Read De Bibel JHF Rechta 10 Bible Online

Rechta 10 - De Bibel JHF bible

Rechta 10

¹Un no Abimelech stunt Tola opp, om Israel to raden, Pua sien Sän, von Dodo sienem Sän, een Maun von Isachar; un hee wond en Schamir enne Boaj Efraim.

²Un hee recht Israel 23 Joa; un hee storf un wort en Schamir begroft.

³Un no am stunt Jair, de Gileadita, opp; un hee recht Israel 22 Joa.

⁴Un hee haud 30 Säns, dee opp 30 Äsel reeden, un see hauden 30 Städa; dise nant maun bat opp disem Dach de Darpa Jair, dee em Launt Gilead sent.

⁵Un Jair storf un wort en Kamon begroft.

⁶Un de Kjinja Israel deeden wada, waut bees enne Uagen Gottes wia, un see deenden de Baalim un de Astarot un de Jetta Sierien un de Jetta Sidon un de Jetta Moab un de Jetta Amon un de Jetta de Filista; un see veleeten däm Harn un deenden am nich.

⁷Doa flaumd de Oaja Gottes jäajen Israel opp, un hee vekoft an enne Haunt de Filista un enne Haunt de Kjinja Amon.

⁸Un see bedrekjte un ploagden de Kjinja Israel aun janem Joa; achtieen Joa bedrekjte see aule Kjinja Israel, dee aun jane Sied vom Jordan wieren em Launt de Amorita, daut en Gilead es.

⁹Un de Kjinja Amon jinjen äwa däm Jordan, om jäajen Juda un jäajen Benjamin un jäajen Efraim too strieden; un Israel wort sea bedrenjt.

¹⁰Doa schrieejen de Kjinja Israel to däm Harn un säden: Wie ha jäajen die jesindicht, dan wie ha onsem Gott veloten un däm Baal jedeent.

¹¹Un de Har säd to de Kjinja Israel: Ha ekj junt nich von de Ägipta un von de Amorita, von de Kjinja Amon un von de Filista jerat?

¹²Un aus de Sidonia un Amalekita un Maonita junt bedrekjte, un jie to mie schrieejen, rad ekj junt ut äare Haunt?

¹³Oba jie ha mie veloten un ha aundre Jetta jedeent; doarom woa ekj junt nich mea raden.

¹⁴Got han un schriet to de Jetta, dee jie erwält ha: See muchten junt raden too Tiet de Bedrenkjnis!

¹⁵Un de Kjinja Israel säden to däm Harn: Wie ha jesindicht. Doo du ons no aulem, waut goot en diene Uagen es; blooss rad ons aun disem Dach!

¹⁶Un see deeden de framde Jetta ut äare Medd wajch un deenden däm Harn; un siene Seel wort onjeduldich äwa de Ploag Israels.

¹⁷Un de Kjinja Amon vesaumelden sikj un loagaden sikj en Gilead; un de Kjinja Israel kaumen toop un loagaden sikj en Mizpa.

¹⁸Doa säd daut Volkj, de Bowaschte von Gilead, eena toom aundren: Wäa es dee Maun, dee aunfangen woat, jäajen de Kjinja Amon too strieden? Hee saul aule Bewona von Gilead toom Haupt sennen.