Read De Bibel JHF Rechta 16 Bible Online

Rechta 16 - De Bibel JHF bible

Rechta 16

¹Un Simson jinkj no Gasa, un hee sach doa eene Hua un jinkj no ar en.

²Un daut wort de Gazita jesajcht: Simson es hiahäa jekomen. Un see omstalden am un luaden de gaunze Nacht opp am em Stautdooa; un see vehilden sikj stell de gaunze Nacht un säden: Bat et Zemorjes dach woat, dan well wie am ombrinjen.

³Un Simson lach bat medden enne Nacht. Oba medden enne Nacht stunt hee opp un neem de Däaren vom Stautdooa met de beid Past, un reet de met de Rijel rut un läd dee opp siene Schulren; un hee druach de oppe Boajchspetz, dee jäajen Hebron es.

⁴Un nodäm passieed daut, doa leewd hee eene Fru em Tol Sorek, äa Nomen wia Delila.

⁵Un de Ferschten de Filista jinjen no ar enopp un säden to ar: Beräd am un kjikj, en waut siene groote Krauft besteit, un wuaderch wie am äwawaultjen kjennen, daut wie am binjen, om am to bedwinje; un wie wellen die een jiedra 1100 Schekel Selwa jäwen.

⁶Doa säd Delila too Simson: Verod mie doch, en waut diene groote Krauft besteit, un met waut du jebungen worden kaust, daut maun die bedwinjt.

⁷Un Simson säd to ar: Wan maun mie met 7 fresche Strenj binjt, dee nich utjedrieecht sent, soo wudd ekj schwak woaren un wudd aus een aundra Mensch sennen.

⁸Un de Ferschten de Filista brochten 7 fresche Strenj, dee nich utjedrieecht wieren, no ar nopp; un see bungen am doamet.

⁹Oba bie ar enne Stow sauten Oppaussa; un dee säden to am: Filista äwa die, Simson! Doa vereet hee de Strenj, aus een Baunt veritt, wan daut Fia jerikjt haft; un siene Krauft wort nich bekaunt.

¹⁰Doa säd Delila too Simson: Kjikj, du hast mie jeteischt un Läajes to mie jerät. Nu verod mie doch, met waut maun die binjen kaun!

¹¹Un hee säd to ar: Wan maun mie met niee Strenj binjt, met dee kjeene Oabeit jedonen worden es, soo wudd ekj schwak woaren un wudd aus een aundra Mensch sennen.

¹²Doa neem Delila niee Strenj un bung am doamet, un see säd to am: Filista äwa die, Simson! Oba bie ar enne Stow sauten Oppaussa. Un hee reet dee von siene Oarms aus een Riedrot.

¹³Doa säd Delila too Simson: Bat nu hast du mie jeteischt un Läajes to mie jerät. Saj mie doch, met waut maun die binjen kaun! Un hee säd to ar: Wan du de 7 Zapp opp mienem Haupt met Benja toopflajchst, un noagel dee met Näajel aum Wäwstool.

¹⁴Un see noagelde dee met Näajel aun un säden to am: Filista äwa die, Simson! Doa wakjt hee opp von sienem Schlop un reet däm Wäwnoagel un daut Jewäw rut.

¹⁵Doa säd see to am: Woo kaust du sajen: Ekj sie die goot, soo doch dien Hoat nich met mie es? Dree Mol hast du mie jeteischt un mie nich veroden, en waut diene groote Krauft es.

¹⁶Un daut passieed, aus see am jieda Dach met äare Wieed drenjd un am ploagd, doa wort siene Seel onjeduldich, toom stoawen meed;

¹⁷un hee deed ar sien gaunzet Hoat op un säd to ar: Kjeen Schäamassa es opp mienem Haupt jekomen, dan ekj sie een Nazara Gottes vom Muttalief aun; wan ekj wudd jeschoaren woaren, soo wudd miene Krauft von mie gonen, un ekj wudd schwak woaren un wudd aus aule Menschen sennen.

¹⁸Un aus Delila sach, daut hee ar sien gaunzet Hoat opjemoakt haud, doa schekjt see han un roopt de Ferschten de Filista un säd: Komt ditmol rauf, dan hee haft mie sien gaunzet Hoat opjemoakt. Un de Ferschten de Filista kaumen no ar rauf un brochten daut Jelt met sikj.

¹⁹Un see leet am opp äare Kjnee enschlopen, un roopt eenen Maun un leet de 7 Zapp von sienem Haupt aufschnieden; un see funk aun, am to dwinjen, un siene Krauft jinkj von am wajch.

²⁰Un see säd: Filista äwa die, Simson! Doa wakjt hee opp von sienem Schlop un docht: Ekj woa doavon komen aus de aundre Mol un mie friemoaken. Oba hee wist nich, daut de Har von am jegonen wia.

²¹Un de Filista jreepen am un stuaken am de Uagen ut; un see fieeden am rauf no Gasa un bungen am met 2 Koppane Faslen, un hee must em Jefenkjnis molen.

²²Oba daut Hoa opp sienem Haupt funk wada aun too waussen, nodäm hee jeschoaren wia.

²³Un de Ferschten de Filista vesaumelden sikj, om äarem Gott Dagon een grootet Schlachtopfa too opfren un om sikj too freien; dan see säden: Ons Gott haft Simson, onsem Fiend, en onse Haunt jejäft.

²⁴Un aus daut Volkj am sach, loowde see äarem Gott; dan see säden: Ons Gott haft onsen Fiend en onse Haunt jejäft, un dee ons Launt vedorw un väle von ons ombrocht.

²⁵Un daut passieed, aus äa Hoat froo wia, doa säden see: Roopt Simson, daut hee ver ons spält. Un see roopten Simson ut däm Jefenkjnis, un hee späld ver an; un see stalden am tweschen de Stendasch.

²⁶Un Simson säd to däm Jung, dee am aune Haunt hild: Lot mie, daut ekj de Stendasch aunfoot, opp dee daut Hus steit, un mie aun an länen kaun.

²⁷Oba daut Hus wia voll Mana un Frues, un aule Ferschten wieren doa; un oppem Dak wieren bie 3 000 Mana un Frues, dee doa tookjikjten, woo Simson späld.

²⁸Un Simson roopt däm Harn aun un säd: Har! Jedenkj doch aun mie, un jeff mie doch ditmol Krauft, oo Gott, daut ekj aune Filista eene eenmolje Rach fa miene beid Uagen eewen kaun!

²⁹Un Simson fot de beid meddlere Stendasch om, opp dee daut Hus stunt, un hee stett sikj aun dee, de eene met siene Rajchte un de aundre met siene Linkje;

³⁰un Simson säd: Miene Seel stoaft met de Filista! Un hee buag sikj met Krauft; doa foll daut Hus oppe Ferschten un opp daut Volkj, daut doabennen wia; un daut wieren Doodje, dee hee en sienem Doot ombrocht, mea aus dee, dee hee en sienem Läwen omjebrocht haud.

³¹Un siene Breeda un sien gaunzet Vodahus kaumen rauf un hoowen am opp; un jinjen nopp un begrowden am tweschen Zorha un Eschtaol, em Grauf Manoach, sienem Voda. Oba hee haud 20 Joa Israel jerecht.