Read De Bibel JHF 1. Timotäus 6 Bible Online

1. Timotäus 6 - De Bibel JHF bible

1. Timotäus 6

¹Aule, dee aus Sklowen unja däm Joch sent, sellen äare ieejne Haren aule Iea wieet achten (hoolen), doamet nich de Nomen Gottes un de Lia jelastat woat.

²Oba dee, jleewende Haren ha, sellen dee nich veachten, wiels see Breeda sent, sonda an väl mea deenen, wiels see Jleewende un Jeleewde sent, dee sikj aum Gootsdoonen bemieejen. Dit lia un vemon.

³Wan wäa aundasch lieet un sikj nich dee jesunde Wieed han dreit, dee von onsem Harn Jesus Christus sent, un de Lia, de no de Gottseelichkjeit es,

⁴soo es hee oppjeblost un vesteit nuscht, sonda es krank wäajen Strietfroagen un Wuatstriet, ut däm entsteit Aufgonst, Striet, Lastrunk, beeset Vedenkjen,

⁵bestendje Riewarie von Menschen, em Vestaunt vedorwen un de Woarheit berooft sent, dee meenen, daut Gottseelichkjeit es een Meddel toom Jewenst.

⁶Oba daut es een wichtjet jewenst Meddel de Gottseelichkjeit toop met de Jenuachsomkjeit;

⁷dan wie ha nuscht enne Welt nenn jebrocht, [soo es daut openboa,] daut wie uk nuscht rutbrinjen kjennen.

⁸Oba wan wie Äten un Bedakjunk (Kjleeda) ha, soo well (sellen) wie ons doamet bejnieejen.

⁹Oba dee rikj sennen wellen, faulen en Vesieekjunk un eene Schlenj un väl onveninftje un schätelje Bejia, en dee de Menschen vesenkjen en Vedoawnis un Unjagank.

¹⁰Dan Jeltjia es eene Wartel von aulem Beesen, doa no eenje trachten un vom Gloowen aufjeert (aufjefollen) sent un sikj selfst met väl Weedoag derchboat (aunjedonen, toojesat) ha.

¹¹Oba du, oo Mensch Gottes, ran von daut wajch; oba sträw no Jerajchtichkjeit, Gottseelichkjeit, Gloowen, Leew, Jedult, Saunftmoot (Leeftolichkjeit).

¹²Kjamf dän gooden Kaumf vom Gloowen; jriep daut eewje Läwen, to däm du beroopen worden best, un bekjant hast daut goode Bekjantnis ver väle Zeijen.

¹³Ekj jebeed die ver Gott, dee aules läwendich moakt, un ver Christus Jesus, dee ver Pontius Pilatus daut goode Bekjantnis bezeicht haft,

¹⁴daut du daut Jeboot gaunz rein (onen Plaken), onstroflich (oschuldich) bewoascht bot toom Erschienen (Wadakomen) von onsem Harn Jesus Christus,

¹⁵dee to siena Tiet wiesen woat dee seelja un eensja Harscha, dee Kjennich äwa de Kjennichs un Har de Haren (Harscha),

¹⁶dee auleen Onstoawlichkjeit haft, dee een ontojenkjeljet Licht bewont, dän kjeena de Menschen jeseenen haft un nich seenen kaun, däm es Iea un eewje Macht! Amen.

¹⁷De Rikje en dise Welt jebeed, nich stolt to sennen, un nich opp de Onjewesheit vom Rikjtum de Hopninj to saten, sonda opp Gott; dee ons von aulem väl jeft, toom Jenuss;

¹⁸Goodet to doonen, rikj to sennen en goode Woakjen, mildjäwrich to sennen, reed sennen to deelen,

¹⁹endäm see sikj eene goode Gruntloag fa de Tookunft saumlen, doamet see daut werkjliche Läwen aunjriepen.

²⁰Oo Timotäus, bewoa daut aunvetrude Goot, daut onheilje ladje Jeschwauz un Striedarieen (jäajenaun Jedanken) de faulsche soojenande Erkjantnis go utem Wajch,

²¹to dee sikj eenje bekjanen un von däm Gloowen aufjeert sent. De Jnod es met die!