Read De Bibel JHF 1. Timotäus 1 Bible Online

1. Timotäus 1 - De Bibel JHF bible

1. Timotäus 1

¹Paulus, Apostel Jesus Christus, no Gott sien Befäl, ons Heilant, un Christus Jesus onse Hopninj,

²aun Timotäus, mienen woaren Sän em Gloowen, Jnod, Erboarmen, Fräd von Gott, däm Voda, un Christus Jesus onsem Harn!

³Aus ekj die vemond (bedd), aus ekj no Mazedonien reisd, en Efesus to bliewen, daut du atelje befälst, nich aundret to lieren,

⁴un nich opp Foblen un Jeschlajchtsrejista onen Enj to achten, dee mea Strietfroagen väabrinjen, aus de Vewaultunk (Heilsplon) Gottes em Gloowen.

⁵Oba daut Enjziel von dän Befäl es: Leew ut een reinet Hoat un goodet Jewessen un onjeheichelten Gloowen,

⁶wuavon eenje aufjeert sent un sikj to ladjet Jeschwauz jedreit ha;

⁷dee, wellen Jesazesliera sennen un nich vestonen, noch waut see sajen, noch waut see faust behaupten.

⁸Oba wie weeten, dautet Jesaz goot es, wan wäa daut Jesaz mässich brukt,

⁹daut weetent, daut et Jesaz nich fa eenen Jerajchten enjesat (bestemt) es, oba fa Jesazloose un Wadaspanstje, fa Gottloose un Sinda, fa Onheilje un Orreine, Vodamerda un Muttamerda, fa Menschenmerda,

¹⁰fa Huara, fa Mana waut met Mana Schaund driewen, Menschenhendla, Läajna, fa dee waut faulsch schwieren (faulsche Zeijen), un wan doa waut aundret jäajen de jesunde Lia es,

¹¹no de frooe Bootschoft von de Harlichkjeit vom seeljen Gott, dee mie aunvetrut jeworden es.

¹²[Un] ekj dank Christus Jesus, onsem Harn, dee mie Krauft jeef, daut hee mie fa tru jeacht haft, un mie toom Deenst bestemt haft,

¹³dee ekj verhäa een Lastra un Vefolja un Fräfla (Jewault eewenda) wia; oba ekj wort met Erboarmen beschenkjt, wiels ekj daut onweetent em Ongloowen deed.

¹⁴Oba äwa de Mot es de Jnod von onsem Harn äwagroot jeworden met Gloowen un Leew en Christus Jesus.

¹⁵Gaunz opp to veloten (Gloowenswieet) es daut Wuat un en aulem auntonämen wieet, daut Christus Jesus enne Welt jekomen es, Sinda to raden, mank dän ekj de ieeschta sie.

¹⁶Oba doawäajen wort ekj met Erboarmen beschenkjt, doamet aun mie, däm ieeschten, Jesus Christus de gaunze Langmoot (Jedult) bewees, toom Väabilt fa aule, dee aun am jleewen woaren toom eewjen Läwen.

¹⁷Oba däm Kjennich äwa de Eewichkjeit, däm onvejenkjlichen, onsechtboaren, eensjen Gott, es Iea un Harlichkjeit (Riem) von Eewichkjeit to Eewichkjeit! Amen.

¹⁸Dit Jeboot vetru ekj die aun, mien Sän Timotäus, no de Profezeiunk dee verhäa äwa die utjinkj, daut du derch dee selje dän gooden Kaumf kjamfst,

¹⁹dän Gloowen bewoascht un een goodet Jewessen, daut atelje von sikj jestat ha, un waut dän Gloowen betraft, Scheppbruch jeläden ha;

²⁰mank dän es Hiemenäus un Alexanda, dee ekj däm Soton äwajäft ha, doamet see jestroft woaren, nich mea to lastren.