Read De Bibel JHF Rechta 14 Bible Online

Rechta 14 - De Bibel JHF bible

Rechta 14

¹Un Simson jinkj rauf no Timna; un hee sach en Timna eene Fru von de Dajchta de Filista.

²Un hee jinkj nopp un berecht daut sienem Voda un siene Mutta un säd: Ekj ha en Timna eene Fru vonne Dajchta de Filista jeseenen; un nu nämt mie ar to Fru.

³Un sien Voda un siene Mutta säden to am: Es unja de Dajchta von diene Breeda un mank mien gaunzen Volkj kjeene Fru, daut du hanjeist, eene Fru von de Filista too nämen, de Onbeschnädne? Un Simson säd to sienem Voda: Dise nämt mie, dan see es rajcht en miene Uagen.

⁴Oba sien Voda un siene Mutta wisten nich, daut dit von däm Harn wia; dan hee socht eene Jeläajenheit aun de Filista. Un aun jane Tiet harschte de Filista äwa Israel.

⁵Un Simson jinkj met sienem Voda un siene Mutta rauf no Timna; un aus see no de Wienboaj von Timna kaumen, kjikj, doa kaum een brellenda junga Leiw am entjäajen.

⁶Un de Jeist Gottes kaum äwa am, un hee vereet am, aus maun een Bockje veritt; un hee haud nuscht en siene Haunt. Un hee säd sienem Voda un siene Mutta nuscht, waut hee jedonen haud.

⁷Un hee jinkj rauf un räd to de Fru, un en Simson siene Uagen wia see rajcht.

⁸Un hee jinkj no eenje Doag trigj, om ar too nämen, un hee buag auf, om daut Os vom Leiw too beseenen, un kjikj, een Bieeschwoarm wia em Leiwskopp, un Honnich.

⁹Doa naum hee doavon rut en siene Henj, un jinkj un aut biem Gonen; un hee jinkj no sienem Voda un siene Mutta un jeef an, un see auten; oba hee säd an nich, daut hee däm Honnich ut däm Leiwskopp rutjenomen haud.

¹⁰Un sien Voda jinkj rauf no de Fru, un Simson muak doa selfst een Mol; dan soo deeden daut de Jinjlinje.

¹¹Un daut passieed, aus see am sagen, doa naumen see 30 junge Mana; un see wieren bie am.

¹²Un Simson säd to an: Ekj well junt eenmol een Rotsel oppjäwen; wan jie mie daut en dise 7 Kjastinjsdoag toweeten loten un daut roden, soo woa ekj junt 30 Hamden un 30 Wakjselkjleeda jäwen;

¹³oba wan jie mie daut nich toweeten loten kjennen, soo sell jie mie 30 Hamden un 30 Wakjselkjleeda jäwen: Jeff dien Rotsel opp, daut wie daut hieren!

¹⁴Un hee säd to an: Ut däm Fräta kaum Äten, un ut däm Stoakjen kaum Seetichkjeit. Un see kunnen daut Rotsel dree Doag lank nich roden.

¹⁵Un daut passieed aum säwenden Dach, doa säden see too Simson siene Fru: Beräd dienem Maun, daut hee ons daut Rotsel verod, doamet wie nich die un dien Vodahus met Fia vebrennen! Om ons too beroowen, ha jie ons enjeloden, nich woa?

¹⁶Un Simson siene Fru hield ver am un säd: Du haust mie un leefst mie nich. Daut Rotsel hast du de Kjinja von mienem Volkj oppjejäft, un mie hast du daut nich verod. Un hee säd to ar: Kjikj, mienem Voda un miene Mutta ha ekj daut nich jesajcht, un die sull ekj daut sajen?

¹⁷Un see hield säwen Doag ver am, doa see daut Mol hauden. Un daut passieed aum säwenden Dach, doa säd hee ar daut, dan see drenjd am. Un see säd daut Rotsel de Kjinja von äarem Volkj.

¹⁸Doa säden de Mana de Staut to am aum säwenden Dach, ea de Sonn unjajinkj: Waut es seeta aus Honnich? Un waut es stoakja aus de Leiw? Un hee säd to an: Wan jie nich met mienem Kaulf jeplieecht hauden, soo haud jie mien Rotsel nich jerod.

¹⁹Un de Jeist Gottes kaum äwa am; un hee jinkj rauf no Askalon un schluach von an 30 Mana un neem äare Kjleeda un jeef de Wakjselkjleeda dän, dee daut Rotsel jerod hauden. Un sien Oaja flaumd opp, un hee jinkj nopp no sienem Vodahus.

²⁰Un Simson siene Fru wort eenem de junge Mana jejäft, däm hee sikj aunvetrut haud.