Read De Bibel JHF Rechta 11 Bible Online

Rechta 11 - De Bibel JHF bible

Rechta 11

¹Un Jefta, de Gileadita, wia een browa Held; oba hee wia de Sän von eene Hua, un Gilead haud Jefta jebuaren.

²Un uk Gilead siene Fru jebua am Säns; un aus de Säns von de Fru groot worden, doa juagen see Jefta un säden to am: Du saust nich en onsem Vodahus oawen, dan du best een Sän von eene aundre Fru.

³Un Jefta rand von siene Breeda wajch un wond em Launt Tob. Un daut saumelden sikj no Jefta leichtsennje Mana un jinjen met am ut.

⁴Un daut passieed no eene Tiet, doa streeden de Kjinja Amon met Israel.

⁵Un daut passieed, aus de Kjinja Amon met Israel streeden, doa jinjen de Eltestasch von Gilead han, om Jefta ut däm Launt Tob to holen.

⁶Un see säden to Jefta: Komm un sie ons Aunfiera, daut wie jäajen de Kjinja Amon strieden!

⁷Un Jefta säd to de Eltestasch von Gilead: Sent nich jie daut, dee mie jehaust un mie ut mienem Vodahus vestat ha? Un wuarom kom jie nu no mie, doa jie en Bedrenkjnis sent?

⁸Un de Eltestasch von Gilead säden to Jefta: Doarom sent wie nu no die trigjjekomen, daut du met ons jeist un jäajen de Kjinja Amon kjamfst; un du saust toom Haupt sennen, fa aule Bewona von Gilead.

⁹Un Jefta säd to de Eltestasch von Gilead: Wan jie mie trigjholen, om jäajen de Kjinja Amon too strieden, un de Har an ver mie doahan jeft, woa ekj junt dan werkjlich toom Haupt sennen?

¹⁰Un de Eltestasch von Gilead säden to Jefta: De Har es Zeij tweschen ons, wan wie nich aulsoo doonen, aus du jerät hast!

¹¹Doa jinkj Jefta met de Eltestasch von Gilead, un daut Volkj sad am toom Haupt un toom Aunfiera äwa sikj. Un Jefta räd aul siene Wieed ver däm Harn en Mizpa.

¹²Un Jefta schekjt Booten aun däm Kjennich äwa de Kjinja Amon un leet am sajen: Waut ha wie metenaunda too schaufen, daut du jäajen mie jekomen best, jäajen mien Launt too strieden?

¹³Un de Kjennich äwa de Kjinja Amon säd to Jefta siene Booten: Wiels Israel mien Launt jenomen haft, aus daut ut Ägipten noppjinkj, vom Arnon bat aun däm Jabbok un bat aun däm Jordan; un nu jeef de Lenda en Fräd trigj.

¹⁴Doa schekjt Jefta nochmol Booten nom Kjennich äwa de Kjinja Amon,

¹⁵un leet am sajen: Soo sajcht Jefta: Israel haft nich daut Launt Moab un daut Launt de Kjinja Amon jenomen;

¹⁶sonda aus see ut Ägipten noppjinjen, doa jinkj Israel derch de Wieste bat nom Schelpmäa, un daut kaum no Kades;

¹⁷un Israel schekjt Booten aun däm Kjennich von Edom un leet am sajen: Lot mie doch derch dien Launt gonen! Oba de Kjennich von Edom hieed an nich. Un uk aun däm Kjennich von Moab schekjten see; oba hee wull nich. Soo bleef Israel en Kades.

¹⁸Un daut Volkj jinkj derch de Wieste un ommjinkj daut Launt Edom un daut Launt Moab un kaum vom Sonnenoppgank aun daut Launt Moab; un see loagaden sikj aun jane Sied vom Arnon un kaumen nich en daut Launt Moab, dan de Arnon es de Jrens Moab.

¹⁹Un Israel schekjt Booten aun Sihon, däm Kjennich äwa de Amorita, däm Kjennich von Hesbon, un Israel leet am sajen: Lot ons doch derch dien Launt gonen bat aun mienem Uat!

²⁰Oba Sihon vetrud Israel nich, daut derch sien Launt gonen to loten; un Sihon vesaumeld aul sien Volkj, un see loagaden sikj bie Jahza; un hee street jäajen Israel.

²¹Un de Har, de Gott Israels, jeef Sihon un aul sien Volkj enne Haunt Israels, un see schluagen an. Soo naum Israel daut gaunze Launt de Amorita, dee en janem Launt wonden, en;

²²see naumen daut gaunze Launt de Amorita en, vom Arnon bat aun däm Jabbok, un vonne Wieste bat aum Jordan.

²³Un soo haft nu de Har, de Gott Israels, de Amorita ver sienem Volkj Israel vejoacht, un du west ons rutjoagen?

²⁴Nämst du nich daut en, waut Kamos, dien Gott, die aus Ieejentum jeft? Soo uk aules, waut de Har, ons Gott, ver ons rutjejoacht haft, daut well wie nämen.

²⁵Un nu, best du bäta aus Balak, Zippor sien Sän, de Kjennich von Moab? Haft hee je met Israel jesträden, ooda jekjamft?

²⁶Aus Israel en Hesbon wond un en siene Darpa, un en Aroer un en siene Darpa, un en aul de Städa, dee aum Arnon sent, 300 Joa lank; wuarom ha jie dee dan aun jane Tiet nich enjenomen?

²⁷Un nich ekj ha jäajen die jesindicht, sonda du deist iebel aun mie, jäajen mie too strieden. De Har, de Rechta, recht vondoag tweschen de Kjinja Israel un de Kjinja Amon!

²⁸Oba de Kjennich äwa de Kjinja Amon hieed nich opp Jefta siene Wieed, dee hee am sajen leet.

²⁹Doa kaum de Jeist Gottes äwa Jefta; un hee jinkj derch Gilead un Manasse, un jinkj no Mizpa en Gilead, un von Mizpa en Gilead jinkj hee jäajen de Kjinja Amon.

³⁰Un Jefta jeef däm Harn een Vespräakjen un säd: Wan du de Kjinja Amon werkjlich en miene Haunt jefst,

³¹soo saul daut, waut ut de Däa von mienem Hus rutjeit, mie entjäajen, wan ekj en Fräd von de Kjinja Amon trigj kom, daut saul däm Harn jehieren, un ekj woa daut aus Brauntopfa opfren!

³²Un soo jinkj Jefta jäajen de Kjinja Amon, om jäajen an too strieden; un de Har jeef an en siene Haunt.

³³Un hee schluach an von Aroer aun, bat maun no Minnit kaum, 20 Städa, un bat no Abel-Keramim, un hee recht eene sea groote Schlacht unja an aun; un de Kjinja Amon worden vonne Kjinja Israel jedeemooticht.

³⁴Un aus Jefta no Mizpa, no sienem Hus kaum, kjikj, doa kaum siene Dochta rut, am entjäajen, met Pauke un Reijen; un see wia de eensje; buta ar haud hee nich Sän noch Dochta.

³⁵Un daut passieed, aus hee ar sach, doa vereet hee siene Kjleeda un säd: Ach, miene Dochta! Du bichst mie deep dol; un du, du best unja dän, dee mie en Triebsaul brinjt! Dan ekj ha mien Mul däm Harn jäajenäwa opjemoakt un kaun nich trigjgonen!

³⁶Un see säd to am: Mien Voda, hast du dien Mul jäajen däm Harn opjemoakt, soo doo mie, aus daut ut dienem Mul utjegonen es, nodäm de Har die Rach veschauft haft aun diene Fiend, de Kjinja Amon.

³⁷Un see säd to äarem Voda: Daut passieet mie dise Sach: Lot twee Moonat von mie auf, daut ekj hango un oppe Boaj go un äwa miene Jungfruschoft hiel, ekj un miene Frindine.

³⁸Un hee säd: Go han. Un leet ar twee Moonat gonen. Un see jinkj han, see un äare Frindine, un hilden oppe Boaj äwa äare Jungfruschoft.

³⁹Un daut passieed aum Enj von twee Moonat, doa kaum see trigj no äarem Voda. Un hee deed ar, aus hee vesproaken haud. Oba see haud kjeenem Maun erkjant. Un daut wort toom Jebruck en Israel:

⁴⁰Von Joa too Joa gonen de Dajchta Israels han, om Jefta siene Dochta, däm Gileadita, 4 Doag em Joa too besinjen.