Read De Bibel JHF 2. Petrus 1 Bible Online

2. Petrus 1 - De Bibel JHF bible

2. Petrus 1

¹Simon Petrus, Kjnajcht un Apostel Jesu Christi, aun dän, dee eenen jlikj wieetvollen Gloowen met ons erlangt (emfangen) ha, derch de Jerajchtichkjeit, von onsem Gott un Heilant Jesus Christus:

²Jnod un Fräd es junt vemieet {1Pet.1,2} en (derch) de Erkjantnis Gottes un Jesus, onsem Harn!

³Doa siene jettliche Krauft ons aules toom Läwen un de Gottseelichkjeit jeschenkjt haft derch de Erkjantnis von däm, dee ons beroopen haft derch Harlichkjeit un Gotteskrauft,

⁴derch dee hee ons de wieetvollen un sea groote Vespräakjungen jeschenkjt haft, doamet jie doaderch Aundeel aun de jettliche Natua haben woaren, endäm jie däm Vedoawen entgonen sent, daut enne Welt es, derch de Lost;

⁵krakjt doawäajen jeft oba junt han, endäm jie aulen Fliet (Iewa) aunsaten (aunbrinjen), un rieekjt en junen Gloowen Ducht (jeistliche Energie), en de Ducht oba Erkjantnis,

⁶oba en de Erkjantnis daut Selfstbeharschen, en däm Selfstbeharschen Jedult, un en de Jedult de Gottseelichkjeit,

⁷un en Gottseelichkjeit oba de Broodaleew, en de Broodaleew oba de Leew.

⁸Dan wan dise Dinj bie junt sent un sikj vemieren, soo stalen dee junt nich looj (ful) noch onfruchtboa han betrafs de Erkjantnis von onsem Harn Jesus Christus.

⁹Dan bie wäm dise Dinj nich sent, dee es blint, kortsechtich un haft de Reinjunk siene väaje Sinden vejäten.

¹⁰Doarom, Breeda, bemieecht junt om soo mea, june Beroopunk un Erwälunk faust to moaken; dan wan jie dise Dinj doonen, soo woa jie niemols stolpren (schwak woaren).

¹¹Dan aulsoo woat junt rikjlich jeräkjt woaren de Enngank en daut eewje Rikj von onsem Harn un Rada (Heilant) Jesus Christus.

¹²Doawäajen well ekj Sorjen droagen, junt emma aun dise Dinj denkjen to halpen, wan jie dee uk weeten un en de vehaundne Woarheit faust sent.

¹³Oba ekj hool daut fa rajcht, soo lang ekj en disem Zelt (Kjarpa) sie, junt derch denkjen halpen opptowakjen,

¹⁴doa ekj weet, daut et Auflajen von mienem Zelt boolt passieet, aus uk onsa Har Jesus Christus mie weeten jeloten haft.

¹⁵Oba ekj well mie bemieejen, daut jie junt to jieda Tiet no mienem Aufscheet emstaunt sent, junt dise Dinj em Jedajchnis to roopen.

¹⁶Dan wie ha junt de Macht un daut Komen (Wadakomen) von onsem Har Jesus Christus nich bekaunt jemoakt, endäm wie kjenstlich utjedochte Foblen foljden, sonda aus dee doa Uagenzeijen siene harliche Majestät jeworden sent.

¹⁷Dan hee kjrieech von Gott, däm Voda, Iea un Harlichkjeit, aus von de prachtvolle Harlichkjeit eene Stemm aun am utjinkj: «Dit es mien jeleewda Sän, aun däm ekj Wooljefaulen jefungen ha».

¹⁸Un dise Stemm hieed wie vom Himmel utgonen, aus wie met am opp däm heiljen Boajch wieren.

¹⁹Un soo ha wie daut fauste profeetische Wuat, opp daut to achten jie goot doonen, aus opp een Licht, daut aun eenem dunklen Uat schient, bot de Dach aunbrakjt un de Morjenstiern oppjeit en june Hoaten;

²⁰endäm jie dit ieeschtens weeten, daut kjeene profeetische Schreft von ieejne Utlajunk es (ooda sikj selfst utlajcht).

²¹Dan de Profeetie wort niemols derch dän Wellen von Menschen jebrocht, sonda heilje Menschen Gottes räden, jedräwen vom Heiljen Jeist.