Read De Bibel JHF 2. Timotäus 4 Bible Online

2. Timotäus 4 - De Bibel JHF bible

2. Timotäus 4

¹Ekj bezeij die iernsthauft ver Gott un Christus Jesus, dee doa rechten woat Läwendje un Doodje, un bie sienem Erschienen (Wadakomen) un bie sienem Rikj:

²Vekjindj daut Wuat, sie reed bie paussende Jeläajenheit un bie onpaussende Jeläajenheit; wies trajcht, räd iernst too, vemon met aule Jedult un Lia.

³Dan daut woat eene Tiet sennen, doa see de jesunde Lia nich vedroagen woaren, sonda no äare ieejne Lost sikj Liera utwälen woaren, wiels an daut enne Uaren kjittelt;

⁴un see woaren daut Jehia (de Uaren) von de Woarheit aufdreien un woaren sikj no de Foblen handreien.

⁵Oba du sie nichta en aule Dinj, lied Ojjemak, doo daut Woakj von eenen Vekjindja de frooe Bootschoft, doo (vollbrinj) dienen Deenst.

⁶Dan ekj woa aul jeopfat (aus Drinkjopfa) {1Mo.35,14; 4Mo.15,5-10}, un de Tiet von mien Scheiden es doa.

⁷Ekj ha dän gooden Kaumf jekjamft, ekj ha daut Ranen vollbrocht (bat Enj utjehoolen), ekj ha dän Gloowen bewoat;

⁸fa de Tookunft es mie de Kroon de Jerajchtichkjeit oppbewoat, dee de Har, dee jerajchta Rechta, aun janem Dach mie aus (to) Belooninj jäwen woat; oba nich blooss mie, sonda uk aulen, dee sien Wadakomen (openboa woaren) leef ha.

⁹Spood die, boolt no mie to komen;

¹⁰dan Demas haft mie veloten, doa hee dise (jäajenwuatje) Welt leef jewonnen haft, un es no Tessalonich jereist, Kreszens no Galatien, un Titus no Dalmatien.

¹¹Lukas es auleen bie mie. Nemm Markus un brinj am met die, dan hee es mie bruckboa toom Deenst.

¹²Oba Tiechikus ha ekj no Efesus jeschekjt.

¹³Dän Mauntel, dän ekj en Troas bie Karpus trigj leet, brinj met, wan du kjemst, un de Bieekja, besondasch de Pergamenten (Buakrollen).

¹⁴Alexanda, de Schmett (Koppaschmett) haft mie väl Beeset aunjedonen; de Har woat am vejelten no siene Woakjen.

¹⁵Fa däm heed uk du die, dan hee haft sikj onse Wieed sea entjäajen jestalt.

¹⁶Bie miene ieeschte Veteidjunk stunt mie kjeena bie, sonda aula ha mie em Stich (Stäakj) jeloten; mucht an daut nich toojeräakjent woaren.

¹⁷Oba de Har stunt mie bie un stoakjt mie, doamet derch mie de Vekjindjunk vollbrocht woat, un hieren kunnen aule Velkja, un ekj wort jerat ut de Frät vom Leiw.

¹⁸De Har woat mie bewoaren ver jiedret beeset Woakj un bewoaren fa sien himlischet Rikj, däm es de Iea en de Eewichkjeit to Eewichkjeit! Amen.

¹⁹Jrees Priska un Aquilla un daut Hus Onesiforus.

²⁰Erastus bleef en Korint; oba Trofimus ha ekj krank en Milẹt trigj jeloten.

²¹Spood die, ver däm Winta to komen. Daut jreessen die Eubulus un Pudens un Linus un Klaudia un aule Breeda.

²²De Har Jesus Christus es met dienem Jeist! De Jnod es met junt!