Read De Bibel JHF 1. Johanes 2 Bible Online

1. Johanes 2 - De Bibel JHF bible

1. Johanes 2

¹Miene Kjinja, ekj schriew junt dit, doamet jie nich sindjen; un wan wäa jesindicht haft, wie haben eenen Veträda (Biestona, Sachwaulta) bie däm Voda, Jesus Christus, däm Jerajchten.

²Un hee es de Veseenunk (Sindopfa) fa onse Sinden, oba nich fa de onse auleen, sonda uk fa dee gaunze Welt.

³Un doaraun erkjan wie, daut wie am erkjant ha, wan wie siene Jebooten hoolen.

⁴Wäa doa sajcht: Ekj kjan am, un helt nich siene Jebooten, es een Läajna, un en disem es de Woarheit nich.

⁵Oba wäa sien Wuat faust helt, en disem es woarhauft de Leew Gottes vollkomen. Doaraun weet wie, daut wie en am sent.

⁶Wäa doa sajcht, daut hee en am blift, es schuldich, selfst uk soo to waundlen, aus hee jewaundelt haft (es).

⁷Jeleewde, nich een nieet Jeboot schriew ekj junt, sonda een oolet Jeboot, daut jie von Aunfank hauden. Daut oole Jeboot es daut Wuat, daut jie jehieet ha.

⁸Un wada mol schriew ekj junt een nieet Jeboot, daut waut woa es, en am un en junt, wiels de Diestanis vejeit un daut woarhauftje Licht schient aul.

⁹Wäa doa sajcht, daut hee en däm Licht es un haust sienen Brooda, es bot nu enne Diestanis.

¹⁰Wäa sienen Brooda leeft, blift en däm Licht, un kjeen Oajanis (Uasoak toom Aunstoos) es en am.

¹¹Oba wäa sienen Brooda haust, es en de Diestanis un waundelt en de Diestanis un weet nich, wuahan hee jeit, wiels de Diestanis siene Uagen blint jemoakt haft.

¹²Ekj schriew junt, Kjinja, wiels junt de Sinden vejäft sent om sienen Nomen wellen.

¹³Ekj schriew junt, Vodasch, wiels jie dän erkjant ha, dee von Aunfank es. Ekj schriew junt, junge Mana, wiels jie dän Beesen besiejt ha. Ekj schreef junt, Kjinja, wiels jie däm Voda erkjant ha.

¹⁴Ekj ha junt, Vodasch jeschräwen, wiels jie dän erkjant ha, dee von Aunfank es. Ekj ha junt, junge Mana, jeschräwen, wiels jie stoakj sent un daut Wuat Gottes blift en junt un jie dän Beesen besiejt ha.

¹⁵Leeft nich de Welt, noch waut en de Welt es. Wan wäa de Welt leeft, soo es de Leew vom Voda nich en am;

¹⁶dan aules, waut en de Welt es, de Fleescheslost un de Uagenlost un Prolarie met däm Vemäajen (stoltet Läwen), es nich von däm Voda, sonda es von de Welt.

¹⁷Un de Welt vejeit un äare Lost; oba wäa däm Wellen Gottes deit, blift en Eewichkjeit.

¹⁸Kjinja, daut es de latste Stund, un aus jie jehieet ha, daut de Auntikjrist kjemt, soo sent uk nu väl Auntikjriste oppjestonen (jeworden); doahäa weet wie, dautet de latste Stund es.

¹⁹See sent von ons utjegonen, oba see wieren nich von ons; dan wan see von ons jewast wieren, soo wieren see bie ons jebläwen; oba om daut see openboa worden, daut see nich aula von ons sent.

²⁰Un jie ha de Saulwunk von däm Heiljen un weeten aules.

²¹Ekj ha junt nich jeschräwen, wiels jie de Woarheit nich weeten, sonda wiels jie dee weeten, un daut kjeene Läajes ut de Woarheit es.

²²Wäa es de Läajna, wan nich dee, dee doa velicht (vestritt, nich aunerkjant), daut Jesus de Christus es? Disa es de Auntikjrist, dee däm Voda un däm Sän velicht.

²³Jiedra, dee däm Sän velicht, haft uk däm Voda nich; wäa dän Sän bekjant, haft uk däm Voda.

²⁴Jie, waut jie von Aunfank jehieet ha, blift en junt. Wanet en junt blift, waut jie von Aunfank jehieet ha, soo woa uk jie en däm Sän un en däm Voda bliewen.

²⁵Un dit es de Vespräakjunk, dee hee ons vesproaken haft; daut eewje Läwen.

²⁶Dit ha ekj junt betrafs jane (Läajna) jeschräwen, dee junt vefieren.

²⁷Un jie, de Saulwunk, dee jie von am jekjräajen ha, blift en junt, un jie brucken nich, daut junt wäa belieet, sonda aus dee selje Saulwunk junt äwa aules belieet un Woarheit es un kjeene Läajes es, un aus see junt belieet haft, soo woa jie en am bliewen.

²⁸Un nu, Kjinja, blieft en am, doamet wie, wan hee woat jeopenboat woaren, wie Friemootichkjeit ha un nich ver am beschämt woaren bie sienem Aunkomen (Wadakomen).

²⁹Wan jie weeten, daut hee jerajcht es, soo erkjant, daut jiedra, dee de Jerajchtichkjeit deit, ut (von) am jebuaren es.