Read De Bibel JHF Rechta 2 Bible Online

Rechta 2 - De Bibel JHF bible

Rechta 2

¹Un de Enjel Jahwe kaum von Gilgal nopp no Bochim; un hee säd: Ekj ha junt ut Ägipten noppjefieet un junt en daut Launt jebrocht, daut ekj june Vodasch jeschwuaren ha; un ekj säd: Ekj woa mienen Bunt met junt eewich nich bräakjen;

²oba jie, jie sellen kjeenen Bunt met de Bewona von disem Launt moaken, äare Aultoaren sell jie dolbräakjen. Oba jie ha miene Stemm nich jehorcht. Waut ha jie doa jedonen!

³Soo ha ekj junt jesajcht: Ekj woa an nich ver junt vejoagen; un see woaren aun june Sied sennen, un äare Jetta woaren junt ne Faul woaren.

⁴Un daut passieed, aus de Enjel Gottes dise Wieed to de Kjinja Israel räd, doa hoof daut Volkj siene Stemm un hield.

⁵Un see jeewen däm Uat däm Nomen Bochim. Un see opfaden doa selfst däm Harn.

⁶Un Josua leet daut Volkj gonen, un de Kjinja Israel jinjen han, een jiedra en sien Oawdeel, om daut Launt entonämen.

⁷Un daut Volkj deend däm Harn, soo lang Josua un de Eltestasch läwden, dee äare Doag no Josua velenjaden, dee aul de groote Woakjen Gottes jeseenen, dee hee fa Israel jedonen haud.

⁸Un Josua, de Sän Nuns, de Kjnajcht Gottes, storf, 110 Joa oolt;

⁹un maun begrow am, en eene Jäajent, en sienem Oawdeel, en Timnat-Heres oppe Boaj Efraim, nuadlich vom Boajch Gaasch.

¹⁰Un uk jan gaunzet Jeschlajcht wort no siene Vodasch vesaumelt. Un een aundret Jeschlajcht kaum no an opp, daut däm Harn nich kjand un uk de Woakjen, dee hee fa Israel jedonen haud.

¹¹Un de Kjinja Israel deeden, waut bees enne Uagen Gottes wia un deenden dän Baalim.

¹²Un see veleeten däm Harn, däm Gott äare Vodasch, dee an ut däm Ägiptenlaunt rutjefieet haud; un see jinjen aundre Jetta no, von de Jetta de Velkja, dee runtom an wieren, un see schmeeten sikj ver an han un reizten däm Harn.

¹³Un see veleeten däm Harn un deenden däm Baal un de Astarot.

¹⁴Doa flaumd de Oaja Gottes jäajen Israel opp, un hee jeef an enne Henj de Plindra, dee an plindaden; un hee vekoft an enne Haunt von äare Fiend, runtom; un see kunnen nich mea ver äare Fiend bestonen.

¹⁵Äwaaul (aulawäajen), wuahan see jinjen, wia de Haunt Gottes jäajen an toom Beesen, soo aus de Har jerät un aus de Har an jeschwuaren haud; un see worden sea bedrenjt.

¹⁶Un de Har erwakjt Rechta; un dee raden an ut de Haunt äare Plindra.

¹⁷Oba uk äare Rechta jehorchten see nich, dan see huaden aundre Jetta no un schmeeten sikj ver an dol; see jinjen boolt auf von däm Wajch, däm äare Vodasch jegonen wieren, endäm see de Jebooten Gottes jehorchten; see deeden nich aulsoo.

¹⁸Un wan de Har an Rechta erwakjt, soo wia de Har met däm Rechta, un hee rad an ut de Haunt äare Fiend aule Doag, soo lang de Rechta läwd; dan de Har erboarmd sikj wäajen äare Weekloag ver äare Bedrekja un äare Unjadrekja.

¹⁹Un daut passieed, wan de Rechta storf, soo vedorwen see sikj emma wada, mea aus äare Vodasch, endäm see aundre Jetta nojinjen, om an to deenen un an auntobäden. See leeten nich auf von äare Doten un von äarem hoatnackjem Waundel.

²⁰Doa flaumd de Oaja Gottes jäajen Israel opp, un hee säd: Doarom daut dise Nazion mienen Bunt äwaträden haft, däm ekj äare Vodasch befool, un see miene Stemm nich jehieet ha,

²¹soo woa uk ekj wiedahan kjeenem ver an von de Nazionen rutjoagen, dee Josua äwajeloten haft, aus hee storf:

²²Om Israel derch an too vesieekjen, auf see oppem Wajch Gottes achten woaren, doabowen too gonen, aus äare Vodasch opp am jeacht ha, ooda nich.

²³Un soo leet de Har dise Nazionen bliewen, soo daut hee an nich schwind rutjuag; un hee jeef an nich en Josua siene Haunt.