Read De Bibel JHF Rechta 9 Bible Online

Rechta 9 - De Bibel JHF bible

Rechta 9

¹Un Abimelech, Jerub-Baal sien Sän, jinkj no Sichem no de Breeda von siene Mutta; un hee räd to an un toom gaunzen Jeschlajcht vom Vodahus siene Mutta un säd:

²Räd doch to de Uaren de Birja von Sichem: Waut es bäta fa junt, daut 70 Mana äwa junt harschen, aule Säns Jerub-Baal, ooda daut een Maun äwa junt harscht? Un bedenkjt, daut ekj jun Knoaken un jun Fleesch sie.

³Un de Breeda siene Mutta räden aul dise Wieed ver de Uaren aule Birja von Sichem. Un äa Hoat neijd sikj Abimelech too; dan see säden: Hee es ons Brooda.

⁴Un see jeewen am 70 Schekel Selwa ut däm Hus Baal-Berit; un Abimelech neem sikj doamet leichtfoadje un äwamotje Mana aun, un dee jinjen met am.

⁵Un hee kaum en sien Vodahus, no Ofra, un brochten siene Breeda om, de Säns Jerub-Baal, 70 Maun opp eenem Steen; oba Jotam, de jinjsta Sän Jerub-Baal, bleew äwa, dan hee haud sikj vestopt.

⁶Un aule Birja von Sichem un daut gaunze Hus Millo vesaumelden sikj un jinjen han un muaken Abimelech toom Kjennich bie de Denkjmol Terebinten, dee en Sichem es.

⁷Un maun berecht daut Jotam. Doa jinkj hee han un stald sikj oppe Boajchspetz Gerisim, un hee hoof siene Stemm un roopt un säd to an: Hieet opp mie, Birja von Sichem, soo woat Gott opp junt hieren!

⁸De Beem jinjen han om eenen Kjennich äwa sikj too saulwen; un see säden toom Eeljboom: Sie Kjennich äwa ons!

⁹Un de Eeljboom säd to an: Sull ekj mien Fat oppjäwen, daut Jetta un Menschen aun mie veharlichen, un sull hangonen, om äwa de Beem too schwäwen?

¹⁰Doa säden de Beem toom Fiejenboom: Komm du, sie Kjennich äwa ons!

¹¹Un de Fiejenboom säd to an: Sull ekj mien Seetet oppjäwen un miene goode Frucht, un sull hangonen, om äwa de Beem too schwäwen?

¹²Doa säden de Beem toom Wienstock. Komm du, sie äwa ons Kjennich!

¹³Un de Wienstock säd to an: Sull ekj mienen jungen Wien oppjäwen, dee Jetta un Menschen froo moakt, un sull hangonen, om äwa de Beem too schwäwen?

¹⁴Doa säden aule Beem toom Hachelstruck: Komm du, sie Kjennich äwa ons!

¹⁵Un daut Hachelstruck säd to de Beem: Wan jie mie werkjlich toom Kjennich äwa junt saulwen wellen, soo komt, nämt Tooflucht unja mienem Schauten! Oba wan nich, soo saul Fia vom Hachelstruck utgonen un de Zeeda vom Libanon vebrennen.

¹⁶Un nu, wan jie en Woarheit un opprechtich jehaundelt ha, daut jie Abimelech toom Kjennich jemoakt, un wan jie goodet jedonen ha aun Jerub-Baal un aun sienem Hus, un wan jie am jedonen ha nom doonen siene Henj, -

¹⁷dan mien Voda haft fa junt jesträden un sien Läwen doahan jejäft un junt ut de Haunt Midian jerat;

¹⁸oba jie ha junt vondoag jäajen daut Hus von mienem Voda jehowen un siene Säns omjebrocht, 70 Maun opp eenem Steen, un ha Abimelech, däm Sän von siene Deenstmejal, toom Kjennich jemoakt äwa de Birja von Sichem, wiels hee jun Brooda es, -

¹⁹wan jie aulsoo aun disem Dach en Woarheit un opprechtich aun Jerub-Baal un aun sienem Hus jehaundelt ha, soo freit junt aun Abimelech, un uk hee saul sikj aun junt freien!

²⁰Oba wan nich, soo go Fia von Abimelech ut un vebrenn de Birja von Sichem un daut Hus Millo; un daut go een Fia ut vonne Birja Sichem un vom Hus Millo un vebrenn Abimelech!

²¹Un Jotam rand un veschwunk un jinkj no Beer; un hee bleef doa selfst wäajen sienen Brooda Abimelech.

²²Un Abimelech harscht äwa Israel dree Joa.

²³Un Gott schekjt eenen beesen Jeist tweschen Abimelech un de Birja von Sichem; un de Birja von Sichem haundelde ontru jäajen Abimelech,

²⁴doamet de Jewaultdot aun de 70 Säns Jerub-Baal äwa an kjemt, un äa Bloot opp äarem Brooda Abimelech jelajcht woat, dee an omjebrocht haft, un oppe Birja von Sichem, dee siene Henj jestoakjt hauden, siene Breeda omtobrinjen.

²⁵Un de Birja von Sichem läden eenen Hinjahault jäajen am oppe Boaj Spetzen, un see plindaden jiedrem, dee oppem Wajch bie an vebie jinkj. Un daut wort däm Abimelech berecht.

²⁶Un Gaal, Ebed sien Sän, kaum met siene Breeda, un see jinjen derch Sichem; un de Birja von Sichem vetruden am.

²⁷Un see jinjen rut oppem Flekj un lausen äare Wienboaj un prasste dee ut; un see hilden een Dankfast un jinjen en äarem Gott sienem Hus un auten un drunken un fluchte äwa däm Abimelech.

²⁸Un Gaal, Ebed sien Sän, säd: Wäa es Abimelech un wäa Sichem, daut wie am deenen sellen? Es hee nich de Sän Jerub-Baal, un Sebul sien Stauthoola? Deent de Mana Hemor, däm Voda von Sichem! Dan wuarom sell wie am deenen?

²⁹Wan ekj blooss dit Volkj unja miene Haunt haud, soo wull ekj Abimelech wajchschaufen! Un hee säd von Abimelech: Vemia dien Häa un go ut!

³⁰Un Sebul, de Bowaschta de Staut, hieed Gaal siene Wieed, vom Sän Ebed, un sien Oaja flaumd opp;

³¹un hee schekjt Booten aun Abimelech met Lest un säd: Kjikj, Gaal, Ebed sien Sän, un siene Breeda sent no Sichem jekomen, un kjikj, dee hetze de Staut jäajen die opp.

³²Un nu, moak die de Nacht opp, du un daut Volkj, daut bie die es, un laj die em Hinjahault oppem Flekj.

³³Un daut saul Zemorjes passieren, wan de Sonn oppjeit, soo moak die tiedich opp un äwafaul de Staut; un kjikj, wan hee daut Volkj, daut bie am es, jäajen die utjeit, soo doo am, aus diene Haunt daut fa goot finjen woat.

³⁴Un Abimelech un aulet Volkj, daut met am wia, muak sikj de Nacht opp, un see läden sikj en 4 Gruppen jäajen Sichem em Hinjahault.

³⁵Un Gaal, Ebed sien Sän, jinkj rut un kaum aum Engank vom Stautdooa. Doa muak sikj Abimelech un daut Volkj, daut bie am wia, ut däm Hinjahault opp.

³⁶Un Gaal sach daut Volkj un säd to Sebul: Kjikj, Volkj kjemt vonne Boajchspetzen rauf. Un Sebul säd to am: Däm Schauten vonne Boaj sitst du aus Mana aun.

³⁷Un Gaal räd wada un säd: Kjikj, Volkj kjemt vom Huaglaunt rauf, un een Hupe kjemt oppem Wajch de Elon-Meonenim [Zauba-Ieekj] häa.

³⁸Un Sebul säd to am: Wua es nu dien Mul, doa du sädst: Wäa es Abimelech, daut wie am deenen sellen? Es daut nich daut Volkj, daut du veacht hast? Go doch nu ut un stried jäajen am!

³⁹Un Gaal jinkj ver de Birja von Sichem ut un street jäajen Abimelech.

⁴⁰Un Abimelech juach am no, un hee rand fa am; un daut follen väl dootjeschloagne bat aun däm Engank de Stautdooa.

⁴¹Un Abimelech bleew en Aruma; un Sebul vejuag Gaal un siene Breeda, soo daut see nich mea en Sichem bleewen.

⁴²Un daut passieed aum aundren Dach, doa jinkj daut Volkj rut oppem Flekj; un maun berecht daut däm Abimelech.

⁴³Un hee naum daut Volkj un deeld daut en dree Gruppen un läd sikj oppem Flekj em Hinjahault. Un hee sach, un kjikj, daut Volkj kaum rut ut de Staut; un hee hoof sikj jäajen an un schluach an.

⁴⁴Un Abimelech un de Grupp, dee met am wia, jinjen väa un stalden sikj aun däm Engank vom Stautdooa; un de twee aundre Gruppen äwafollen aule, dee oppem Flekj wieren, un brochten dee om.

⁴⁵Un Abimelech kjamft jäajen de Staut janen gaunzen Dach; un hee naum de Staut en, un daut Volkj, daut doa wia, brocht hee om; un hee reet de Staut dol un bestreid dee met Solt.

⁴⁶Un aule Bewona vom Torm en Sichem hieeden daut, un see jinjen enne Fastinj vom äarem Gott Berit sienem Hus.

⁴⁷Un daut wort däm Abimelech berecht, daut aule Bewona vom Torm en Sichem sikj vesaumelt hauden.

⁴⁸Doa jinkj Abimelech oppem Boajch Zilmon, hee un aulet Volkj, daut bie am wia; un Abimelech naum een Biel en siene Haunt un hakt eenen Boomaust auf un naum am opp siene Schulla, un hee säd toom Volkj, daut met am wia: Waut jie jeseenen ha, daut ekj jedonen ha, daut dot schwind, aus ekj.

⁴⁹Doa hak daut gaunze Volkj een jiedra een Aust auf, un see jinjen Abimelech hinjaraun un läden dee aune Fastinj un stekjten an met Fia aun. Un soo storwen aule Lied von Torm en Sichem, bie 1 000 Mana un Frues.

⁵⁰Un Abimelech jinkj no Tebez, un hee beloagad Tebez un naum dee en.

⁵¹Oba daut wia een stoakja Torm medden enne Staut, un doahan randen de Mana un Frues, aule Birja de Staut; un see schlooten hinja sikj too un jinjen oppem Tormdack.

⁵²Un Abimelech kaum aun däm Torm un street jäajen an; un jinkj noda nom Engank vom Torm, om am met Fia too vebrennen.

⁵³Doa schmeet eene Fru dän bowaschten Steen von eene Haundmäl opp Abimelech sienem Kopp un veschmatad am däm Schädel.

⁵⁴Un hee roopt schwind sienem Deena, dee sien Jereetschoft druach, un säd to am: Trakj dien Schwieet un brinj mie om, daut maun nich von mie sajcht: Eene Fru haft am omjebrocht! Un sien Deena derchboad am, un hee storf.

⁵⁵Un aus de Mana von Israel sagen, daut Abimelech doot wia, doa jinjen see een jiedra aun sienem Uat.

⁵⁶Un soo brocht Gott daut Iebel von Abimelech, daut hee aun sienem Voda veeewt haud, endäm hee siene 70 Breeda ombrocht, opp am trigj.

⁵⁷Un daut gaunze Iebel de Mana von Sichem brocht Gott opp äare Kjap trigj, un äwa an kaum de Fluch Jotam, Jerub-Baal sienem Sän.