Read De Bibel JHF 2. Timotäus 1 Bible Online

2. Timotäus 1 - De Bibel JHF bible

2. Timotäus 1

¹Paulus, Apostel Jesus Christus derch Gottes Wellen, nom Vespräakjen von Läwen en Christus Jesus,

²aun Timotäus, mienen leefsten Sän: Jnod, Erboarmen, Fräd von Gott, däm Voda, un Christus Jesus, onsem Harn.

³Ekj dank Gott, däm ekj von miene Väaelren häa met reinet Jewessen deen, woo ekj onen opptohieren die jedenkj en miene Jebäda, Nacht un Dach,

⁴voll Velangen, die to seenen, un denkj aun diene Tronen, doamet ekj met Freid erfelt woa;

⁵endäm ekj jedenkj aun däm, en die wonenda, ojjeheichelta Gloowen, dee ieescht jewont haft en diene Grootmutta Lois un diene Mutta Eunike, oba ekj sie äwazeicht, uk en die.

⁶Ut disem Grunt halp ekj die denkjen, de Jnodengow Gottes woam to hoolen, dee en die es derch daut Opplajen miene Henj.

⁷Dan Gott haft ons nich eenen Angstjeist jejäft, sonda de Krauft un de Leew un de Venunft (Zucht).

⁸Aulsoo schäm die nu nich wäajen daut Zeichnis von onsem Harn, uk nich met mie, sienem Jefangnen, sonda lied Triebsaul met de frooe Bootschoft, no de Krauft Gottes;

⁹dee ons jerat haft un beroopen haft met heilje Beroopunk, nich no onse Woakjen, sonda no sienen ieejnen Väanämen un Jnod, dee ons en Christus Jesus ver eewje Tieden jejäft es,

¹⁰oba nu jeopenboat es derch daut Komen von onsem Rada (Heilant) Jesus Christus, dee däm Doot tonicht jemoakt, oba Läwen un Onvejenkjlichkjeit aunt Licht jebrocht haft derch de frooe Bootschoft,

¹¹doafäa (doatoo) ekj bestalt worden sie aus Vekjindja un Apostel un Liera de Heiden.

¹²Ut disem Grunt ekj dit uk lied; oba ekj schäm mie nich, dan ekj weet, opp wäm ekj mien Vetruen jesat ha, un ekj sie äwazeicht, daut hee machtvoll es, daut am von mie aunvetrude Goot bot janem Dach to bewoaren.

¹³Hool faust daut Väabilt jesunde Wieed, dee du von mie jehieet hast, em Gloowen un de Leew, dee en Christus Jesus es.

¹⁴Bewoa daut scheene aunvetrude Goot derch dän Heiljen Jeist, dee en ons wont.

¹⁵Du weetst dit, daut sikj aule von mie wajchjedreit ha, dee en Asien sent, mank dän es Fiegelus un Hermogenes.

¹⁶De Har jäft däm Onesiforus sien Hus Erboarmen, wiels hee haft mie foaken oppjemuntat un haft sikj nich met miene Kjäden jeschämt;

¹⁷sonda aus hee no Room kjeem, socht hee mie flietich (iewrich) opp un funk mie.

¹⁸De Har jeff am, daut hee Erboarmen vom Harn finjt aun jan Dach! Un aules, waut hee en Efesus aum Deenst jewäsen haft, weetst du aum basten.