Read De Bibel JHF Hebräa 1 Bible Online

Hebräa 1 - De Bibel JHF bible

Hebräa 1

¹Nodäm Gott välmol un opp veschiedne Oat (Wäaj) enne oole Tieden to de Vodasch jerät haft derch (en) de Profeeten, haft hee aum Enj dise Doag to ons jerät em Sän,

²däm hee enjesat haft toom Oaw von aules, derch däm hee uk de Welten jemoakt haft;

³dee doa, de Aufglauns siene Harlichkjeit un de Aufbild von siene Werkjlichkjeit (Wäsent) es un aule Dinj (daut Weltaul) derch daut Wuat siene Macht opp sikj nemt (drajcht), nodäm hee [derch sikj selfst] de Reinjunk de Sinden jemoakt (bewirkjt) haft, sikj jesat haft to Rajchte de Majestät en de Hecht (bowaschte Macht),

⁴endäm hee soo väl majchtja (bäta) jeworden es aus de Enjel, aus hee eenen vetrafeljen (hechren) Nomen ver an jeorwen haft.

⁵Dan to woone Enjel haft hee (Gott) jeemols jesajcht: «Du best mien Sän, vondoag ha ekj die jebuaren»? {Ps.2,7} Un wada: «Ekj woa (well) am toom Voda sennen, un hee saul (woa) mie toom Sän sennen»? {1Chr.17,13}

⁶Oba wan hee dän Ieeschtjebuarnen en de bewonde Ieed (Welt) nenn fieet, sajcht hee: «Un aule Enjel Gottes sellen am aunbäden». {Ps.97,7}

⁷Un betrafs opp de Enjel zwoa sajcht hee: «Dee siene Enjel to Wint (Jeista) moakt un siene Deena to Fiaflaumen»; {Ps.104,4}

⁸oba betrafs opp däm Sän: «Dien Troon, oo Gott, es von Eewichkjeit to Eewichkjeit, un een Zepta de Opprechtichkjeit (Jerajchtichkjeit) es daut Zepta von dienem Rikj;

⁹du hast Jerajchtichkjeit jeleeft un Jesazloosichkjeit jehaust; doawäajen haft Gott, dien Gott, die jesaulft met Freideneelj äwa diene Frind (Poatna)». {Ps.45,7.8}

¹⁰Un: «Du Har, hast em Aunfank de Ieed jejrindet (jemoakt), un de Himmel sent Woakjen von diene Henj;

¹¹dee woaren unjagonen (vegonen), oba du blifst; un dee aule woaren oolt aus een Kjleet,

¹²un aus een Mauntel woascht du dee toopwekjlen, un dee woaren vewaundelt woaren. Oba du best dee selja, un diene Joaren woaren nich vegonen». {Ps.102,26-28}

¹³Oba, to woonen de Enjel haft hee jeemols jesajcht: «Sat die to miene Rajchte, bot ekj diene Fiend laj (hanlaj) toom Benkjskje ver diene Feet»?

¹⁴Sent see nich aula deenstboare Jeista, utjeschekjt toom Deenst om dee äa wellen, dee de Seelichkjeit (Heil) oawen sellen?