Read De Bibel JHF Rechta 7 Bible Online

Rechta 7 - De Bibel JHF bible

Rechta 7

¹Un Jerub-Baal, daut es Gideon, un aulet Volkj, daut met am wia, muaken sikj tiedich opp, un see loagaden sikj aune Kjwal Harod; oba daut Loaga Midian wia nuadlich, nom Aunboaj More han, enne Läacht.

²Un de Har säd to Gideon: Daut Volkj, daut bie die es, es too väl, aus daut ekj Midian en äare Haunt jäwen sull; doamet Israel sikj nich jäajen mie riemt un sajcht: Miene Haunt haft mie jerat!

³Un nu roop doch ver de Uaren vom Volkj ut un saj: Wäa enjstlich un vezoagt es, drei om un go trigj vonne Boaj Gilead! Doa jinjen vom Volkj 22 000 trigj, un 10 000 bleewen äwa.

⁴Un de Har räd too Gideon: Daut Volkj es noch too väl; leid an rauf aum Wota, daut ekj an die selfst proow; un daut saul passieren, von wäm ekj die sajen woa: Disa saul met die gonen, dee saul met die gonen; un jiedra, von däm ekj die sajen woa: Disa saul nich met die gonen, dee saul nich gonen.

⁵Un hee fieed daut Volkj rauf aum Wota. Un de Har säd to Gideon: Jiedra, dee met siene Tung vom Wota lekjt, aus een Hund lekjt, däm stal oppoat; un uk jiedrem, dee opp siene Kjnee fält, om to drinkjen.

⁶Un de Zol von dän, dee met äarem Mul utte Haunt lekjt, wia 300 Maun; un daut gaunze äwaje Volkj haud sikj oppe Kjnee rauf jeloten, om Wota to drinkjen.

⁷Un de Har säd to Gideon: Derch dee 300 Maun, dee jelekjt ha, well ekj junt raden un Midian en diene Haunt jäwen; oba daut gaunze, äwaje Volkj saul gonen, een jiedra aun sienem Uat.

⁸Un see neemen daut Ätwoa vom Volkj met sikj un siene Posaun. Un hee entleet aule Mana von Israel, eenen jiedren no sien Zelt; oba dee 300 Maun hilt hee bie sikj. Oba daut Loaga Midian wia unjen enne Läacht.

⁹Un daut passieed en dee selje Nacht, doa säd de Har to am: Moak die opp, go rauf en daut Loaga; dan ekj ha daut en diene Haunt jejäft.

¹⁰Un wan du Angst hast, rauf too gonen, soo go met Pura, dienem Jung, rauf nom Loaga;

¹¹un du woascht hieren, waut see räden; un nodäm woaren diene Henj stoakj woaren, un du woascht en daut Loaga raufgonen. Doa jinkj hee met Pura, sienem Jung, rauf bat aum Enj de Loagawajchta, dee em Loaga wieren.

¹²Un Midian un Amalek un aule Säns vom Oosten wieren enne Läacht, aus de Heischrakjen aun Menj; un äare Kameelen wieren onen Zol, aus de Saunt, dee aum Mäa Eewa es, aun Menj.

¹³Un Gideon kaum, un kjikj, een Maun vetald sienem Frint een Droom un säd: Kjikj, ekj ha eenen Droom jehaut; un kjikj, een Joaschtbroot rold en daut Loaga Midian; un daut kaum bat aum Zelt un schluach daut, daut et omfoll, un dreid daut om, daut Unjaschte no bowen, un daut Zelt lach doa.

¹⁴Un sien Frint auntwuad un säd: Daut es nuscht aundret aus daut Schwieet von Gideon, Joasch sienem Sän, eenem Maun von Israel; Gott haft Midian un daut gaunze Loaga en siene Haunt jejäft.

¹⁵Un daut passieed, aus Gideon daut Jeräd vom Droom un siene Diedinj hieed, doa bäd hee aun. Un hee kaum en daut Loaga Israels trigj un säd: Moakt junt opp! Dan de Har haft daut Loaga Midian en june Haunt jejäft.

¹⁶Un hee deeld de 300 Maun en dree Gruppen un jeef an aulen Posaun enne Haunt un ladje Krucken, un Fiastakja enne Krucken.

¹⁷Un hee säd to an: Kjikjt opp mie un doot krakjt soo; kjikj, wan ekj aum Enj vom Loaga kom, soo saul daut passieren, daut jie krakjt soo doonen, aus ekj doo.

¹⁸Un blos ekj enne Posaun, ekj un aule, dee bie mie sent, soo sell uk jie enne Posaun blosen runtom däm gaunzen Loaga, un sellen roopen: Fa däm Harn un fa Gideon!

¹⁹Un Gideon un de 100 Maun, dee bie am wieren, kaumen aun daut Enj vom Loaga, biem Aunfank de meddlere Nachtwacht; maun haud jrod de Wajchta oppjestalt. Un see blosde enne Posaun un veschluagen de Krucken, dee en äare Henj wieren.

²⁰Un dee dree Gruppen blosden enne Posaun un vebruaken de Krucken; un see hilden en äare linkje Haunt de Fiastakja un en äare rajchte Haunt de Posaun toom blosen un roopten: Schwieet fa däm Harn un Gideon!

²¹Un see stunden een jiedra aun siene Städ, runtom daut Loaga. Doa rand daut gaunze Loaga un schrieech un rand.

²²Un see blosde en de 300 Posaun; un de Har recht däm eenen sien Schwieet jäajen däm aundren, un zwoa em gaunzen Loaga. Un daut Loaga rand bat Bat-Schitta, no Zerera han, bat aum Eewa von Abel-Mehola bie Tabbat.

²³Un daut vesaumelden sikj de Mana Israels, von Naftali un Aser un von gaunz Manasse, un see juagen Midian no.

²⁴Un Gideon schekjt Booten en daut gaunze Boajlaunt Efraim un leet sajen: Komt rauf, Midian entjäajen, un nämt an daut Wota bat Bat-Bara, un däm Jordan! Doa vesaumelden sikj aule Mana von Efraim un neemen an daut Wota bat Bat-Bara un däm Jordan.

²⁵Un see jreepen de twee Ferschten von Midian, Oreb un Seeb; un see schluagen Oreb aun däm Fels Oreb, un Seeb schluagen see biem Wienkjala Seeb; un see juagen Midian no. Un de Kjap von Oreb un Seeb brochten see no Gideon no de aundre Sied vom Jordan.