Read De Bibel JHF 1. Johanes 5 Bible Online

1. Johanes 5 - De Bibel JHF bible

1. Johanes 5

¹Jiedra, dee doa jleeft, daut Jesus de Christus es, es ut Gott jebuaren; un jiedra, dee dän leeft, dee jebuaren haft, leeft uk dän, dee ut am jebuaren es.

²Doaraun erkjan wie, daut wie de Kjinja Gottes leewen, wan wie Gott leewen un siene Jebooten hoolen (doonen).

³Dan dit es de Leew Gottes (to Gott), daut wie siene Jebooten hoolen, un siene Jebooten sent nich schwoa.

⁴Dan aules, waut ut Gott jebuaren es, besiejt de Welt; un dit es de Siech, dee de Welt besiejt haft; ons Gloowen.

⁵Wäa es daut, dee de Welt besiejt, wan nich dee, dee doa jleeft, daut Jesus de Sän Gottes es?

⁶Disa es daut, dee jekomen es derch Wota un Bloot, Jesus [dee] Christus; nich derch daut (en däm) Wota auleen, sonda derch daut (en däm) Wota un daut Bloot. Un de Jeist es daut, de doa zeicht, dan de Jeist es de Woarheit.

⁷Dan daut sent 3, dee doa [em Himmel] zeijen: [De Voda, daut Wuat un de Heilja Jeist; un dise 3 sent eent.]

⁸[Un 3 sent, dee oppe Ieed zeijen:] De Jeist un daut Wota un daut Bloot, un dee 3 sent eenstemmich (eene Eenheit).

⁹Wan wie daut Zeichnis de Menschen aunnämen, daut Zeichnis Gottes es jrata; dan dit es daut Zeichnis Gottes, daut hee jezeicht haft äwa sienen Sän.

¹⁰Wäa aun dän Sän Gottes jleeft, haft daut Zeichnis en sikj selfst; wäa Gott nich jleeft, haft am toom Läajna jemoakt, wiels hee nich aun daut Zeichnis jejleeft haft, daut Gott bezeicht haft äwa sienen Sän.

¹¹Un dit es daut Zeichnis; daut Gott ons eewjet Läwen jejäft haft, un dit Läwen es en sienem Sän.

¹²Wäa dän Sän haft, haft daut Läwen; wäa dän Sän Gottes nich haft, haft daut Läwen nich.

¹³Dit ha ekj junt jeschräwen, doamet jie weeten, daut jie eewjet Läwen ha, dee jie jleewen aun dän Nomen vom Sän Gottes.

¹⁴Un dit es daut Toovetruen, daut wie to am ha, daut, wan wie om irjent waut no sienem Wellen bedden, hee ons hieet.

¹⁵Un wan wie weeten, daut hee ons hieet, om waut wie bedden, soo weet wie, daut wie de Bedd ha, dee wie von am jebedd habe.

¹⁶Wan wäa sienen Brooda sindjen sitt, eene Sind nich toom Doot, soo saul (woat) hee bedden, un hee (Gott) woat am daut Läwen jäwen, dän, dee nich toom Doot sindjen. Daut jeft Sinden toom Doot; nich fa dise saj ekj, daut hee bedden saul.

¹⁷Jiedre Ojjerajchtichkjeit es Sind; un daut jeft ne Sind, dee nich toom Doot es.

¹⁸Wie weeten, daut jiedra, dee ut Gott jebuaren es, nich sindicht; sonda dee ut Gott Jebuarna bewoat sikj, un de Beesa taust am nich aun.

¹⁹Wie weeten, daut wie ut Gott sent, un de gaunze Welt licht en däm Beesen.

²⁰Oba wie weeten, daut de Sän Gottes jekomen es un ons een Vestentnis jejäft haft, doamet wie dän Woarhauftjen kjanen; un wie sent en däm Woarhauftjen, en sienem Sän Jesus Christus. Disa es dee woarhauftja Gott un [daut] eewje Läwen.

²¹Kjinja, heet junt fa dän Jetze.