Read De Bibel JHF Jakobus 3 Bible Online

Jakobus 3 - De Bibel JHF bible

Jakobus 3

¹Siet nich väle (eene groote Zol) Liera, miene Breeda, doa jie weeten, daut wie een jratret (strenjret) Jerecht emfangen woaren;

²dan wie aula fälen (stolpren) foaken. Wan wäa em Wuat nich fält, dee es een vollkomna Maun, fäich, uk sienen gaunzen Lief em Toom to hoolen.

³Kjikj, de Pieed laj wie daut Jebett (däm Täajel) em Mul, doamet see ons jehorchen, un lenkjen äaren gaunzen Lief.

⁴Kjikj, uk de Schäp, dee soo groot sent, un von stoakje Wind jedräwen woaren, woaren derch een sea kjlienet Scheppstia jelenkjt, wuahan de Stiamaun well.

⁵Soo es uk de Tung een kjlienet Jlett un riemt sikj groote Dinj. Kjikj, een kjlienet Fia, waut von groote Woolt stekjt daut aun!

⁶Uk de Tung es een Fia, de Welt de Ojjerajchtichkjeit. De Tung es mank onse Jläda jesat, aus dee dän gaunzen Lief veorreinicht un daut Väagonen de Natua (em Läwen) aunstekjt un woat vonne Hal (griechisch Gehenna) aunjestekjt.

⁷Dan jiedre Natua, soo aus de Tieren aus Väajel, soo aus de Krupende aus de Mäatieren, woat jebandicht un es jebandicht worden derch de menschelje Natua;

⁸oba de Tung kaun kjeena de Menschen bandjen; dee es een orrujet Iebel, voll dootbrinjendet Jeft.

⁹Met dee säajen (preis) wie däm Harn un Voda, un doamet flieekj wie de Menschen, dee nom Bilt Gottes jeschaufen sent.

¹⁰Ut daut selje Mul jeit Säajen un Fluchen rut. Dit, miene Breeda, saul nich soo sennen.

¹¹De Kjwal brinjt doch nich ut dee selje Opninj daut Seete un daut Betre?

¹²Kaun veleicht, miene Breeda, een Fiejenboom Eeljbäaren väabrinjen, ooda een Wienstock Fiejen? Uk kaun nich eene Soltkjwal seetet Wota väabrinjen.

¹³Wäa es weis un vestendich mank junt? Dee wies derch sien gooden Waundel siene Woakjen en Saunftmoot de Weisheit.

¹⁴Oba wan jie betre Aufgonst un Striedsucht en jun Hoat ha, soo riemt junt nich un lieecht nich jäajen de Woarheit.

¹⁵Dit es nich de Weisheit, dee von bowen erauf kjemt, sonda eene irdische, fleeschelje (menschelje), diewlische.

¹⁶Dan wua Aufgonst un Striedsucht es, doa es Onordninj un aulet schlajchte waut eena deit.

¹⁷Oba de Weisheit von bowen es ieeschtens rein, dan frädlich, jelind, jehuarsom, voll Erboarmen un goode Frucht, onparteiisch (nich twiewlen), ojjeheichelt.

¹⁸Oba de Frucht de Jerajchtichkjeit woat fa dän jeseit, de Fräd steften (moaken).