Read De Bibel JHF Rechta 13 Bible Online

Rechta 13 - De Bibel JHF bible

Rechta 13

¹Un de Kjinja Israel deeden wada waut enne Uagen Gottes bees wia; un de Har jeef an 40 Joa enne Haunt de Filista.

²Un daut wia een Maun ut Zorha, vom Jeschlajcht Dan, sien Nomen wia Manoach . Un siene Fru wia onfruchtboa un kunn nich jebäaren.

³Un de Enjel Gottes erschien de Fru un säd to ar: Kjikj doch, du best onfruchtboa un jebäascht nich; oba du woascht schwanga woaren un eenen Sän jebäaren.

⁴Un nu heed die doch un drinkj kjeen Wien noch stoakjet Jedrenkj, un at nuscht Orreinet!

⁵Dan kjikj, du woascht schwanga woaren un eenen Sän jebäaren; un kjeen Schäamassa saul opp sienem Haupt komen, dan een Nazara (Gott jeweida) Gottes saul de Jung sennen vom Muttalief aun; un hee woat aunfangen, Israel ut de Haunt de Filista to raden.

⁶Un de Fru kaum un räd too äarem Maun un säd: Een Maun Gottes es no mie jekomen, un sien Aunjesecht wia aus een Aunjesecht von eenem Enjel Gottes, sea schrakjlich; un ekj ha am nich jefroacht, wuahäa hee es, un sienen Nomen haft hee mie nich toweeten loten.

⁷Un hee säd to mie: Kjikj, du woascht schwanga woaren un eenen Sän jebäaren; un nu, drinkj kjeen Wien noch stoakjet Jedrenkj, un at nuscht Orreinet; dan een Nazara Gottes saul de Jung sennen vom Muttalief aun bat sienem Doodesdach.

⁸Doa bäd Manoach to däm Harn un säd: Ach, Har! De Maun Gottes, däm du jeschekjt hast, mucht doch nochmol no ons komen un ons lieren, waut wie doonen sellen met däm Jung, dee jebuaren woaren saul.

⁹Un Gott erhieed Manoach siene Stemm; un de Enjel Gottes kaum nochmol no de Fru, aus see oppem Flekj saut, un Manoach, äa Maun, nich bie ar wia.

¹⁰Doa spood sikj de Fru un rand un berecht daut äarem Maun, un see säd to am: Kjikj, de Maun es mie erschienen, dee aun janem Dach no mie kaum.

¹¹Un Manoach muak sikj opp un jinkj siene Fru hinjaraun; un hee kaum nodäm Maun un säd to am: Best du de Maun, dee to de Fru jerät haft? Un hee säd: Ekj sie et.

¹²Un Manoach säd: Wan nu dien Wuat enntraft, waut saul däm Jung sien Rajcht sennen un sien Doonen?

¹³Un de Enjel Gottes säd to Manoach: Ver aulem, waut ekj de Fru jesajcht ha, saul see sikj heeden;

¹⁴von aulem, waut vom Wienstock kjemt, saul see nich äten, un Wien un stoakjet Jedrenkj saul see nich drinkjen, un saul nuscht Orreinet äten; aules, waut ekj ar befoolen ha, saul see hoolen.

¹⁵Un Manoach säd toom Enjel Gottes: Lot die doch von ons opphoolen, soo well wie die een Kosenbockje reedmoaken.

¹⁶Un de Enjel Gottes säd to Manoach: Wan du mie uk opphelst, ekj wudd nich von dienem Broot äten; oba west du een Brauntopfa opfren, soo opfa daut däm Harn. Dan Manoach wist nich, daut et de Enjel Gottes wia.

¹⁷Un Manoach säd toom Enjel Gottes: Woo es dien Nomen, daut wie die ieren, wan dien Wuat enntraft?

¹⁸Un de Enjel Gottes säd to am: Wuarom frajchst du dan no mienem Nomen? Jo, hee es wundaboa!

¹⁹Doa naum Manoach daut Kosenbockje un daut Speisopfa un opfad daut däm Harn oppem Steen. Un hee haundeld wundaboa, un Manoach un siene Fru sagen daut;

²⁰un daut passieed, aus de Flaum vom Aultoa nom Himmel stieech, doa foa de Enjel Gottes enne Flaum vom Aultoa nopp. Un Manoach un siene Fru kjikjten too un follen opp äa Aunjesecht oppe Ieed.

²¹Un de Enjel Gottes erschien Manoach un siene Fru wiedahan nich mea. Doa erkjand Manoach, daut et de Enjel Gottes wia.

²²Un Manoach säd to siene Fru: Wie woaren jewess stoawen, dan wie ha Gott jeseenen!

²³Oba siene Fru säd to am: Wan däm Harn daut jefollen haft, ons omtobrinjen, soo haud hee nich een Brauntopfa un Speisopfa ut onse Haunt aunjenomen, un hee haud ons dit aules nich jewäsen, noch ons too dise Tiet soowaut hieren loten.

²⁴Un de Fru jebua eenen Sän; un see jeef am däm Nomen Simson. Un de Jung woss, un de Har säajend am.

²⁵Un de Jeist Gottes funk aun, am to driewen nom Loaga-Dan tweschen Zorha un Eschtaol.