Read De Bibel JHF 3. Johanes 1 Bible Online

3. Johanes 1 - De Bibel JHF bible

3. Johanes 1

¹De Eltesta däm jeleewden Gajus, däm ekj leew en Woarheit.

²Jeleewda, ekj wensch, dautet die en aulem gootjeit un du jesunt best, soo aus et diene Seel gootjeit.

³Dan ekj freid mie sea, aus Breeda kjeemen un Zeichnis jeewen von dienem Fausthoolen aun de Woarheit, aus du enne Woarheit waundelst.

⁴Ekj ha kjeene jratren Freid aus dise, daut ekj hia, daut miene Kjinja en de Woarheit waundlen.

⁵Jeleewda, tru deist du, wautemma du aun de Breeda, un zwoa aun Framde, jedonen hast,

⁶(dee von diene Leew Zeichnis jejäft ha vere Jemeent) un du woascht goot doonen, wan du an opp eene Gott jeeade Oat bejleitst.

⁷Dan fa dän Nomen sent see utjegonen un nämen nuscht von dän ut de Heiden.

⁸Aulsoo, wie sent schuldich, soone opptonämen, doamet wie Metoabeida de Woarheit woaren.

⁹Ekj schreef eenjet aun de Jemeent, oba Diotrefes, dee jieren unja an de Ieeschta sennen well, nemt ons nich aun.

¹⁰Doawäajen, wan ekj kom, well ekj siene Woakjen jedenkjen, dee hee deit, endäm hee met beese Wieed jäajen ons schwautzt (aunkloacht); un sikj hiamet nich bejnieecht, nemt hee selfst de Breeda nich aun un hindat uk dän, dee daut wellen, un stat dee ut de Jemeent.

¹¹Jeleewda, moak nich daut Beese met, sonda daut Goode. Wäa Goots deit, es ut Gott; wäa Beeset deit, haft Gott nich jeseenen.

¹²Däm Demetrius woat Zeichnis jejäft von aule un von de Woarheit selfst; un uk wie jäwen Zeichnis, un du weetst, daut ons Zeichnis woa es.

¹³Ekj haud die välet to schriewen, oba ekj well die nich met Tint un Fada schriewen,

¹⁴oba ekj hop, die boolt toseenen, un wie wellen mintlich metenaunda räden.

¹⁵Fräd es met die! Daut jreessen die de Frind. Jrees de Frind met Nomen.