Read De Bibel JHF Rechta 21 Bible Online

Rechta 21 - De Bibel JHF bible

Rechta 21

¹Oba de Mana von Israel hauden en Mizpa jeschwuaren un jesajcht: Kjeena von ons saul siene Dochta de Benjaminita to Fru jäwen!

²Un daut Volkj kaum no Betel, un see bleewen doa selfst bat Oppenowent ver Gott; un see hoowen äare Stemm un hielden sea

³un säden: Wuarom, oo Har, Gott Israels, es dit en Israel passieet, daut vondoag een Staum en Israel felt?

⁴Un daut passieed aum aundren Dach, doa muak sikj daut Volkj tiedich opp, un see buden doa eenen Aultoa un opfaden Brauntopfa un Dankopfa.

⁵Un de Kjinja Israel säden: Wäa von aule Stam Israels es nich en de Vesaumlunk nodäm Harn noppjekomen? Dan de groota Schwua wia jedonen worden, dee nich nodäm Harn no Mizpa noppkjemt, endäm maun sajcht: Hee saul jewess omjebrocht woaren!

⁶Un de Kjinja Israel deed daut leet äwa Benjamin, äarem Brooda, un see säden: Vondoag es een Staum von Israel aufjehakt worden!

⁷Waut sell wie an, de Äwajebläwne, betrafs de Frues doonen? Wie ha bie däm Harn jeschwuaren, an kjeene von onse Dajchta too Frues to jäwen.

⁸Un see säden: Jeft daut irjent eenen vonne Stam Israels, dee nich nodäm Harn no Mizpa noppjekomen es? Un kjikj, kjeen Maun von Jabes-Gilead wia em Loaga, en de Vesaumlunk, jekomen.

⁹Un daut Volkj wort jemostat, un kjikj, kjeen Maun wia doa von de Bewona von Jabes-Gilead.

¹⁰Doa schekjt de Jemeent 12 000 Maun von de stoakje Mana doahan, un see befoolen an un säden: Got han un schlacht de Bewona von Jabes-Gilead met däm schoapen Schwieet, uk de Frues un de Kjinja!

¹¹Un dit es daut, waut jie doonen sellen: Aule Menliche un aule Frues, dee met eenem Maun jeschlopen ha, sell jie vebaunen.

¹²Un see fungen unja de Bewona von Jabes-Gilead 400 Mejales, Junkfrues, dee met kjeenem Maun jeschlopen hauden; un see brochten an en daut Loaga no Silo, daut em Launt Kanaan es.

¹³Un de gaunze Jemeent schekjt han un räd to de Kjinja Benjamin, dee aum Fels Rimmon wieren, un boode an Fräd aun.

¹⁴Un Benjamin jinkj en dee selje Tiet trigj; un see jeewen an de Frues, dee see hauden aum Läwen jeloten von de Frues von Jabes-Gilead, oba see fungen nich jenuach fa an.

¹⁵Un daut Volkj deed daut leet wäajen Benjamin, wiels de Har en de Stam Israels eene Rät jemoakt haud.

¹⁶Un de Eltestasch de Jemeent säden: Waut sell wie Äwaje betrafs de Frues doonen? Dan de Frues sent ut Benjamin vetilcht.

¹⁷Un see säden: Een Ieejentum saul fa de Wajchjeranden von Benjamin sennen, doamet kjeen Staum ut Israel utjerot woat.

¹⁸Oba wie, wie kjennen an kjeene Frues von onse Dajchta jäwen; dan de Kjinja Israel ha jeschwuaren un jesajcht: Veflucht es, wäa de Benjaminita eene Fru jeft!

¹⁹Un see säden: Kjikj, een Fast Gottes es jieda Joa en Silo, daut nuadlich von Betel, jäajen Sonnoppgank vonne Launtgauss, de von Betel no Sichem noppjeit, un siedlich von Lebona licht.

²⁰Un see befoolen de Kjinja Benjamin un säden: Got han un luat enne Wienboaj;

²¹un jie woaren seenen, un kjikj, wan jie de Dajchta von Silo met Reijendaunzen (eene Oat von Daunzen) rutgonen seenen, soo komt ut de Wienboaj rut un nämt junt een jiedra eene Fru von de Dajchta Silo un got en daut Launt Benjamin.

²²Un daut saul passieren, wan äare Vodasch ooda äare Breeda komen, om met ons too strieden, soo well wie to an sajen: Schenkjt dee ons! Dan wie ha nich een jiedra eene Fru em Kjrich jekjräajen; dan nich jie ha dee an jejäft, daut jie nu schuldich wieren.

²³Un de Kjinja Benjamin deeden soo un neemen sikj Frues, no äare Zol, von de Reijen daunzende, dee see roowde. Un see jinjen wajch un jinjen en äa Oawdeel trigj; un see buden de Städa wada opp un wonden doa.

²⁴Un de Kjinja Israel jinjen to dee selje Tiet von doa, een jiedra no sienem Staum un no sienem Jeschlajcht; un see jinjen von doa wajch, een jiedra en sien Oawdeel.

²⁵En jane Doag wia kjeen Kjennich en Israel, een jiedra deed waut en siene Uagen rajcht wia.