Read De Bibel JHF Hebräa 13 Bible Online

Hebräa 13 - De Bibel JHF bible

Hebräa 13

¹De Breedaleew blift.

²Vejät nich gaustfrie to sennen, dan doaderch ha atelje onen äa weeten Enjel oppjenomen.

³Jedenkjt de Jefangne, aus Metjefangne; dän, dee Ojjemak lieden, aus soone, dee uk selfst em Lief sent.

⁴Ieeboa saul de Ehe en (bie) aule sennen, un daut Ehebad rein bliewen; Huara un Ehebräakja woat Gott rechten.

⁵De Läweswaundel saul nich daut Jelt to leewen sennen, bejnieecht junt met daut, waut jie ha, dan hee haft jesajcht: «Ekj well die nich vesiemen (oppjäwen), noch die veloten»; {5Mo.31,6; Jos.1,5}

⁶soo daut wie jetroost sajen kjennen: «De Har es mien Halpa, un ekj well mie nich ferchten; waut woat mie een Mensch doonen?» {Ps.118,6}

⁷Jedenkjt aun june Fiera (Väastona), dee daut Wuat Gottes to junt jerät ha, un, kjikjt opp dän Utgank (Enj) von äaren Waundel, folcht äaren Gloowen no.

⁸Jesus Christus es dee selja jistren un vondoag un en Eewichkjeit.

⁹Lot junt nich wajchrieten derch maunche un framde Lia; dan daut es goot, dautet Hoat derch Jnod jestoakjt woat, nich derch Moltieden, von dee kjeenen Nutzen hauden, dee doarenn waundelden.

¹⁰Wie ha eenen Aultoa, von däm kjeen Rajcht ha to äten, dee däm Zelt (oolen Bunt) deenen.

¹¹Dan von de Tieren, dän äa Bloot fa de Sind en daut Heilichtum nenn jedroacht woat derch dän Huagapriesta, woaren de Kjarpa butrem Loaga vebrent.

¹²Doawäajen haft uk Jesus, doamet hee derch sien ieejnet Bloot daut Volkj heilicht, buta daut Dooa (Puat) jeläden.

¹³Doahäa lot ons no am rutgonen, buta daut Loaga, siene Schaund (Schmach) droagen.

¹⁴Dan wie ha hia kjeene bliewende Staut, sonda de tookjinftje sieekj wie.

¹⁵Aulsoo, derch am lot ons Gott emma een Opfa brinjen am to lowen, daut es de Frucht de Leppen, dee sienen Nomen bekjanen.

¹⁶Oba daut Gootsdoonen un Metdeelen vejät nich, dan aun soone Opfa haft Gott Wooljefaulen.

¹⁷Jehorcht june Fiera un siet unjadon (jehuarsom); dan see woaken äwa june Seelen, (aus dee doa Räakjenschoft jäwen sellen), doamet see dit met Freid doonen un nich met Seften; dan daut wia junt nich nitzlich.

¹⁸Bät fa ons; dan wie sent äwazeicht, daut wie een goodet Jewessen ha, doa wie en aulem ieeboa waundlen wellen.

¹⁹Oba ekj bedd junt om soo mea, dit to doonen, doamet ekj junt boolt trigj jejäft woa.

²⁰Oba de Gott vom Fräd, dee von (ut) de Doodje trigj brocht onsem Harn Jesus, dän grooten Hoad de Schop, en daut Bloot vom eewjen Bunt, {Hes.37,26}

²¹moakt junt reed en jieda goodet Woakj, om sienen Wellen to doonen, en junt (ons) daut schauft, waut ver am wooljefaulent es, derch Jesus Christus, däm de Iea (Harlichkjeit) es von Eewichkjeit to Eewichkjeit! Amen.

²²Oba ekj bedd junt, Breeda, vedroacht daut Wuat de Vemoninj; dan ekj ha junt uk met korte Wieed (weinich Wieed) jeschräwen.

²³Weet jie, daut ons Brooda Timotäus friejeloten es, met däm, wan hee boolt kjemt, ekj junt seenen woa.

²⁴Jreest aule june Fiera un aule Heilje. Daut jreessen junt dee von Italien.

²⁵De Jnod es met junt aula! [Amen]