Read De Bibel JHF Hebräa 3 Bible Online

Hebräa 3 - De Bibel JHF bible

Hebräa 3

¹Doahäa, heilje Breeda, Frind (Poatna) de himlische Beroopunk, betracht dän Apostel un Huagapriesta von onsem Bekjantnis, Jesus,

²dee däm tru es, dee am doatoo bestalt (jemoakt, enjesat) haft, aus uk Moses wia en sien gaunzet Hus. {4Mo.12,7}

³Dan disa es jratre Harlichkjeit wieet jeacht to woaren aus Moses, soo daut jratre Iea aus daut Hus - dee haft, dee daut reed jemoakt haft.

⁴Dan jiedret Hus woat von irjent wäm jebut, oba dee aules jebut haft, es Gott.

⁵Un Moses zwoa wia tru en sien gaunzet Hus aus Deena, toom Zeichnis von daut, waut nohäa jerät worden sull;

⁶oba Christus aus Sän äwa sien Hus, dit Hus sent wie, wan wie aundasch daut frooe Tootruen (vetruen) un däm Riem de Hopninj bot toom Enj staunthauft fausthoolen.

⁷Doawäajen, aus de Heilja Jeist sajcht: «Vondoag, wan jie siene Stemm hieren,

⁸vehoat june Hoaten nich, aus en de Vebettanis, aun däm Dach de Vesieekjunk enne Wieste,

⁹wua june Vodasch mie vesochten, endäm see mie oppe Proow stalden, un see sagen miene Woakjen 40 Joa.

¹⁰Doawäajen kjeem ekj en Oaja äwa daut Jeschlajcht un säd: Emma erren see met äa Hoat; un see ha miene Wäaj nich erkjant.

¹¹Soo daut ekj jeschwuaren ha en mienem Oaja: En kjeenem Faul sellen see en miene Ru nenn komen!» {Ps.95,7-11}

¹²Paust opp, Breeda, daut nich veleicht en irjent wäm von junt een beeset Hoat von Ongloowen es em auffaulen vom läwendjen Gott,

¹³sonda vemont junt unjarenaunda (selfst) jieda Dach, soo lang daut «vondoag» heet, doamet kjeena von junt vehoat (vesteenat) woat derch Bedrach von de Sind (derch de Sind äare List).

¹⁴Dan wie sent deelhauft (Poat) aun Christus jeworden, wan wie aundasch däm Aunfank de Werkjlichkjeit Gottes bot aum Enj fausthoolen,

¹⁵endäm jesajcht woat: «Vondoag, wan jie siene Stemm hieren, vehoat june Hoaten nich, aus en de Vebettanis».

¹⁶(Dan dee, aus see jehieet hauden, ha am vebettat? Wieren daut nich aule, dee derch Moses ut Ägipten utjetrocken wieren?

¹⁷Un äwa wäm es hee oajalich jewast 40 Joa? Nich äwa dee, dee jesindicht hauden, dän äare Kjarpa (Jläda) enne Wieste follen?

¹⁸Oba wäm schwua hee, daut see nich en siene Ru nengonen sellen (woaren), aus blooss dee, dee ojjehuarsom wieren? {5Mo.1,26; 5Mo.14,43}

¹⁹Un wie seenen, daut see nich nengonen kunnen wäajen däm (äa) Ongloowen).