Read De Bibel JHF Rechta 20 Bible Online

Rechta 20 - De Bibel JHF bible

Rechta 20

¹Un aule Kjinja Israel jinjen ut, un de gaunze Jemeent, von Dan bat Beerscheba, un daut Launt Gilead vesaumelden sikj aus een Maun ver däm Harn no Mizpa.

²Un de Heipta vom gaunzen Volkj, aule Stam Israels, stalden sikj enne Vesaumlunk vom Volkj Gottes: 400 000 Maun Footvolkj, dee daut Schwieet uttrocken.

³Un de Kjinja Benjamin hieeden, daut de Kjinja Israel no Mizpa noppjekomen wieren. - Un de Kjinja Israel säden: Sajcht, woo es dit Iebel passieet?

⁴Doa auntwuad dee Maun, de Levit, de Maun von de omjebrochte Fru, un säd: Ekj wia no Gibea jekomen, daut Benjamin jehieet, ekj un miene Näbenfru, om doa too äwanachten.

⁵Doa muaken sikj de Birja von Gibea jäajen mie opp un omstalden mienthaulwen dee Nacht daut Hus. Mie dochten see omtobrinjen, un miene Näbenfru ha see vejewaulticht, daut see storf.

⁶Doa neem ekj miene Näbenfru un veschneet ar un schekjt ar en daut gaunze Oawdeel Launt Israels; dan see ha een Vebräakjen un eene Schaunddot begonen en Israel.

⁷Kjikj, hia sent jie aula toop, Kjinja Israel: Jeft june Meeninj un junem Rot doatoo!

⁸Un daut gaunze Volkj stunt opp aus een Maun un säd: Wie wellen nich gonen, een jiedra no sienem Zelt, un nich nengonen, een jiedra en sien Hus;

⁹sonda dit es de Sach, dee wie nu aun Gibea doonen wellen: Wie gonen jäajen dee selje nodäm Loss;

¹⁰un wie neemen 10 Mana von 100, von aule Stam Israels, un 100 von 1000 un 1000 von 10 000, om Äten fa daut Volkj to holen, doamet, wan see no Gibea-Benjamin komen, maun aun an deit no aul de Schaunddot, dee see en Israel begonen ha.

¹¹Un aule Mana von Israel vesaumelden sikj jäajen de Staut, vebungen aus een Maun.

¹²Un de Stam Israels schekjten Mana en aule Jeschlajchta Benjamin un säden: Waut es daut fa eene Iebeldot, dee unja junt passieet es!

¹³Soo jeft nu de Mana, de Säns Belial, rut, dee en Gibea sent, daut wie an ombrinjen un daut Beese ut Israel wajchdoonen! Oba de Kjinja Benjamin wullen nich opp de Stemm äare Breeda, de Kjinja Israel, hieren;

¹⁴un de Kjinja Benjamin vesaumelden sikj ut de Städa no Gibea, om toom Kaumf jäajen de Kjinja Israel uttogonen.

¹⁵Un de Kjinja Benjamin worden aun disem Dach ut de Städa jemostat: 26 000 Maun, dee daut Schwieet trocken; buta de Bewona von Gibea, dee jemostat worden; 700 utjewälde Mana.

¹⁶Unja aul disem Volkj wieren 700 utjewälde Mana, dee linkjsch wieren; dise aula schliesaden met Steena hoajeneiw un vefälde nich.

¹⁷Un de Mana von Israel worden jemostat, buta Benjamin: 400 000 Maun, dee daut Schwieet trocken; dise aula wieren Kjrichsmana.

¹⁸Un de Kjinja Israel muaken sikj opp un jinjen no Betel un befruagen Gott, un see säden: Wäa von ons saul aus ieeschta noppgonen toom Striet met de Kjinja Benjamin? Un de Har säd: Juda aus Ieeschta.

¹⁹Un de Kjinja Israel muaken sikj Zemorjes opp un loagaden sikj jäajen Gibea.

²⁰Un de Mana von Israel jinjen ut toom Kaumf met Benjamin, un de Mana von Israel stalden sikj jäajen an en Schlachtordninj opp bie Gibea.

²¹Un de Kjinja Benjamin jinjen ut Gibea rut, un see strakjte unja Israel aun janem Dach too Ieed 22 000 Maun.

²²Un daut Volkj stoakjt sikj, de Mana von Israel, un see stalden sikj wada en Schlachtordninj opp aun däm Uat, woa see sikj aum ieeschten Dach oppjestalt hauden.

²³Un de Kjinja Israel jinjen nopp un hielden ver däm Harn bat oppenowent; un see befruagen däm Harn un säden: Saul ekj wada utgonen toom Striet met de Kjinja von mienem Brooda Benjamin? Un de Har säd: Got jäajen an nopp.

²⁴Un de Kjinja Israel kaumen aum tweeden Dach no de Kjinja Benjamin noda.

²⁵Un Benjamin jinkj aum tweeden Dach ut Gibea rut, an entjäajen, un see strakjte nochmol unja de Kjinja Israel 18 000 Maun too Ieed; dise aula trocken daut Schwieet.

²⁶Doa jinjen aule Kjinja Israel un daut gaunze Volkj nopp un kaumen no Betel, un see hielden un bleewen doa ver däm Harn un fausten aun janem Dach bat oppenowent; un see opfaden Brauntopfa un Dankopfa ver däm Harn.

²⁷Un de Kjinja Israel befruagen däm Harn - dan de Bundeslod Gottes wia doa selfst aun jane Doag,

²⁸un Pinehas, Eleasar sien Sän, de Sän von Aaron, stunt ver ar aun janem Dach - un säd: Saul ekj wada utgonen toom Striet met de Kjinja von mienem Brooda Benjamin, ooda saul ekj opphieren? Un de Har säd: Go nopp, dan morjen woa ekj an en diene Haunt jäwen.

²⁹Un Israel läd eenen Hinjahault runtom jäajen Gibea.

³⁰Un de Kjinja Israel jinjen aum 3-en Dach nopp jäajen de Kjinja Benjamin un stalden sikj jäajen Gibea opp, aus verhäa twee Mol.

³¹Un de Kjinja Benjamin jinjen rut, däm Volkj entjäajen, worden vonne Staut aufjeräten un fungen aun, atelje vom Volkj omtobrinjen, aus jan Mol, bie 30 Maun unja Israel, oppe Launtgaussen, de eene no Betel noppjeit un de aundre derch daut Flekj no Gibea jeit.

³²Un de Kjinja Benjamin säden: See sent ver ons jeschloagen aus verhäa. Oba de Kjinja Israel säden: Lot ons ranen, daut wie an vonne Staut aufrieten oppe Launtgaussen!

³³Un aule Mana von Israel muaken sikj opp von äarem Uat un stalden sikj aun Baal-Tamar opp, aus de Hinjahault Israels von sienem Uat väakaum ut däm Wasten, [de Heel] Gibea.

³⁴Un daut kaumen jäajen Gibea 10 000 Mana ut gaunz Israel, un de Kaumf wort hoat; oba jane wisten nich, daut et Onjlekj an errieekjt.

³⁵Un de Har schluach Benjamin ver Israel, un de Kjinja Israel strakjte unja Benjamin aun janem Dach 25 100 Maun dol; dise aule trocken daut Schwieet.

³⁶Un de Kjinja Benjamin sagen, daut see jeschloagen wieren. Un de Mana von Israel jäwen Benjamin Rum, wiels see sikj oppem Hinjahault veleeten, däm see jäajen Gibea jelajcht hauden.

³⁷Un de Hinjahault spood sikj un äwafoll Gibea; un de Hinjahault jinkj han un schluach de gaunze Staut met däm schoapen Schwieet.

³⁸De Mana von Israel hauden sikj oba met däm Hinjahault beräd, eene groote Ruakwolkj ut de Staut oppstihe loten

³⁹Un de Mana von Israel dreiden sikj om em Striet, un Benjamin haud aunjefongen, unja de Mana von Israel eenje too schlonen, bie 30 Maun; dan see säden: See sent wada von ons jeschloagen, aus verhäa em Striet.

⁴⁰Un de Braunt funk aun, ut de Staut nopptostieen aus een Ruakstenda; un Benjamin jinkj trigj, un kjikj, de gaunze Staut jinkj en Fia nopp nom Himmel.

⁴¹Doa dreiden sikj de Mana von Israel om, un de Mana von Benjamin wieren enjstlich; dan see sagen, daut et Onjlekj an errieekjt haft.

⁴²Un see dreiden sikj ver de Mana von Israel oppem Wajch no de Wieste; oba de Striet vefoljd an; un dee ut de Städa kaumen, strakjte see en äare Medd dol.

⁴³See omstalden Benjamin, juagen am no, klunjden an dol, woa see sikj vepusten wullen, bat ver Gibea, jäajen Sonnenoppgank.

⁴⁴Un daut follen von Benjamin 18 000 Maun; dise aula wieren stoakje Mana.

⁴⁵Doa dreiden see sikj un randen no de Wieste, nom Fels Rimmon; oba see hilden unja an oppe Launtgaussen eene noläsen von 5000 Maun, un jinjen an no bat Gideon un schluagen von an 2000 Maun.

⁴⁶Soo wieren aun däm Dach von Benjamin Jefolne 25 000 Maun, dee daut Schwieet trocken; dise aula wieren stoakje Mana.

⁴⁷Oba 600 Maun dreiden sikj un randen enne Wieste, nom Fels Rimmon; un see bleewen aum Fels Rimmon 4 Moonat.

⁴⁸Un de Mana von Israel jinjen no de Kjinja Benjamin trigj un schluagen an met däm schoapen Schwieet, von de Mana enne Städa bat toom Vee, un aules, waut see fungen; uk aule Städa, dee see fungen, stekjten see en Braunt.