Read De Bibel JHF Hebräa 7 Bible Online

Hebräa 7 - De Bibel JHF bible

Hebräa 7

¹Dan disa Melchisedek, Kjennich von Salem, Priesta Gottes, däm Hechsten, de Abraham entjäajen jinkj, aus hee von de Schlacht de Kjennichs trigjkaum, un am säajend,

²däm uk Abraham dän Tienden toodeeld von aulet; dee ieeschtens vedolmetscht Kjennich von Jerajchtichkjeit heet, oba uk Kjennich von Salem, daut es Kjennich von Fräd (Frädenskjennich),

³onen Voda, onen Mutta, onen Jeschlajchtsrejista, noch Aunfank de Doag noch Enj vom Läwen haft, oba däm Sän Gottes jlikj jemoakt, un blift Priesta opp (fa) emma.

⁴Oba kjikjt, woo groot disa wia (es), däm selfst Abraham, de Staumvoda, dän Tienden vom Raup jeef.

⁵Un zwoa ha dee von de Säns Levi, dee daut Priestaaumt emfangen, een Jeboot, dän Tienden vom Volkj to nämen nom Jesaz, daut es von äare Breeda, wan see uk ut de Lenden von Abraham rut jekomen sent.

⁶Oba hee, dee sien Jeschlajcht nich von an aufleid, haft dän Tienden von Abraham jenomen un däm jesäajent, dee de Vespräakjungen haud.

⁷Oba onen Wadaräd woat daut Jerinjste von däm Jratren jesäajent.

⁸Un hia zwoa emfangen Menschen, dee stoawen, dän Tienden, oba doa eena, von däm bezeicht woat, daut hee läft;

⁹un soo to sajen es derch Abraham uk Levi, dee dän Tienden kjricht, oppjefoddat worden dän Tienden to jäwen,

¹⁰dan hee (Levi) wia noch en de Lenden vom Voda, aus Melchisedek am entjäajen jinkj.

¹¹Aulsoo, wan de Vollkomenheit derch daut levitische Priestatum jekomen wia, (dan en Vebinjunk met daut selje haft daut Volkj daut Jesaz emfangen), waut fa Bederfnis wia noch doa, daut een aundra Priesta no de Ordninj von Melchisedek oppsteit, un nich no Aaron siene Ordninj jenant woat?

¹²Dan wan daut Priestatum jeendat woat, soo es daut uk needich daut eene Endrunk vom Jesaz passieet.

¹³Dan dee, von däm dit jesajcht woat, jehieet to eenen aundren Staum, von däm sikj kjeena befot (beschafticht) haft met däm Aultoa.

¹⁴Dan daut es gaunz openboa, daut ons Har ut Juda oppjegonen es (häastaumt), to däm Staum Moses nuscht betrafs opp Priesta jesajcht haft.

¹⁵Un daut es noch gaunz dietlich, wan, krakjt soo aus Melchisedek, een aundra Priesta oppsteit,

¹⁶dee nich no daut Jesaz von een fleescheljet Jeboot jeworden es, sonda no de Krauft von onvejenkjlichet Läwen.

¹⁷Dan am woat bezeicht: «Du best Priesta en Eewichkjeit no Melchisedek siene Ordninj». {Ps.110,4}

¹⁸Dan doa es een auntsied saten (aufschaufen) von daut verhäajet Jeboot de Schwakheit un Nutzloosichkjeit wäajen,

¹⁹(dan daut Jesaz haft nich to Vollkomenheit jebrocht) un nu woat eene bätre Hopninj enjefieet, derch dee wie noda no Gott komen.

²⁰Un doano dit nich onen Eidschwua passieed,

²¹(dan jane sent onen Eidschwua Priesta jeworden, oba disa met Eidschwua derch däm, dee to am säd: «De Har haft jeschwuaren, un daut woat am nich leet woaren: Du best Priesta en Eewichkjeit [no Melchisedek siene Ordninj]»),

²²soo wiet es Jesus een Birj von eenen bätren Bunt (Sechaheit) jeworden.

²³Un jane sent miere Priesta jeworden, wiels see derch däm Doot vehindat wieren to bliewen;

²⁴oba disa, wiels hee en Eewichkjeit blift, haft een onveendalichet Priestatum.

²⁵Doahäa kaun hee uk gaunz raden, dee derch am no Gott komen, endäm hee aule Tiet läft, om sikj fa an entosaten (to bedden).

²⁶Dan een soona Huagapriesta jeziemt sikj fa ons; heilich, oschuldich, gaunz rein, aufjesondat von de Sinda un hecha aus de Himmel jeworden,

²⁷dee nich jieda Dach needich haft, aus de Huagapriesta, ieescht fa de ieejne Sinden Schlachtopfa to brinjen, un dan fa daut Volkj to opfren; dan dit haft hee een fa aulemol jedonen, aus hee sikj selfst jeopfat haft.

²⁸Dan daut Jesaz sat Menschen aus Huagapriesta en, dee Schwakheiten ha; oba daut Wuat vom Eidschwua, dee nom Jesaz jekomen es, eenen Sän, vollkomen jemoakt en Eewichkjeit.