Read De Bibel JHF Jakobus 4 Bible Online

Jakobus 4 - De Bibel JHF bible

Jakobus 4

¹Wuahäa komen Kjriej un wuahäa Striedichkjeiten mank junt? Kjemt daut nich von doa, ut june Lost, dee en june Jläda strieden?

²Jie sent bejierich (jankrich) un ha nuscht; jie morden (brinjen om) un sent aufjenstich un kjennen nuscht erlangen (kjrieen); jie strieden un kjriejen; jie ha nuscht, wiels jie nich bedden.

³Jie bedden un kjrieen nuscht, wiels jie iebel bedden, doamet jie daut en june Lost vebrucken.

⁴Jie Ehebräakjarischet Jeschlajcht, weet jie nich, daut de Frintschoft met de Welt Fientschoft jäajen Gott es? Aulsoo, wäa nu irjent een Frint de Welt sennen well, stalt sikj aus Gott sien Fient doa.

⁵Ooda denkj (meen) jie, daut de Schreft vejäfs räd? Dee Jeist, dee en ons wont, es bejierich un voll Aufgonst?

⁶Oba hee jeft jratre Jnod; doawäajen sajcht hee: «Gott stalt sikj jäajen de Stolte, oba de Deemootje jeft hee Jnod». {Spr.3,34}

⁷Aulsoo, unjaordnet (unjadont) junt Gott. Oba wadastot däm Diewel, un hee woat von junt wajch ranen.

⁸Komt noda no Gott, un hee woat no junt komen. Reinicht de Henj, jie Sinda, un reinicht de Hoaten, jie Wankelmootje.

⁹Siet doljeschloagen, un truarich un hielt; jun Lachen vewaundelt sikj en Truarichkjeit un june Freid en Doljedrekjtheit (Veläajenheit).

¹⁰Deemooticht junt ver däm Harn, un hee woat junt opphäwen (opprechten).

¹¹Räd nich jäajen eenaunda, Breeda. Wäa jäajen sienen Brooda rät ooda sienen Brooda recht, rät jäajen daut Jesaz un recht daut Jesaz. Oba wan du daut Jesaz rechst, soo best du eena dee daut nich Jesaz helt, sonda een Rechta.

¹²Eena es de Jesazjäwa un Rechta, dee raden un vedoawen (venichten) kaun. Oba du, wäa best du, dee du däm Näakjsten rechst?

¹³Wool aun dän, dee jie sajen: Vondoag ooda morjen well wie en dee un dee Staut gonen un woaren doa een Joa vebrinjen un Haundel driewen un Jewenst moaken;

¹⁴(dee jie nich weeten, waut de morjescha Dach brinjen woat; [dan] waut es jun Läwen? Een Donst es daut, jo, dee eene kjliene Tiet toseenen es un dan veschwinjt);

¹⁵enne Städ daut jie sajen: Wan de Har well un wie läwen, soo woa wie uk dit ooda jant doonen.

¹⁶Oba nu riem (puch) jie junt en june Prolarie. Aul soon Riemen es bees.

¹⁷Wäa nu (oba) weet, Goodet to doonen, un deit daut nich, däm es daut ne Sind.