Read De Bibel JHF Hebräa 5 Bible Online

Hebräa 5 - De Bibel JHF bible

Hebräa 5

¹Dan jiedra ut Menschen jenomna Huagapriesta woat fa Menschen enjesat en de Sachen met Gott (dee Gott betrafen), doamet hee soo aus Gowen aus uk Opfa (Schlachtopfa) fa de Sinden brinjt (opfat);

²dee Metjefeel haben (met bedocht metfeelen) kaun met de Onweetende un Errende, doa uk hee selfst met Schwakheit omjäft es (aun sikj drajcht);

³un om dise äa wellen mott hee, aus fa daut Volkj, soo uk fa sikj selfst opfren fa de Sinden.

⁴Un kjeena nemt sikj selfst de Iea, opp sikj selfst, sonda aus von Gott beroopen, aus uk Aaron.

⁵Soo haft uk de Christus sikj nich selfst veharlicht, om Huagapriesta to woaren, sonda dee, dee to am jesajcht haft: «Du best mien Sän, vondoag ha ekj die jebuaren». {Ps.2,7}

⁶Aus hee uk aun eene aundre Städ sajcht: «Du best Priesta en Eewichkjeit no de Ordninj Melchisedek». {Ps.110,4}

⁷Dee en dee Doag en sien Fleesch, doa hee soo aus em Jebäd soo uk met Bedden däm, dee am ut däm Doot raden kunn, met stoakjet Jeschrie un Tronen doa jebrocht haud (haft), (un om siene Frommheit wellen erhieet worden es),

⁸wan hee uk Sän wia, aun däm daut, waut hee uk Lieden must, dän Jehuarsom lieed;

⁹un, hee (Jesus) es vollkomen jemoakt worden aulen, dee am jehorchen, hee wia veauntwuatlich (de Uasoak) von daut eewje Heil,

¹⁰von Gott benant aus Huagapriesta no Melchisedek siene Ordninj.

¹¹Äwa am ha wie väl to sajen, un waut met Wieed schwoa uttolajen es, wiels jie em Hieren ful (looj) jeworden sent.

¹²Dan doa jie no de Tiet no Liera sennen sullen, ha jie wada needich, daut maun junt lieet, woont de Gruntloag vom Aunfank de Spricha (Wieed) Gottes sent; un jie sent soone jeworden, dee de Malkj brucken un nich de fauste Moltiet.

¹³Dan jiedra, dee noch aun Malkj Jenotten haft, es onerfoaren em Wuat de Jerajchtichkjeit, dan hee es Onmindich (noch een Kjint);

¹⁴oba de fauste Moltiet es fa Erwosne (Vollkomne), dee doa de Fäichkjeit (daut Vemäajen) äaren Senn (de Jedanken) to brucken jeeeft ha, to unjascheeden daut Goode aus uk daut Beese.