Read De Bibel JHF 1. Petrus 3 Bible Online

1. Petrus 3 - De Bibel JHF bible

1. Petrus 3

¹Krakjt soo jie Frues, siet june ieejne Mana unjadon, doamet, wan uk atelje däm Wuat nich jehorchen (jleewen), see derch däm Waundel de Frues onen Wuat jewonnen woaren,

²endäm see junem en Forcht reinem Waundel beoobacht ha;

³dee äa Schmuck nich de utwendja es derch de Hoa flajchten un Omhenjen von Golt ooda Auntrakjen von Kjleeda,

⁴sonda de vestoakna Mensch em Hoaten en däm onveweslichet Schmuck vom saunften un stellen Jeist, dee ver Gott sea kostboa es.

⁵Dan soo nämlich muaken sikj uk schmock eenst de heilje Frues, dee äare Hopninj opp Gott saden, endäm see äare ieejne Mana unjadon wieren;

⁶aus Sara däm Abraham jehorcht un am Har nand, äare Kjinja sent jie jeworden, wan jie Goodet doonen un kjeen Schrakj ferchten.

⁷Jie Mana krakjt soo, wont bie (met) an no Erkjantnis (Ensecht), aus bie eenem schwakren Jefäss, däm Fruesjeschlajcht, an Iea jäwen, aus dee uk Metoawen de Jnod vom Läwen sent, om daut june Jebäda nich vehindat woaren.

⁸Oba endlich siet aula jlikj jesonnen, metliedich, voll brooda Leew, boarmhoatich, deemootich,

⁹un vejelt nich Beeset met Beesem, ooda Schellwuat met Schellwuat, sonda em Jäajendeel säajent, wiels jie doatoo sent beroopen worden, daut jie Säajen oawen.

¹⁰«Dan wäa daut Läwen leewen un goode Doag seenen well, dee helt siene Tung vom Beesen, un siene Leppen, daut see nich Faulsch räden;

¹¹hee drei sikj wajch vom Beesen un doo Goodet; hee sieekjt Fräd un joag am no;

¹²dan de Uagen vom Harn sent opp de Jerajchte jerecht, un siene Uaren opp äa Jebäd; oba daut Aunjesecht vom Harn es jäajen dee, de Beeset doonen». {Ps.34,13-17}

¹³Un wäa es, dee junt Beeset doonen woat, wan jie fa daut Goode iewrich jeworden sent?

¹⁴Oba wan jie uk lieden sullen om de Jerajchtichkjeit wellen, seelich sent jie! Oba jie enjst junt nich wan see junt enjsten, un lot junt nich vewerren,

¹⁵sonda heilicht Christus, däm Harn, en june Hoaten. {Jes.8,12-13} Oba siet jieda Tiet reed to Veauntwuatunk jäajen jiedrem, de Räakjenschoft von junt foddat äwa de Hopninj, dee en junt es;

¹⁶oba met Saunftmoot un Forcht; endäm jie een goodet Jewessen ha, doamet, en däm see jäajen junt aus Iebel doonende räden, dee to Schaund woaren, dee junen gooden Waundel en Christus vespotten.

¹⁷Dan daut es bäta, wan de Wellen Gottes daut well, fa Gootsdoonen to lieden, aus fa Beeset doonen.

¹⁸Dan uk Christus haft eenmol fa de Sinden jeläden, de Jerajchta fa de Ojjerajchte, doamet hee ons to Gott fieet, zwoa doot jemoakt nodäm Fleesch, oba läwendich jemoakt nodäm Jeist,

¹⁹en däm hee uk hanjinkj un vekjindijd [daut Heil] de Jeista, dee em Jefenkjnis sent,

²⁰dee eenst ojjehuarsom wieren, aus de Langmoot Gottes jeduldich luad en de Doag Noah, aus de Arche jebut wort, en dee weinje, daut es 8 Seelen, derch daut Wota jerat worden,

²¹waut fa Jäajenbilt uk junt nu raden woat, daut es daut Deepen, (nich een Auflajen de Orreinichkjeit vom Fleesch, sonda de Bedd to Gott om een goodet Jewessen), derch de Oppstoninj Jesus Christus,

²²dee, em Himmel jegonen, to Rajche Gottes es, en däm Enjel un Jewaulten un Machte am unjadon sent.