Read De Bibel JHF Rechta 5 Bible Online

Rechta 5 - De Bibel JHF bible

Rechta 5

¹Un Debora un Barak, Abinoam sien Sän, sungen aun däm Dach un säden:

²Wiels de Aunfiera Israel fieeden, wiels daut Volkj sikj friewellich stald, dankt däm Harn!

³Hieet, jie Kjennichs; moakjt opp, jie Ferschten! Ekj well, jo, ekj well däm Harn sinjen, well sinjen un spälen däm Harn, däm Gott Israels!

⁴Har! Aus du von Seir utjinkjst, aus du omhäa jinjst vom Flekj Edom, doa zettad de Ieed; uk de Himmel dreppld, uk de Wolkjen drepple vom Wota.

⁵De Boaj veranden ver däm Harn, jan Sinai ver däm Harn, däm Gott Israels.

⁶Aun de Doag Schamgar, Anat sienem Sän, aun de Doag Jael wieren de Stiej veloten, un de Waundra dee oppe Stiej jinjen, jinjen kromme Wäaj.

⁷Daut fiade de Aunfiera en Israel, see fiade, bat ekj, Debora, oppstunt, bat ekj oppstunt, eene Mutta en Israel.

⁸Israel erwäld niee Jetta; doa wia stried enne Dooasch! Word Schild un Spies jeseenen unja 40 000 en Israel?

⁹Mien Hoat jehieet de Aunfiera Israels, dän, dee sikj friewellich em Volkj stalen. Loft däm Harn!

¹⁰Dee jie opp witt-root plakje Äselinen rieden, dee jie opp Dakjen setten, un dee jie opp Wäaj gonen, sinjt!

¹¹Wäajen de Stemm dee Raup utdeelen, tweschen de Schap-Rande, doa sellen see priesen de jerajchte Doten Gottes, de jerajchte Doten aun siene Aunfiera en Israel. Doa jinkj daut Volkj no de Dooasch rauf.

¹²Wakj opp, wakj opp, Debora! Wakj opp, wakj opp, sinj een Leet! Moak die opp, Barak, un leid diene Jefangne auf, Abinoam sien Sän!

¹³Doa jinjen de Äwaje de Adelje un daut Volkj; de Har kaum no mie rauf unja de Helden.

¹⁴Von Efraim jinjen rauf, dee äare Wartel en Amalek es; hinja die häa Benjamin, unja diene Velkja; von Makir jinjen de Aunfiera rauf, un von Sebulon, dee däm Aumtsschriewa Stock hoolen.

¹⁵Un de Ferschten en Isachar wieren met Debora; un Isachar wia aus Barak; hee woat siene Feet enne Läacht schekjen. Aun Ruben siene Rieen (kjliene Riefasch) wort von Hoaten grootet beschloten.

¹⁶Wuarom blifst du tweschen de Häaden, om daut mekjre de Häad to hieren? Aun Ruben siene Rieen wort von Hoaten grootet beschloten.

¹⁷Gilead rud aun jane Sied vom Jordan; un Dan, wuarom helt hee sikj bie de Schäp opp? Aser bleef aum Mäa Eewa, un aun siene Bochte rut hee.

¹⁸Sebulon es een Volkj, daut siene Seel däm Doot oppjeef, uk Naftali oppe Aunboaj de Stapen.

¹⁹Kjennichs kaumen, see streeden; doa streeden de Kjennichs Kanaan en Taanak aum Wota Megiddo; Raup aun Selwa druagen see nich doavon.

²⁰Vom Himmel häa streeden, von äare Bon ut streeden de Stierns met Sisera.

²¹De Bach Kison reet an wajch, de Bach de oole Tieden, de Bach Kison. Du, miene Seel, klunjst de Stoakje dol!

²²Doa staumpte de Heefta de Pieed vom Ranen, däm Ranen äare Jewaultje.

²³Veflucht Meros! sajcht de Enjel Gottes, veflucht siene Bewona! Dan see sent nich däm Harn too Help jekomen, däm Harn too Help unja de Helden.

²⁴Jesäajent ver de Frues es Jael, Heber siene Fru, von Kenita, jesäajent ver de Frues enne Zelten!

²⁵Hee velangd Wota, see gauf Malkj; en eene Komm de Adelje rieekjt see am dikje Malkj han.

²⁶Äare Henj strakjt see nodäm Noagel ut un äare Rajchte nodäm Homa de Oabeida; un see schluach opp Sisera en, veschmatad sien Haupt un veschluag un derchboad sien Schlop.

²⁷Tweschen äare Feet kjrelld hee sikj, foll un lach doa; tweschen äare Feet kjrelld hee sikj, foll; doa, wua hee sikj kjrelld, foll hee un bleef ligjen.

²⁸Derch een Fensta kjikjt Sisera siene Mutta rut un roopt enjstlich derch de Sprote: Wuarom kjemt sien Woagen soo lang nich? Wuarom kjemt sien Jespaun toolot?

²⁹De Kluake unja de Adelje Frues auntwuaden ar, un see selfst beauntwuad sikj äare Froag soo:

³⁰Finje see nich, deelen see nich däm Raup? Eene Mejal, 2 Mejales oppem Kopp von eenem Maun? Raup aune bunte Kjleeda fa Sisera, Raup aun bunt jewäwden Kjleeda; 2 bunt jewäwden Kjleeda fa däm Hauls de Jefangne.

³¹Aulsoo muchten omkomen aul diene Fiend, Har! Oba dee am leewen, sent aus de Sonn de en äare Krauft oppjeit! — Un daut Launt haud 40 Joa Ru.