Read De Bibel JHF Rechta 15 Bible Online

Rechta 15 - De Bibel JHF bible

Rechta 15

¹Un no eenje Tiet passieed daut, en de Doag de Weitarnt, doa besocht Simson siene Fru met eenem Kosenbockje. Un hee säd: Ekj well no miene Fru enne Schlopstow gonen; oba äa Voda leet am nich nengonen.

²Un äa Voda säd: Ekj ha jewess jedocht, daut du ar haust, un soo ha ekj ar dienem Frint jejäft. Es nich äare junjste Sesta bäta aus see? Mucht see doch diene woaren aun äare Städ.

³Doa säd Simson to an: Ditmol sie ekj schultloos aun de Filista, wan ekj an Iebel doo.

⁴Un Simson jinkj han un jreep 300 Fass un bung Zoagel aun Zoagel un doa tweschen eenen Fiastock, tweschen 2 Zäajel,

⁵un hee stekjt de Fiastakja met Fia aun. Un hee leet de loos en daut Jeträajd de Filista un stekjt soo aus Goawen aus stonendet Jeträajd un Eeljboom Goades aun.

⁶Un dee Filista säden: Wäa haft daut jedonen? Un maun säd: Simson, däm Timnita siene Dochta äa Maun, wiels hee am siene Fru jenomen un ar eenem aundren jejäft haft. Doa jinjen de Filista nopp un vebrenden ar un äarem Voda met Fia.

⁷Un Simson säd to an: Wan jie aulsoo doonen, daut es dan, daut ekj aun an Rach jeeeft ha, nodäm well ekj opphiere!

⁸Un hee schluach an, Schinkje met Hoft, un recht eene groote Schlacht unja an aun. Un hee jinkj rauf un wond enne Boajkluft Etam.

⁹Un de Filista jinjen nopp un loagaden sikj en Juda un breeden sikj ut en Lechi.

¹⁰Un de Mana von Juda säden: Wuarom sent jie jäajen ons noppjekomen? Un see säden: Om Simson too binjen, sent wie noppjekomen, daut wie am doonen aus hee ons jedonen haft.

¹¹Doa jinjen 3000 Maun von Juda no de Boajkluft Etam rauf un säden to Simson: Weetst du nich, daut de Filista äwa ons harschen? Un wuarom hast du ons daut jedonen? Un hee säd to an: Aus see mie jedonen, aulsoo ha ekj an jedonen.

¹²Doa säden see to am: Om die too binjen, sent wie raufjekomen, daut wie die enne Henj de Filista jäwen. Un Simson säd to an: Schwiet mie, daut jie nich äwa mie häafaule woaren!

¹³Un see räden to am un säden: Ne, sonda binjen well wie die, un die, en äare Henj jäwen; oba dootmoaken well wie die nich. Un see bungen am met 2 niee Strenj un fieeden am ut de Kluft nopp.

¹⁴Aus hee no Lechi kaum, doa juchte am de Filista entjäajen; oba de Jeist Gottes kaum äwa am, un de Strenj, dee aun siene Oarms wieren, worden aus Twäarem, dee vom Fia vebrent sent, un siene Faslen follen von siene Henj auf.

¹⁵Un hee funk eene fresche Äselkjenn, un hee strakjt siene Haunt ut un naum dee un schluach doamet 1000 Maun doot.

¹⁶Un Simson säd: Met de Äselkjenn eenen Hupe, 2 Hupes! Met de Äselkjenn ha ekj 1000 Maun jeschloagen!

¹⁷Un daut passieed, aus hee utjeräd haud, doa schmeet hee däm Kjennknoaken ut siene Haunt; un hee nand däm Uat Ramat-Lechi.

¹⁸Un am darscht sea, un hee roopt nodäm Harn un säd: Du hast derch dienem Kjnajcht siene Haunt dise groote Radinj jejäft, un nu saul ekj fa Darscht stoawen un enne Haunt de Onbeschnädne faulen!

¹⁹Doa spoold Gott de Hollinj, dee en Lechi es, un daut kaum Wota rut; un hee drunk, un sien Jeist kaum trigj, un hee läwd wada opp. Doarom jeef maun ar däm Nomen: Kjwal vom Roopenden, dee en Lechi es, bat opp disem Dach.

²⁰Un hee recht Israel 20 Joa enne Doag de Filista.