Read De Bibel JHF Rechta 1 Bible Online

Rechta 1 - De Bibel JHF bible

Rechta 1

¹Un daut passieed no Josua sienem Doot, doa befruagen de Kjinja Israel däm Harn un säden: Wäa von ons saul aus Ieeschta jäajen de Kanaanita noppgonen, om jäajen an too kjamfen?

²Un de Har säd: Juda saul noppgonen; ekj ha daut Launt en siene Haunt jejäft.

³Un Juda säd to Simeon, sienem Brooda: Komm met mie nopp en mien Loss, un lot ons jäajen de Kanaanita strieden, soo well uk ekj met die en dien Loss gonen. Un Simeon jinkj met am.

⁴Un Juda jinkj nopp, un de Har jeef de Kanaanita un de Perisita en äare Haunt; un see schluagen an en Besek, 10 000 Maun.

⁵Un see fungen däm Adoni-Besek en Besek un streeden jäajen am; un see schluagen de Kanaanita un de Perisita.

⁶Un Adoni-Besek rand; un see juagen am no un jreepen am un hakte am de Dumes von siene Henj un siene Feet auf.

⁷Doa säd Adoni-Besek: 70 Kjennichs, dän de Dumes von äare Henj un äare Feet aufjehakt wieren, lausen äa Broot unja mienem Desch opp; soo aus ekj jedonen ha, aulsoo haft Gott mie vejelt. Un see brochten am no Jerusalem, un hee storf doa selfst.

⁸Un de Kjinja Juda streeden jäajen Jerusalem un naumen daut en un schluagen daut met däm schoapen Schwieet, un de Staut stekjten see en Braunt.

⁹Un nodäm jinjen de Kjinja Juda rauf, om jäajen de Kanaanita too strieden, dee de Boaj un däm Sieden un de Läacht bewonde.

¹⁰Un Juda jinkj jäajen de Kanaanita, dee en Hebron wonden; oba de Nomen von Hebron wia verhäa Kirjat-Arba; un see schluagen Scheschai un Achiman un Talmai.

¹¹Un hee jinkj von doa jäajen de Bewona von Debir; oba de Nomen von Debir wia ver däm Kirjat-Sefer.

¹²Un Kaleb säd: Wäa Kirjat-Sefer schleit un daut ennemt, däm jäw ekj miene Dochta Aksa to Fru.

¹³Doa neem daut Othniel en, de Sän von Kenas, de jinjra Brooda von Kaleb; un hee jeef am siene Dochta Aksa to Fru.

¹⁴Un daut passieed, aus see no am kaum, doa beräd see am, een Aka von äarem Voda too fodren. Un see sprunk vom Äsel rauf. Doa säd Kaleb to ar: Waut hast du?

¹⁵Un see säd: Jeff mie eenen Säajen; dan een Meddachslaunt hast du mie jejäft, soo jeff mie uk Wotakjwalen! Doa jeef ar Kaleb de bowaschten Kjwalen un de unjaschte Kjwalen.

¹⁶Un de Kjinja von Kenita, von Moses sienem Schwiavoda, wieren met de Kjinja Juda ut de Paulmstaut noppjegonen enne Wieste Juda, dee em Sieden von Arad licht; un see jinjen han un wonden biem Volkj.

¹⁷Un Juda jinkj met sienem Brooda Simeon han, un see schluagen de Kanaanita, dee Zefat bewonde; un see vebaunten dee un jäwen de Staut däm Nomen Horma.

¹⁸Un Juda naum Gasa en un siene Jäajent, un Askalon un siene Jäajent, un Ekron un siene Jäajent.

¹⁹Un de Har wia met Juda, un hee neem de Boaj en; dan de Bewona de Läacht juach hee nich rut, wiels see iesane Woages hauden.

²⁰Un see jäwen däm Kaleb Hebron, soo aus Moses jesajcht haud; un hee vejuag de dree Säns von Enak.

²¹Oba de Kjinja Benjamin juagen de Jebusita, de Bewona von Jerusalem, nich rut; un de Jebusita ha bie de Kjinja Benjamin en Jerusalem bat opp disem Dach jewont.

²²Un daut Hus Josef, uk see jinjen no Betel nopp, un de Har wia met an.

²³Un daut Hus Josef leet Betel utforschen; oba ver däm wia de Nomen de Staut Lus.

²⁴Un de Wajchta sagen eenen Maun ut de Staut rutgonen, un see säden to am: Wies ons doch däm Engank enne Staut, soo woa wie Goodet aun die doonen.

²⁵Un hee wees an däm Engank enne Staut. Un see schluagen de Staut met däm schoapen Schwieet, oba däm Maun un sienem gaunzen Jeschlajcht leeten see gonen.

²⁶Un de Maun jinkj en daut Launt de Hetita; un hee bud eene Staut un jeef ar däm Nomen Lus. Daut es äa Nomen bat opp disem Dach.

²⁷Oba Manasse vejuag Bat-Schean un siene Darpa nich, un Taanak un siene Darpa, un de Bewona von Dor un siene Darpa, un de Bewona von Jibleam un siene Darpa, un de Bewona von Megiddo un siene Darpa; un de Kanaanita wullen en disem Launt bliewen.

²⁸Un daut passieed aus Israel stoakj wort, doa muaken see de Kanaanita aus Deenstoabeida; oba see vejuagen an nich.

²⁹Un Efraim juach de Kanaanita nich rut, dee en Geser wonden; un de Kanaanita wonden en äare Medd en Geser.

³⁰Sebulon juach de Bewona von Kitron un de Bewona von Nahalol nich rut; un de Kanaanita wonden en äare Medd un worden Deenstoabeida.

³¹Aser juach de Bewona von Akko un de Bewona von Sidon un Achlab un Aksib un Helba un Afik un Rechob nich rut;

³²un de Aserita wonden enne Medd de Kanaanita, de Bewona vom Launt, dan see juagen an nich rut.

³³Naftali juach de Bewona von Bat-Semes un de Bewona von Bat-Anat nich rut; sonda wonden unja de Kanaanita, de Bewona vom Launt; oba de Bewona von Bat-Semes un von Bat-Anat worden äare Deenstoabeida.

³⁴Un de Amorita drenjden de Kjinja Dan enne Boaj, dan see leeten an nich, enne Läacht raufkomen.

³⁵Un de Amorita wullen enne Boaj Heres bliewen, en Ajjalon un en Schaalbim; oba Josef siene Haunt wia schwoa, un see worden Deenstoabeida.

³⁶Un de Jrens de Amorita wia von de Aunboaj Akrabbim, von däm Fels nom Nuaden.