Read De Bibel JHF 1. Timotäus 3 Bible Online

1. Timotäus 3 - De Bibel JHF bible

1. Timotäus 3

¹Gaunz opp to veloten es daut Wuat: Wan wäa no een Leidungsaumt sträft, soo bejieet (sträft) hee een goodet Woakj.

²Aulsoo es daut needich, daut de Leida (Oppsechta) gaunz onen Dodel (schultloos) , Maun von eene Fru, nichta, besonnen, ieeboa, gaustfrie, fäich to unjarechten (belieren);

³nich een Wiensupa, nich een Schläajna, sonda frintlich, nich opp strieden hoolen, nich nom Jelt hinjaraun,

⁴dee däm ieejnen Hus goot väasteit, dee siene Kjinja unjadon helt met aula Ieaboakjeit,

⁵oba wan wäa däm ieejnen Hus nich väatostonen weet, woo woat hee fa de Jemeent Gottes sorjen?

⁶Nich een Freschbekjieeda, doamet hee nich stolt woat, un em Jerecht vom Diewel vefelt.

⁷Oba hee mott uk een goodet Zeichnis ha von dän, dee buten sent, doamet hee nich en Schmach un enne Schlenj von däm Diewel vefelt.

⁸De Deena (Diakonen, Helpa) krakjt soo, ieeboa, nich met dobbelde Tungen räden, sikj nich väl däm Wien hanjäwen, nich schenteljen Jewenst nogonen,

⁹dee daut Jeheemnis vom Gloowen en een reinet Jewessen bewoaren.

¹⁰Oba uk dise sellen ieescht jeprooft woaren, dan sellen see deenen, wan see schultloos sent.

¹¹De Frues krakjt soo, ieeboa sennen, nich pludren, nichta, tru en aulet.

¹²De Deena sellen Maun von eene Fru sennen, dee äaren Kjinja un de ieejne Hiesa goot väastonen;

¹³dan dee, dee goot jedeent ha, moaken sikj eene goode Stoop (Städ) un väl Toovetruen (Freid) em Gloowen aun Christus Jesus.

¹⁴Dit schriew ekj die en de Hopninj, boolt no die to komen;

¹⁵oba wan ekj vetrakj (wan mie doa waut mank kjemt), doamet du weetst, woo maun sikj em Hus Gottes vehoolen saul, daut es de Jemeent vom läwendjen Gott, de Stenda un Stett (fausta Grunt) fa de Woarheit.

¹⁶Un aunerkjant groot es daut Jeheemnis de Gottseelichkjeit: Gott es openboat worden em Fleesch, jerajchtfoadicht em Jeist, jeseenen vonne Enjel, vekjindicht mank de Velkja, jejleeft enne Welt, oppjenomen en Harlichkjeit.