Read De Bibel JHF 1. Petrus 5 Bible Online

1. Petrus 5 - De Bibel JHF bible

1. Petrus 5

¹De Eltestasch, dee unja junt sent, vemon ekj, de Metelteste un Zeijen de Lieden von Christus un uk Deelhaba de Harlichkjeit, dee jeopenboat woaren saul:

²Weid (woakt äwa) de Häad Gottes, dee bie (unja) junt es, endäm jie de Oppsecht nich ut Dwank fieren, sonda friewellich, uk nich om schenteljen Jewenst, sonda wellich (ut Leew),

³nich aus dee doa harschen äwa äa Ieejentum, sonda endäm jie Väabilda de Häad sent.

⁴Un wan de Bowahoad (Christus) openboa jeworden es, soo woa jie de onvewalkjliche Kroon de Harlichkjeit emfangen.

⁵Jrod (krakjt) soo jie Jinjre, siet de Eltestasch unjadon. Oba aula siet jäajen eenaunda met Deemoot faust aunjetrocken (omjebungen); dan «Gott wadasteit däm Stolten, oba däm Deemootjen jeft hee Jnod». {Spr.3,34}

⁶Aulsoo deemooticht junt unja de majchtje Haunt Gottes, doamet hee junt erhäft to rajchte Tiet,

⁷endäm jie aule june Sorjen opp am schmieten (jeschmäten ha), dan hee es beorruicht fa (om) junt.

⁸Siet nichta, woakt; jun Jäajna, de Diewel, jeit omhäa aus een brellenda Leiw un sieekjt, wäm hee veschlinjen kaun.

⁹Däm wadastot, faust em Gloowen, doa jie weeten, daut dee selje Lieden sikj vollstrakjt aun june Broodaschoft, dee en de Welt es.

¹⁰Oba de Gott aula Jnod, dee junt beroopen haft to siene eewje Harlichkjeit en Christus Jesus, nodäm jie eene kjliene Tiet jeläden ha, hee selfst woat [junt] vollkomen moaken, befaustje, stoakjen, jrinden (opp faustem Grunt stalen).

¹¹Am es [dee Harlichkjeit en] de Macht von Eewichkjeit to Eewichkjeit! Amen.

¹²Derch Silvanus (Silas) dän truen Brooda, aus ekj denkj, ha ekj junt met weinich Wieed jeschräwen, junt vemont un bezeijd, daut dit de woaren Jnod Gottes es, en dee jie stonen.

¹³Daut jreessen junt de Metuterwälte en Babel un Markus, mien Sän.

¹⁴Jreest eenaunda met däm Kuss de Leew. Fräd junt aulen, dee jie en Christus sent!