Read De Bibel JHF 1. Timotäus 4 Bible Online

1. Timotäus 4 - De Bibel JHF bible

1. Timotäus 4

¹Oba de Jeist sajcht utdrekjlich, daut enne lotre Tieden woaren eenje vom Gloowen auffaulen, endäm see achten opp errfierende (vefierarische) Jeista un Lieren de Dämonen,

²dee met heichlen Läajes räden un doaderch äa ieejnet Jewessen vebrent,

³vebeeden to befrieen, un befälen, sikj von Moltieden to enthoolen, dee doch Gott jeschaufen haft toom aunnämen met Dank sajen fa de Jleewende, un de Woarheit erkjant ha.

⁴Dan jiedret Jeschaufne (Kjreatua) Gottes es goot un nuscht to veschmieten (veachten), wan daut met Dank sajen aunjenomen woat;

⁵dan daut woat jeheilicht derch Gottes Wuat un derch Jebäd.

⁶Wan du dit de Breeda väastalst (väahelst), soo woascht du een gooda Deena Christus Jesus sennen, oppertrocken met (derch) de Wieed vom Gloowen un dee goode Lia, dee du nojefolcht best.

⁷Oba de onheilje un oole Frues-Foblen (onwoare Jeschichten) wies auf, oba eew die enne (to) Gottseelichkjeit (fa Gott to läwen, Fromheit);

⁸dan daut kjarpaliche eewen nuzt weinich, oba de Gottseelichkjeit nuzt fa aule Dinja, endäm see de Vespräakjunk fa daut Läwen haft, daut von nu un daut komende.

⁹Daut Wuat es jewess un aules Aunnämen wieet;

¹⁰dan doafäa mieej wie ons auf un woaren vespott, wiels wie opp eenen läwendjen Gott hopen, dee een Rada (Erhoola) fa aule Menschen es, daut mieeschte fa de Jleewende.

¹¹Dit jebeed un lia.

¹²Kjeena veacht diene Jugent, sonda sie een Väabilt fa de Jleewende em Wuat (Räden), em Waundel, enne Leew, em Gloowen, en Reinheit.

¹³Bot ekj kom, hool aun met Väaläsen, met Vemonen, met Lieren.

¹⁴Vejat nich von de Jnodengow, dee die jejäft worden es derch Profeetie met Henjopplajen de Eltestasch.

¹⁵Dit eew; doarenn läw, doamet dien Veraunkomen (dien Iewa) aulen openboa woat.

¹⁶Ha acht opp die selfst un opp de Lia; bliew (en an) bie dise Dinj; dan wan du dit deist, soo woascht du uk die selfst raden uk dee, dee die hieren.