Read De Bibel JHF Rechta 18 Bible Online

Rechta 18 - De Bibel JHF bible

Rechta 18

¹En jane Doag wia kjeen Kjennich en Israel. Un en jane Doag socht sikj de Staum Danita een Oawdeel toom Wonen, dan bat opp janem Dach wia am enne Medd de Stam Israel nuscht aus Oawdeel tojefollen.

²Un de Kjinja Dan schekjten fief Mana ut äarem Jeschlajcht, von an aula toop, stoakje Mana, ut Zorha un ut Eschtaol, om daut Launt too beseenen un uttoforsche; un see säden to an: Got han, forscht daut Launt ut. Un see kaumen enne Boaj Efraim bat no Micha sienem Hus, un see bleewen doa äwa Nacht.

³Aus see bie Micha sienem Hus wieren, erkjanen see de Stemm vom Jinjlinkj, däm Levit, un see dreiden sikj doahan un säden to am: Wäa haft die hiahäa jebrocht, un waut deist du hia, un waut hast du hia?

⁴Un hee säd to an: Soo un soo haft Micha mie jedonen; un hee haft mie aunjenomen, un ekj sie sien Priesta jeworden.

⁵Un see säden to am: Befroag doch Gott, daut wie weeten, auf ons Wajch, opp däm wie gonen, jelinjen woat.

⁶Un de Priesta säd to an: Got han en Fräd! Ver däm Harn es jun Wajch, opp däm jie gonen.

⁷Un de fief Mana jinjen han un kaumen no Lais; un see sagen daut Volkj, daut doa wia, en Sechaheit wonen, no de Oat de Zidonita, ruich un secha; un daut wia kjeena em Launt, dee an irjent waut aun deed; un see wieren wiet vonne Zidonita un hauden met Menschen nuscht too schaufen.

⁸Un see kaumen no äare Breeda no Zorha un Eschtaol. Un äare Breeda säden to an: Waut brinj jie?

⁹Un see säden: Moakt junt opp, un lot ons jäajen an noppgonen; dan wie ha daut Launt beseenen, un kjikj, daut es sea goot. Un jie bliewen stell? Siet nich ful, hantogonen, om nentokomen, daut Launt entonämen;

¹⁰(wan jie komen, woa jie no eenem sechren Volkj komen, un een wiedet Launt - no aule Sieden han), dan Gott haft daut en june Haunt jejäft; daut es een Uat, woa daut aun nuscht von aulem fält, waut oppe Ieed es.

¹¹Un daut jinjen von doa, vom Jeschlajcht Dan, ut Zorha un Eschtaol, 600 Maun, met äarem Jereetschoft reed toom Kjrich.

¹²Un see jinjen nopp un loagaden sikj en Kirjat-Jearim en Juda; doahäa haft maun däm Uat Machaneh-Dan jenant bat opp disem Dach; kjikj, hee es hinja Kirjat-Jearim.

¹³Un von doa jinjen see wieda enne Boaj Efraim un kaumen bat no Micha sienem Hus.

¹⁴Doa fungen de fief Mana aun, dee jegonen wieren, daut Launt Lais too beseenen, un säden to äare Breeda: Weet jie, daut en dise Hiesa Efod un Terafim un een jeschnitztet Bilt un een jegotnet Bilt sent? Un nu weet, waut jie doonen wellen.

¹⁵Un see dreiden doa han un jinjen en daut Hus vom Jinjlinkj, däm Levit, däm Hus Micha, un fruagen am no sienem Gootgonen.

¹⁶Oba dee 600 met äarem Kjrichsjereetschoft reed jemoakte Mana, dee von de Kjinja Dan wieren, bleewen aum Dooa Engank stonen.

¹⁷Un de fief Mana, de jegonen wieren, daut Launt auntoseenen, jinjen rauf, jinjen nenn un neemen daut jeschnizte Bilt un daut Efod un de Terafim un daut jegotne Bilt. Un de Priesta un dee 600 Maun, dee met äarem Jereetschoft toom Kjrich reed wieren, stunden aum Engank vom Dooa.

¹⁸Aus jane en Micha sienem Hus jinjen un daut jeschnizte Bilt, daut Efod un de Terafim un daut jegotne Bilt wajchnäme, doa säd de Priesta to an: Waut doo jie?

¹⁹Un see säden to am: Sie stell! Laj diene Haunt opp dienem Mul un go met ons, un sie ons een Voda un Priesta. Waut es bäta fa die, Priesta to sennen fa daut Hus von eenem eensjen Maun, ooda Priesta to sennen fa eenem Staum un fa een Jeschlajcht en Israel?

²⁰Doa wort daut Priesta Hoat froo, un hee neem daut Efod un de Terafim un daut jeschnizte Bilt un jinkj medden unjrem Volkj.

²¹Un see dreiden sikj om un jinjen wajch un schekjten de Kjinja un daut Vee un de wieetvollen Dinj ver sikj häa.

²²See wieren aul wiet auf von Micha sienem Hus, doa vesaumelden sikj de Mana, dee em Hus wieren, dee bie Micha sienem Hus wieren, un holden de Kjinja Dan en.

²³Un see roopten de Kjinja Dan; un dise dreiden äa Aunjesecht om un säden to Micha: Waut es met die, daut du die vesaumelt hast?

²⁴Un hee säd: Miene Jetta, dee ekj jemoakt ha, ha jie jenomen un däm Priesta, un sent wajchjegonen; un waut ha ekj noch? Un woo saj jie dan to mie: Waut es met die?

²⁵Oba de Kjinja Dan säden to am: Lot diene Stemm bie ons nich hieren, doamet nich vebettade Mana äwa junt häafaule, un die un dienem Hus daut Läwen kost!

²⁶Un de Kjinja Dan jinjen äarem Wajch. Un aus Micha sach, daut see am to stoakj wieren, dreid hee sikj om un jinkj trigj no sienem Hus.

²⁷Soo neemen see waut Micha jemoakt haud, un däm Priesta, dee siena wia. Un see äwafollen Lais, een rujet un sechret Volkj, un schluagen daut met däm schoapen Schwieet; un de Staut vebrenden see met Fia.

²⁸Un doa wia kjeen Rada; dan de Staut wia wiet auf von Sidon, un see haud nuscht met Menschen too schaufen; un dee wia enne Läacht, daut sikj no Bat-Rechob han strakjt. Un see buden de Staut wada opp un wonden doa;

²⁹un see jeewen de Staut däm Nomen Dan, no Dan sienem Nomen, äarem Voda, dee däm Israel jebuaren wort; oba verhäa heet de Staut Lais.

³⁰Un de Kjinja Dan rechten sikj daut jeschnizte Bilt opp; un Jonatan, Gersom sien Sän, von Moses sienem Sän, hee un siene Säns wieren Priesta fa däm Staum Dan bat opp disem Dach, doa daut Launt enne Jefangenschoft jefieet wort.

³¹Un see stalden sikj daut jeschnizte Bilt von Micha opp, daut hee jemoakt haud, aule Doag, doa daut Hus Gottes en Silo wia.