Read De Bibel JHF Rechta 4 Bible Online

Rechta 4 - De Bibel JHF bible

Rechta 4

¹Un de Kjinja Israel deeden wada, waut enne Uagen Gottes bees wia; un Ehud wia jestorwen.

²Doa vekoft de Har an en Jabin siene Haunt, däm Kjennich äwa de Kanaanita, dee en Hazor rejieed; un sien Häabowaschta wia Sisera, un hee wond en Haroschet-Gojim.

³Un de Kjinja Israel schrieejen to däm Harn; dan hee haud 900 iesane Woages, un hee bedrekjt de Kjinja Israel met Jewault 20 Joa.

⁴Un Debora, eene Profeetin, Lappidoth siene Fru, recht Israel too jane Tiet.

⁵Un see saut unja de Paulmen-Debora tweschen Rama un Betel, oppe Boaj Efraim; un de Kjinja Israel jinjen no ar nopp toom Jerecht.

⁶Un see schekjt han un leet Barak, Abinoam sienen Sän, von Kedes-Naftali, roopen; un see säd to am: Haft nich de Har, de Gott Israels, befoolen: Go han un go oppem Boajch Tabor, un nemm met die 10 000 Maun von de Kjinja Naftali un von de Kjinja Sebulon;

⁷un ekj woa Sisera, däm Häabowaschten Jabin, daut see, no die gonen aun däm Bach Kison met siene Woages un siene Menj, un ekj woa an en diene Haunt jäwen.

⁸Un Barak säd to ar: Wan du met mie jeist, soo go ekj; oba wan du nich met mie jeist, soo go ekj nich:

⁹Doa säd see: Ekj well met die gonen; blooss daut de Iea oppem Wajch nich diene sennen woat, däm du jeist, dan enne Haunt von eene Fru woat de Har däm Sisera äwajäwen. Un Debora muak sikj opp un jinkj met Barak no Kedes.

¹⁰Un Barak roopt Sebulon un Naftali no Kedes; un 10 000 Maun jinjen met am nopp; uk Debora jinkj met am nopp.

¹¹Oba Heber, de Kenita, haud sikj vonne Kenita, de Kjinja Hobab, Moses sienem Schwiavoda, jetrant; un hee haud siene Zelten oppjeschloagen bat aune Terebinten Zaanannim, dee bie Kedes licht.

¹²Un maun berecht däm Sisera, daut Barak, Abinoam sien Sän, oppem Boajch Tabor nopp jegonen wia.

¹³Doa roopt Sisera aul siene Woages, 900 iesane Woages, un aulet Volkj, daut met am wia, von Haroschet-Gojim aun däm Bach Kison.

¹⁴Un Debora säd to Barak: Moak die opp! Dan dit es de Dach, doa de Har däm Sisera en diene Haunt jejäft haft. Es nich de Har ver die utjegonen? Un Barak jinkj vom Boajch Tabor rauf, un 10 000 Maun met am.

¹⁵Un de Har vewerd Sisera un aul siene Woages un daut gaunze Häa derch daut schoape Schwieet von Barak; un Sisera sprunk vom Woagen un rand too Foot wajch.

¹⁶Oba Barak juach däm Woagen un däm Häa no bat Haroschet-Gojim; un Sisera sien gaunzet Häa foll derch daut schoape Schwieet; daut bleef uk nich eena äwa.

¹⁷Un Sisera rand too Foot en Jael äa Zelt, von Heber siene Fru, vom Kenita; dan daut wia Fräd tweschen Jabin, däm Kjennich von Hazor, un däm Hus Heber, vom Kenita.

¹⁸Doa jinkj Jael rut, däm Sisera entjäajen; un see säd to am: Komm nenn, mien Har, komm nenn no mie, un enjst die nich! Un hee jinkj nenn no ar em Zelt, un see bedakjt am met eene Dakj.

¹⁹Un hee säd to ar: Lot mie doch een bät Wota drinkjen, dan mie darscht. Un see muak daut Malkjlada op un leet am drinkjen, un see dakjt am to.

²⁰Un hee säd to ar: Stal die aum Engank vom Zelt; un daut saul, wan wäa kjemt un die frajcht un sajcht: Es irjent wäa hia? Soo saj: Kjeena.

²¹Un Jael, Heber siene Fru, neem eenen Zeltnoagel un naum däm Homa en äare Haunt, un see kaum leis no am un schluach däm Noagel derch sien Schlop, daut hee enne Ieed vesunk. Oba hee wia en eenem deepen Schlop jefollen un wia Meed, un hee storf.

²²Un kjikj, doa kaum Barak, dee Sisera vefoljd; un Jael jinkj rut, am entjäajen, un säd to am: Komm, ekj well die däm Maun wiesen, däm du sieekjst! Un hee jinkj no ar nenn, un kjikj, Sisera lach doot, un de Noagel wia en sienem Schlop.

²³Soo deemutijd Gott aun däm Dach Jabin, däm Kjennich von Kanaan, ver de Kjinja Israel.

²⁴Un de Haunt de Kjinja Israel wort emma hoada äwa Jabin, däm Kjennich von Kanaan, bat see Jabin, däm Kjennich von Kanaan, venicht hauden.