Read De Bibel JHF Rechta 8 Bible Online

Rechta 8 - De Bibel JHF bible

Rechta 8

¹Un de Mana von Efraim säden to am: Waut es daut fa eene Sach, dee du ons jedonen, daut du ons nich jeroopt hast, aus du hanjinjst, om jäajen Midian too strieden! Un see zankten sea met am.

²Un hee säd to an: Waut ha ekj dan jedonen, em Vejlikj met junt? Es nich daut noläsen von Efraim bäta aus daut Wienläse Abieser?

³En june Haud haft Gott de Ferschten von Midian, Oreb un Seeb jejäft; un waut kunn ekj doonen, waut jie jedonen ha? Doa leet äa Oaja von am auf, aus hee dit Wuat räd.

⁴Un Gideon kaum aun däm Jordan; hee jinkj äwa, hee un de 300 Maun, dee bie am wieren, meed un juagen no.

⁵Un hee räd to de Mana von Sukkot: Jeft doch däm Volkj daut met mie jeit, eenje Brood; dan see sent meed, un ekj joag de Kjennichs von Midian, Sebach un Zalmunna, no.

⁶Un de Bowaschte von Sukkot säden: Es de Fust von Sebach un Zalmunna aul en diene Haunt, daut wie dienem Häa Broot jäwen sellen?

⁷Doa säd Gideon: Doarom, wan de Har Sebach un Zalmunna een miene Haunt jejäft haft, woa ekj jun Fleesch met Wieste Hachels un met Stäakjdistle draschen!

⁸Un hee jinkj von doa no Pnuel nopp un räd to an opp dee selje Wies: Un de Mana von Pnuel auntwuaden am, aus de Mana von Sukkot jeauntwuat hauden.

⁹Doa räd hee uk to de Mana von Pnuel un säd: Wan ekj en Fräd trigjkom, soo woa ekj disem Torm dolrieten!

¹⁰Oba Sebach un Zalmunna wieren en Karkor, un äare Häasch met an, bie 15 000 Maun, aula, dee äwajebläwen wieren vom gaunzen Loaga de Säns vom Oosten; un dee doa jefollen wieren 120 000 Maun, dee daut Schwieet uttrakjen kunnen.

¹¹Un Gideon jinkj nopp no de Zelt Bewona, oostlich von Nobach un Jogbeha; un hee schluach daut Loaga, un daut Loaga wia sorjloos.

¹²Un Sebach un Zalmunna randen wajch, un hee juach an no; un hee jreep dee beid Kjennichs von Midian, Sebach un Zalmunna; un daut gaunze Loaga vesad hee en Schrakj.

¹³Un Gideon, Joasch sien Sän, jinkj ut de Schlacht trigj, vom Aunboaj Heres rauf.

¹⁴Un hee jreep eenen Jinjlinkj von de Mana en Sukkot un befruach am; un disa schreew am de Bowaschte von Sukkot un siene Eltestasch opp, 77 Maun.

¹⁵Un hee kaum no de Mana von Sukkot un säd: Kjikjt hia Sebach un Zalmunna, äwa dee jie mie vespott ha, endäm jie säden: Es de Fust Sebach un Zalmunna aul en diene Haunt, daut wie diene Mana, dee meed sent, Broot jäwen sellen?

¹⁶Un hee naum de Eltestasch de Staut un Wiestehachle un Stäakjdistle, un hee stroft de Mana von Zukkot doamet.

¹⁷Un däm Torm en Pnuel reet hee dol un brocht de Mana de Staut om.

¹⁸Un hee säd to Sebach un to Zalmunna: Woo wieren de Mana, dee jie en Tabor omjebrocht ha? Un see säden: Aus du, soo wieren see, een jiedra aun Jestault aus een Kjennichssän.

¹⁹Un hee säd: Daut wieren miene Breeda, de Säns von miene Mutta. Soo woa de Har läft, wan jie an aum Läwen jehoolen hauden, soo wull ekj junt nich ombrinje!

²⁰Un hee säd to Jeter, sienem Ieeschtjebuarnen: Sto opp, brinj an om! Oba de Jung trock sien Schwieet nich; dan hee haud fa an Angst, wiels hee noch jung wia.

²¹Doa säden Sebach un Zalmunna: Sto du opp un stäakj ons dol; dan aus de Maun, soo siene Krauft. Un Gideon stunt opp un brocht Sebach un Zalmunna om; un hee neem de Haulfmonde, dee aune Halsa äare Kameelen wieren.

²²Un de Mana von Israel säden to Gideon: Harsch äwa ons, soo aus du, aus uk dien Sän un dienem Sän sien Sän; dan du hast ons ut de Haunt Midian jerat.

²³Un Gideon säd to an: Nich ekj well äwa junt harschen, un nich mien Sän saul äwa junt harschen; de Har saul äwa junt harschen.

²⁴Un Gideon säd to an: Eene Bedd well ekj von junt bedden: Jeft mie een jiedra een Rinkj von sienem Raup! (Dan see hauden goldne Rinj, wiels see Ismaelita wieren).

²⁵Un see säden: Wellich well wie dee die jäwen. Un see spreeden een Kjleet ut un schmeeten doanopp Rinj von äarem Raup.

²⁶Un daut Jewicht de goldne Rinj, dee hee foddad, wia 1 700 Schekel Golt, buta de Haulfmonde un de Uarinj un de purpur Kjleeda, dee de Kjennichs von Midian druagen, un buta de Haulskjäde, dee aune Halsa äare Kameelen wieren.

²⁷Un Gideon muak doavon eenen Efod un stald daut en siene Staut opp, en Ofra. Un gaunz Israel huad däm seljen doa no; un daut wort Gideon un sienem Hus toom Faul.

²⁸Soo wort Midian ver de Kjinja Israel jedeemooticht, un daut hoof sien Haupt nich mea opp. Un daut Launt haud enne Doag Gideon 40 Joa Ru.

²⁹Un Jerub-Baal, Joasch sien Sän, jinkj han un wond en sienem Hus.

³⁰Un Gideon haud 70 Säns, dee ut siene Lenden väajekomen wieren; dan hee haud väl Frues.

³¹Un siene Näbenfru, dee en Sichem wia, uk see jebua am eenen Sän; un hee jeef am däm Nomen Abimelech.

³²Un Gideon, Joasch sien Sän, storf em gooden Ella; un hee wort begroft em Grauf von sienem Voda Joasch, en Ofra de Abieserita.

³³Un daut passieed, aus Gideon doot wia, doa huaden de Kjinja Israel wada de Baalim no un muaken sikj Baal-Berit toom Gott.

³⁴Un de Kjinja Israel dochten nich aun däm Harn, äarem Gott, dee an ut de Haunt äare Fiend runtom jerat haud.

³⁵Un see beweese kjeene Jnod aun däm Hus Jerub-Gideon, no aul däm Gooden, daut hee aun Israel jedonen haud.