Read De Bibel JHF Hebräa 8 Bible Online

Hebräa 8 - De Bibel JHF bible

Hebräa 8

¹Oba de Hauptsach bie daut, waut wie sajen, es: Wie ha soo eenen Huagapriesta, dee sikj jesat haft to Rajchte (Haunt/Sied) vom Troon de Majestät en de Himmels,

²een Deena von daut Heilichtum un daut woarhauftje Zelt, daut de Har oppjerecht haft, nich een Mensch.

³Dan jiedra Huagapriesta woat enjesat, om soo aus Gowen aus uk Schlachtopfa doa to opfren; doahäa es daut needich, daut uk disa waut haft, daut hee opfat.

⁴Aulsoo, wan hee oppe Ieed wia, soo wia hee nich eenmol Priesta, wiels soone doa sent, dee nom Jesaz de Gowen opfren,

⁵(dise deenen aus een Aufbilt un Schauten de himlische Dinj, soo aus Moses eene jettliche Aunwiesunk kjrieech, aus hee reed wia, daut Zelt opptorechten (opptobuen): «See doano», sajcht hee (Gott), «daut du aules no daut Väabilt moakst, daut die oppem Boajch jewäsen worden es».) {2Mo.25,40}

⁶Oba nu haft hee eenen vetraflichen (bätren) Deenst jekjräajen, endäm hee uk Vemedla es von eenen bätren Bunt, dee opp Grunt bätre Vespräakjungen enjerecht es.

⁷Dan wan jan ieeschta Bunt fälaloos jewast wia, soo wia kjeen Uat jesocht worden fa eenen tweeden.

⁸Dan ontofräd sajcht hee to an: «Kjikjt, doa komen Doag, sajcht de Har, doa ekj met daut Hus Israel un met daut Hus Juda eenen nieen Bunt schluten woa;

⁹nich no däm Bunt, dän ekj met äare Vodasch muak aun däm Dach, aus ekj äare Haunt neem, om an ut daut Launt Ägipten ruttofieren; dan see bleewen nich en mienem Bunt, un ekj kjemma mie nich om an, sajcht de Har.

¹⁰Dan dit es de Bunt, dän ekj met daut Hus Israel schluten woa no jane Doag, sajcht de Har: Endäm ekj miene Jesazen en äarem Senn jäw, un ekj woa dee uk en (opp) äare Hoaten schriewen; un ekj woa an äa Gott sennen, un see woaren mie - mien Volkj sennen.

¹¹Un see woaren nich een jiedra sienen Metbirja un een jiedra sienen Brooda lieren un sajen: Erkjan däm Harn! Dan aula woaren mie kjanen, vom Kjlienen bot däm Grooten mank an.

¹²Dan ekj woa äare Ojjerajchtichkjeit jnädich sennen, un äare Sinden un äare Jesazloosichkjeit woa ekj nich mea jedenkjen». {Jer.31,31-34}

¹³Endäm hee sajcht: «Eenen nieen (Bunt)», haft hee dän ieeschten oolt jemoakt; oba waut oolt woat un veellat, es däm Veschwinjen no.