Read De Bibel JHF Rechta 17 Bible Online

Rechta 17 - De Bibel JHF bible

Rechta 17

¹Un daut wia een Maun vonne Boaj Efraim, sien Nomen wia Micha.

²Un hee säd to siene Mutta: Dee 1100 Schekel Selwa, dee die jenomen worden sent, un wuaräwa du eenen Fluch jedonen un uk ver miene Uaren jerät hast, kjikj, daut Selwa es bie mie; ekj ha daut jenomen. Doa säd siene Mutta: Jesäajent es mien Sän von däm Harn!

³Un hee jeef dee 1100 Schekel Selwa trigj. Un siene Mutta säd: Daut Selwa haud ekj von miene Haunt däm Harn jeheilicht fa mienem Sän, om een jeschnitztet Bilt un een jegotnet Bilt too moaken; un nu jäw ekj die daut trigj.

⁴Un hee jeef daut Selwa siene Mutta trigj. Un siene Mutta naum 200 Schekel Selwa un jeef daut däm Goldschmäd, un hee muak doavon een jeschnitztet un een jegotnet Bilt; un daut wia en Micha sienem Hus.

⁵Un de Maun Micha haud een Gotteshus; un hee muak een Efod un Terafim [Hus Jetta] un weid eenen von siene Säns, un hee wort sien Priesta.

⁶Aun jane Doag wia kjeen Kjennich en Israel; een jiedra deed, waut rajcht wia en siene Uagen.

⁷Un daut wia een Jinjlinkj ut Betlehem-Juda vom Jeschlajcht Juda; dee wia een Levit un hee hild sikj doa opp.

⁸Un de Maun jinkj ut de Staut, ut Betlehem-Juda, om sikj opptohoolen, wua hee daut auntrafen wudd. Un endäm hee sien Wajch jinkj, kaum hee enne Boaj Efraim bat Micha sienem Hus.

⁹Un Micha säd to am: Wuahäa kjemst du? Un hee säd to am: Ekj sie een Levit ut Betlehem-Juda; un ekj go han, mie opptohoolen, woa ekj daut trafen woa.

¹⁰Doa säd Micha to am: Bliew bie mie, un sie mie een Voda un een Priesta, soo woa ekj die jieda Joa 10 Schekel Selwa jäwen un de needje Kjleeda un dienen Unjahault. Un de Levit jinkj nenn.

¹¹Un de Levit wellicht en, bie däm Maun too bliewen; un de Jinjlinkj wort am aus eena siene Säns.

¹²Un Micha feld däm Levit de Haunt, un de Jinjlinkj wort sien Priesta un wia en Micha sienem Hus.

¹³Un Micha säd: Nu weet ekj, daut de Har mie Goots doonen woat, dan ekj ha eenen Levit toom Priesta.