Read De Bibel JHF 1. Johanes 3 Bible Online

1. Johanes 3 - De Bibel JHF bible

1. Johanes 3

¹Kjikjt, waut fa eene Leew ons de Voda jejäft haft, daut wie Kjinja Gottes heeten sellen! Doawäajen erkjant ons de Welt nich, wiels see (de Welt) am nich erkjant haft.

²Jeleewde, nu sent wie Kjinja Gottes, un daut es noch nich openboa jeworden, waut wie sennen woaren; wie weeten, daut, wan daut woat openboa woaren, {Kol.3,4} wie am jlikj sennen woaren, dan wie woaren am seenen, aus hee es.

³Un jiedra, dee dise Hopninj opp (to) am haft, reinicht sikj selfst, soo aus hee rein es.

⁴Jiedra, dee de Sind deit, deit uk de Jesazloosichkjeit, un de Sind es de Jesazloosichkjeit.

⁵Un jie weeten, daut hee jeopenboat jeworden es, doamet hee onse Sinden wajchnemt; un Sind es nich en am.

⁶Jiedra, dee en am blift, sindicht nich; jiedra, dee sindicht, haft am nich jeseenen noch am erkjant.

⁷Kjinja, daut kjeena junt vefieet! Wäa de Jerajchtichkjeit deit, es jerajcht, soo aus hee jerajcht es.

⁸Wäa de Sind deit, es vom Diewel, dan de Diewel sindicht vom Aunfank. Doatoo es de Sän Gottes jeopenboat worden, om daut hee de Woakjen von däm Diewel venicht (oppleest).

⁹Jiedra, dee ut Gott jebuaren es, deit nich sindjen, dan sien Somen blift en am; un hee kaun nich sindjen, wiels hee ut Gott jebuaren es.

¹⁰Doarenn sent openboa de Kjinja Gottes un de Kjinja vom Diewel. Jiedra, dee nich Jerajchtichkjeit deit, es nich ut Gott, un wäa nich sienen Brooda leeft.

¹¹Dan dit es de Bootschoft, dee jie von Aunfank jehieet ha, daut wie eenaunda leewen sellen;

¹²nich aus Kain ut däm Beesen wia un sienen Brooda ombrocht; un wäajen waut brocht hee am om? Wiels siene Woakjen bees wieren, oba dee (Woakjen) von sienem Brooda jerajcht.

¹³Wundat junt nich, Breeda, wan de Welt junt haust.

¹⁴Wie weeten, daut wie ut däm Doot en daut Läwen äwajegonen sent, wiels wie de Breeda leewen; wäa däm Brooda nich leeft, blift en däm Doot.

¹⁵Jiedra, dee sienen Brooda haust, es een Menschenmerda, un jie weeten, daut kjeen Menschemerda eewjet Läwen en sikj bliewend haft.

¹⁶Doarom ha wie de Leew erkjant, daut hee fa ons sien Läwen enjesat haft; uk wie sent schuldich, fa de Breeda daut Läwen entosaten.

¹⁷Oba wäa dän Läwensunjahault de Welt haft un sitt sienen Brooda Mangel lieden un veschlit sien Hoat ver am, woo blift de Leew Gottes en am?

¹⁸Kjinja, lot ons nich met Wieed leewen, noch met de Tung, sonda enne Dot un Woarheit.

¹⁹Un doaraun woa wie erkjanen, daut wie ut de Woarheit sent, un woaren ver am onse Hoaten berujen (äwazeijen),

²⁰daut, wan ons Hoat ons veuadeelt, Gott jrata es aus ons Hoat un weet aules.

²¹Jeleewde, wan ons Hoat ons nich veuadeelt, soo ha wie Friemootichkjeit (frooem Toogank) to Gott,

²²un waut wie bedden, emfang wie von am, wiels wie siene Jebooten hoolen un daut ver am wooljefaulje doonen.

²³Un dit es sien Jeboot, daut wie aun dän Nomen von sienem Sän Jesus Christus jleewen un eenaunda leewen, soo aus hee ons een Jeboot jejäft haft.

²⁴Un wäa siene Jebooten helt, blift en am, un hee en am; un doaraun erkjan wie, daut hee en ons blift, aun (derch) däm Jeist, däm hee ons jejäft haft.