Read De Bibel JHF 2. Tessalonicha 1 Bible Online

2. Tessalonicha 1 - De Bibel JHF bible

2. Tessalonicha 1

¹Paulus un Silvanus un Timotäus aun de Jemeent de Tessalonicha en Gott, onsem Voda, un däm Harn Jesus Christus:

²Jnod junt un Fräd von Gott, onsem Voda, un däm Harn Jesus Christus!

³Wie sent schuldich, Breeda, aulentiet Gott fa junt to danken, aus sikj daut jeziemt, wiels jun Gloowen stoakj waust, un de Leew, von jiedrem eenselnen, von junt aule to jäajen eenaunda toonemt,

⁴soo daut wie selfst ons junt haulwen riemen en de Jemeenten Gottes, wäajen jun jeduldjen Uthoolen un Gloowen, en aule june Vefoljungen un Bedrenkjnisen, dee jie lieden (uthoolen);

⁵een Tieekjen vom jerajchten Jerecht Gottes, daut jie wieetvoll jeacht woaren fa daut Rikj Gottes, fa daut uk jie lieden,

⁶wan daut aundasch bie Gott jerajcht es, aus Vejeltunk to eewen, dee junt bedrenjen,

⁷un junt, dee jie bedrenjt woaren, Ru met ons to jäwen, bie de Openboarunk von däm Harn Jesus vom Himmel, met de Enjel siene Macht,

⁸em Flaumenfia, wan hee Vejeltunk dän jeft, dee Gott nich kjanen, un dän, dee de frooe Bootschoft von onsem Harn Jesus nich jehorchen;

⁹dee doa Strof lieden woaren, eewjet Vedoawen wajch vom Aunjesecht von däm Harn un wajch von de Harlichkjeit siene Krauft,

¹⁰wan hee komen woat, om aun janem Dach veharlicht to woaren en (mank) siene Heilje un bewundat en (mank) aul dän, dee jejleeft ha, dan ons Zeichnis bie junt es jejleeft worden.

¹¹Doarom bäd wie uk aulentiet fa junt, om daut ons Gott junt wieetvoll moakt de Beroopunk un erfelt aulen gooden Wellen toom Gooden un daut (Glooweswoakj) Woakj em Gloowen en Krauft,

¹²daut de Nomen von onsem Har Jesus [Christus] en junt veharlicht woat, un jie en am, no de Jnod von onsem Gott un vom Harn Jesus Christus.