie sent diene Kjnajchts. Un Josua säd to an: Wäa sent jie, un wuahäa kom jie?

⁹Un see säden to am: Ut eenem sea wiedem Launt sent diene Kjnajchts jekomen, om däm Nomen Gottes, dienem Gott, sienem wellen; dan wie ha sienem Roop jehieet un aules, waut hee en Ägipten jedonen haft,

¹⁰un aules, waut hee de beid Kjennichs de Amorita jedonen haft, dee aun jane Sied vom Jordan wieren, Sihon, däm Kjennich von Hesbon, un Og, däm Kjennich von Baschan, dee en Astarot wond.

¹¹Doa säden aule Eltestasch un aule Bewona von onsem Launt too ons un säden: Nämt Äten met junt oppem Wajch un got an entjäajen, un räd met an: Wie sent june Kjnajchts; un nu moakt eenen Bunt met ons!

¹²Dit ons Broot, woam ha wie daut ut onse Hiesa toom äten metjenomen, aun däm Dach, aus wie loosjinjen, om no junt too gonen; un nu kjikj, daut es drieech un schemlich jeworden.

¹³Un dise Wienladasch, dee wie nie jefelt hauden, kjikj doa, see sent veräten; un dise onse Kjleeda un onse Schoo sent aufjenutzt vom sea langen Wajch.

¹⁴Un de Mana neemen von äarem Äten; oba daut Mul Gottes befruagen see nich.

¹⁵Un Josua muak Fräd met an un muak eenen Bunt met an, an aum Läwen to loten; un de Ferschten de Jemeent schwuare an.

¹⁶Un daut passieed aum Enj von dree Doag, nodäm see eenen Bunt met an jemoakt hauden, doa hieeden see, daut see dicht bie an wieren un medden unja an wonden.

¹⁷Doa jinjen de Kjinja Israel wieda un kaumen aum dredden Dach no äare Städa; un äare Städa wieren Gibeon un Kefira un Beerot un Kirjat-Jearim.

¹⁸Un de Kjinja Israel schluagen an nich, wiels de Ferschten de Jemeent an bie däm Harn, däm Gott Israels, jeschwuaren hauden. Doa murrd de gaunze Jemeent jäajen de Ferschten.

¹⁹Un aule Ferschten räden to de gaunze Jemeent: Wie ha an bie däm Harn, däm Gott Israels, jeschwuaren, un nu kjenn wie an nich auntauste.

²⁰Daut well wie an doonen un an aum Läwen loten, doamet nich een Oaja äwa ons wäajen däm Eit kjemt, däm wie an jeschwuaren ha.

²¹Un de Ferschten räden to an: See sellen aum Läwen bliewen. Un see woaren Holthacka un Wotaschapa fa de gaunze Jemeent sennen, soo aus de Ferschten to an jesajcht hauden.

²²Un Josua roopt an un räd to an un säd: Wuarom ha jie ons beloage un jesajcht: Wie sent sea wiet von junt, doa jie doch medden unja ons wonen?

²³Un nu, veflucht sent jie; un jie sellen nich opphieren, Kjnajchts to sennen, soo aus Holthacka aus uk Wotaschapa fa daut Hus von mienem Gott!

²⁴Un see auntwuaden Josua un säden: Wiels diene Kjnajchts berecht wort, daut de Har, dien Gott, Moses, sienem Kjnajcht, befoolen haft, junt daut gaunze Launt to jäwen un aule Laundesbewona ver junt too vetiljen, soo haud wie fa junt sea Angst wäajen ons Läwen un deeden dise Sach.

²⁵Un nu kjikj, wie sent en diene Haunt; doo, aus et goot un aus et rajcht es en diene Uagen, ons to doonen.

²⁶Un hee deed an aulsoo un rad an von de Haunt de Kjinja Israel; un see brochten an nich om.

²⁷Un Josua muak an aun janem Dach too Holthaka un Wotaschapa fa de Jemeent un fa däm Aultoa Gottes, bat opp disem Dach, aun däm Uat, däm hee erwälen woat.