Read De Bibel JHF 1. Johanes 4 Bible Online

1. Johanes 4 - De Bibel JHF bible

1. Johanes 4

¹Jeleewde, jleeft nich jiedrem Jeist, sonda prooft de Jeista, auf see ut Gott sent; dan väl faulsche Profeeten sent en de Welt utjegonen.

²Doaraun erkjan jie dän Jeist Gottes: Jiedra Jeist, dee Jesus Christus em Fleesch jekomen bekjant, es ut Gott;

³un jiedra Jeist, dee nich Jesus [Christus em Fleesch jekomen] bekjant, es nich ut Gott; un dit es de Jeist vom Auntikjrist, von däm jie jehieet ha, daut hee kjemt, un nu es hee aul enne Welt.

⁴Jie sent ut Gott, Kjinja, un ha dee (de faulsche Profeeten) besiejt, wiels dee, dee en junt es, jrata es aus dee, dee en de Welt es.

⁵See sent ut de Welt, doawäajen räden see ut (däm Jeist) de Welt, un de Welt hieet opp an.

⁶Wie sent ut Gott; wäa Gott kjant, hieet opp ons; wäa nich ut Gott es, hieet nich opp ons. Doaraun erkjan wie däm Jeist de Woarheit un däm Jeist vom Errtum.

⁷Jeleewde, lot ons eenaunda leewen, dan de Leew es ut Gott; un jiedra, dee leeft, es ut Gott jebuaren un erkjant Gott.

⁸Wäa nich leeft, haft Gott nich erkjant, dan Gott es Leew.

⁹Doarenn es de Leew Gottes to ons jeopenboat worden, daut Gott sienen eenjebuarnen Sän en de Welt jeschekjt haft, doamet wie derch am läwen muchten.

¹⁰Doarenn es de Leew; nich daut wie Gott jeleeft ha, sonda daut hee ons jeleeft un sienen Sän jeschekjt haft aus eene Veseenunk fa onse Sinden.

¹¹Jeleewde, wan Gott ons soo jeleeft haft, soo sent uk wie schuldich, eenaunda to leewen.

¹²Kjeena haft Gott jeemols jeseenen. Wan wie eenaunda leewen, soo blift Gott en ons, un siene Leew es vollkomen en ons.

¹³Doaraun erkjan wie, daut wie en am bliewen un hee en ons, daut hee ons von sienem Jeist jejäft haft.

¹⁴Un wie ha jeseenen un bezeijen, daut de Voda dän Sän jeschekjt haft aus Rada (Heilant) de Welt.

¹⁵Wäa bekjant daut Jesus de Sän Gottes es, en däm (am) blift Gott un hee en Gott.

¹⁶Un wie ha erkjant un jejleeft de Leew, dee Gott to ons haft. Gott es Leew, un wäa en de Leew blift, blift en Gott un Gott en am.

¹⁷Doarenn es de Leew bie (met) ons vollkomen jeworden, daut wie Friemootichkjeit (frooet Toovetruen) ha aun däm Dach det Jerechts, daut, soo aus hee es, uk wie sent en dise Welt.

¹⁸Enne Leew es kjeene Angst; sonda de vollkomne Leew drift de Angst rut, dan de Angst haft Pien (met Strof todoonen). Oba wäa sikj enjst, es nich vollkomen en de Leew.

¹⁹Wie leewen, wiels hee ons vom aunfang (aus ieeschta) jeleeft haft.

²⁰Wan wäa sajcht: Ekj leew Gott, un haust sienen Brooda, soo es hee een Läajna. Dan wäa sienen Brooda nich leeft, dän hee jeseenen haft, woo kaun de Gott leewen, däm hee nich jeseenen haft?

²¹Un dit Jeboot ha wie von am, daut, wäa Gott leeft, uk sienen Brooda leeft.