Read De Bibel JHF Rechta 3 Bible Online

Rechta 3 - De Bibel JHF bible

Rechta 3

¹Un dit sent de Nazionen, dee de Har bliewen leet, om Israel derch an uttoproowen, aule, dee nich wisten von aule Kjrichs om Kanaan, —

²blooss doamet de Jeschlajchta de Kjinja Israels daut kjanen lieeden, om an vom Kjrich to lieren, blooss dän, dee ver däm nuscht doavon jewist hauden:

³De 5 Ferschten de Filista un aule Kanaanita un Zidonita un Hewita, dee de Boaj Libanon bewonden, von däm Boajch Baal-Hermon aun, bat maun no Hamat kjemt.

⁴Un dee deenden doatoo, Israel derch an too proowen, om to weeten, auf see de Jebooten Gottes jehorchen wudden, dee hee äare Vodasch derch Moses befoolen haud.

⁵Un de Kjinja Israel wonden enne Medd vonne Kanaanita, de Hetita un de Amorita un de Perisita un de Hewita un de Jebusita;

⁶un see neemen sikj äare Dajchta too Frues un jeewen äare Dajchta äare Säns un deenden äare Jetta.

⁷Un de Kjinja Israel deeden, waut bees enne Uagen Gottes wia un vegauten von däm Harn, äarem Gott, un see deenden däm Baalim un de Ascherot.

⁸Doa flaumd de Oaja Gottes jäajen Israel opp, un hee vekoft an en de Haunt Kuschan-Rischataim, däm Kjennich von Mesopotamien; un de Kjinja Israel deenden däm Kuschan-Rischataim acht Joa.

⁹Un de Kjinja Israel schrieejen to däm Harn; un de Har erwakjt de Kjinja Israel eenen Rada, dee an rad: Otniel, däm Sän Kenas, däm jinjsten Brooda von Kaleb.

¹⁰Un de Jeist Gottes kaum äwa am, un hee recht Israel; un jinkj ut toom Kaumf, un de Har jeef Kuschan-Rischataim, däm Kjennich von Aram, en siene Haunt, un siene Haunt wort stoakj jäajen Kuschan-Rischataim.

¹¹Un daut Launt haud 40 Joa Ru. Un Otniel, de Sän Kenas, storf.

¹²Un de Kjinja Israel deeden wada, waut enne Uagen Gottes bees wia; un de Har stoakjt Eglon, däm Kjennich von Moab, jäajen Israel, wiels see deeden, waut bees enne Uagen Gottes wia.

¹³Un hee vesaumeld no sikj de Kjinja Amon un Amalek; un hee jinkj han un schluach Israel, un see naumen de Paulmstaut en.

¹⁴Un de Kjinja Israel deenden Eglon, däm Kjennich von Moab, achtieen Joa.

¹⁵Un de Kjinja Israel schrieejen to däm Harn; un de Har erwakjt an eenen Rada, Ehud, däm Sän Geras, eena von Benjamin, eenen Maun, dee linkjsch wia. Un de Kjinja Israel schekjten derch am een Jeschenkj aun Eglon, däm Kjennich von Moab.

¹⁶Un Ehud muak sikj een tweeschniedjet Schwieet, eene Elle lank, un hee bung sikj daut unja sienen Rock aun siene rajchte Hoft.

¹⁷Un hee brocht daut Jeschenkj Eglon, däm Kjennich von Moab. Oba Eglon wia een sea fata Maun.

¹⁸Un daut passieed, aus hee met däm Jeschenkj äwaräkjen foadich wia, doa leet hee daut Volkj gonen, dee daut Jeschenkj jedroacht hauden.

¹⁹Oba hee selfst jinkj trigj von de jeschnizte Bilda, dee bie Gilgal wieren, un säd: Een jeheimet Wuat ha ekj aun die, oo Kjennich! Un hee säd: Stell! Un aul dee, dee bie am stunden, jinjen rut von am.

²⁰Un aus Ehud no am nenn kaum, saut hee enne bowaschten Stow om auftokjeelen, dee blooss fa am auleen wia. Un Ehud säd: Een Wuat Gottes ha ekj aun die. Un hee stunt opp vom Stool.

²¹Doa strakjt Ehud siene linkje Haunt ut un naum daut Schwieet von siene rajchte Hoft un stad am daut em Buck;

²²un daut drung uk de Hauntjräp nenn, no de Massakjlinj, un daut Fat schloot sikj om de Massakjlinj; dan hee trock daut Schwieet nich ut sienem Buck rut, un daut kaum tweschen de Been rut.

²³Un Ehud jinkj en de Väastow rut un schloot de Däa vonne bowaschte Stow hinja sikj too, un veschloot ar.

²⁴Un aus hee rutjegonen wia, doa kaumen siene Kjnajchts un sagen, un kjikj, de Däa vonne bowaschte Stow wia veschloten. Un see säden: Jewess bedakjt hee siene Feet enne kjeele Stow.

²⁵Un see luaden, bat see sikj schämden; oba kjikj, hee muak de Däa vonne bowaschte Stow nich op; doa naumen see däm Schlätel un schlooten op, un kjikj, äa Har lach doot oppe Ieed.

²⁶Oba Ehud wia wajchjerant, aus see daut vetrocken; hee wia äwa de jeschnizte Bilda rutjegonen un rand no Seira.

²⁷Un daut passieed, aus hee aunjekomen wia, doa blosd hee Posaun oppe Boaj Efraim; un de Kjinja Israel jinjen met am vonne Boaj rauf, un hee ver an häa.

²⁸Un hee säd to an: Joacht mie no, dan de Har haft june Fiend, de Moabita, en june Haunt jejäft! Un see jinjen rauf, am hinjaraun, un naumen däm Äwagank vom Jordan, un leeten kjeenem äwagonen.

²⁹Un see schluagen de Moabita, aun dee selje Tiet, bie 10 000 Maun, aule kjraftje un striedboare Mana, un kjeena rand wajch.

³⁰Un Moab wort aun däm seljen Dach unja de Haud Israels jedeemooticht. Un daut Launt haud 80 Joa Ru.

³¹Un no am wia Schamgar, de Sän Anats; un hee schluach de Filista, 600 Maun, met eenem Rinda Huarn. Un uk hee rad Israel.