Read De Bibel JHF 2. Tessalonicha 3 Bible Online

2. Tessalonicha 3 - De Bibel JHF bible

2. Tessalonicha 3

¹Äwajens, Breeda, bät fa ons, dautet Wuat vom Harn vebreet (rant) un veharlicht woat, aus uk bie junt,

²un daut wie jerat woaren von dee schlajchte un beese Menschen; dan de Gloowen es nich aula Deel.

³Oba tru es de Har, dee junt stoakjen woat un bewoaren woat fa däm Beesen.

⁴Oba wie ha vetruen opp junt em Harn, daut jie, waut wie befälen, soo aus jie doonen, soo uk doonen woaren.

⁵Oba de Har recht june Hoaten opp de Leew Gottes un opp daut jeduldje Wachten (Luaren) opp Christus.

⁶Wie befälen junt oba, Breeda, em Nomen von onsem Har Jesus Christus, daut jie junt trigjtrakjen von jiedrem Brooda, dee nich ontlich waundelt, un nich no de Lia läft, dee hee (see) von ons emfangen haft (ha).

⁷Dan jie selfst weeten, woo jie ons aus Väabilt haben sellen; dan wie ha nich onordentlich bie junt jewaundelt (jeläft),

⁸un wie ha nich emsonst von irjent wäm Broot jejäten, sonda met Mieej un Aunstrenjunk de Nacht un Dach jeoabeit, om kjeenem von junt to Laust sennen.

⁹Nich daut wie nich daut Rajcht doatoo ha, sonda doamet wie ons selfst junt toom Väabilt jäwen, doamet jie ons nofoljen.

¹⁰Dan aus wie bie junt wieren, befool wie junt dit: Wan wäa nich oabeiden well, soo saul hee uk nich äten.

¹¹Dan wie hieren, daut atelje mank junt nich ontlich waundlen, nich oabeiden, sonda nutzloose Dinj driewen.

¹²Oba dän, dee soowaut doonen, befäl wie un vemonen an en däm Harn Jesus Christus, daut see, en Ru oabeiden, äa ieejnet Broot äten.

¹³Oba jie, Breeda, woat nich meed, Goodet to doonen.

¹⁴Oba wan wäa no ons Wuat, derch däm Breef, nich jehorcht, dän moakjt junt, un habt met am kjeenen Omgank, doamet hee beschämt woat;

¹⁵un hoolt am nich fa eenen Fiend, sonda vemont am aus eenen Brooda.

¹⁶Oba hee, de Frädenshar, jeft junt Fräd aule Tieden opp aule Oat! De Har es met junt aulem!

¹⁷De Gruss met miene, Paulus, Haunt, daut es daut Tieekjen en jiedrem Breef: Soo schriew ekj.

¹⁸De Jnod von onsem Harn Jesus Christus es met junt aula!