Read De Bibel JHF Judas 1 Bible Online

Judas 1 - De Bibel JHF bible

Judas 1

¹Judas, Kjnajcht Jesus Christus un Brooda von Jakobus, aun dän en Gott, däm Voda, jeleewde un en Jesus Christus bewoaden Beroopne:

²Erboarmen un Fräd un Leew es junt vemieet!

³Jeleewde, endäm ekj aulen Fliet aunlaj, junt äwa ons jemeensaumet Heil to schriewen, wia ekj jedwungen, junt to schriewen un to vemonen, fa dän eenmol dän Heiljen äwaleewaden Gloowen to kjamfen.

⁴Dan jewesse Menschen ha sikj nenn jeschlikjt, dee aul lenjst, verhäa to disem Jerecht jetieekjent (oppjeschräwen) wieren, Gottloose, dee de Jnod von onsem Gott en utschweifung vedreien un onsen eensjen Jebeeda (Harscha) un Harn Jesus Christus velieejen.

⁵Oba ekj well junt, dee jie eenmol aules wisten, doaraun denkjen halpen, daut de Har, nodäm hee daut Volkj ut däm Launt Ägipten jerat haud, daut tweede Mol dee vetiljd, dee nich jejleeft hauden;

⁶un Enjel, dee äaren ieeschten Tostaunt (Ferschtentum) nich bewoaden, sonda äare ieejne Behusung (Wonunk) veloten ha, haft hee toom Jerecht aum groote Dach met eewje Faslen (Kjäden) unja de Diestanis vewoat.

⁷Aus Sodom un Gomorra un de omlidjende Städen, dee krakjt soo aus dise, Onzucht (Huararie) dreewen un aundrem Fleesch nojinjen, aus een Biespel doalidjen, endäm see em eewjen Fiastrof lieden.

⁸Trotz däm beflekje uk dise Dreema daut Fleesch un veachten de Harschoft un lastren Harlichkjeite.

⁹Oba Michael, de Erzenjel, aus hee, met däm Diewel street, Wuatwakjsel haud om dän Lief von Moses, woagd nich een lastalichet Uadeel äwa am väatobrinjen, sonda säd: De Har schellt (stroft) die.

¹⁰Oba dise lastren, waut see nich kjanen; waut see oba von Natua ut de onveninftje Tieren vestonen, doarenn vedoawen see sikj.

¹¹Wee an! Dan see sent däm Wajch Kains jegonen un ha sikj fa Loon däm Errtum Bieleam hanjejäft, un en däm Wadaspruch Kora sent see omjekomen.

¹²Dise sent Plaken (Schaundplaken) bie june Leewesmoltieden, endäm see onen Forcht Fastäten met junt un sikj selfst weiden; Wolkjen onen Wota, vom Wint jedräwen woaren; loten Hoafstbeem, fruchtloose, twee Mol aufjestorwe, onen Wartlen;

¹³wille Mäareswalle, dee äare ieejne Schaund utschume; errende Stierns, dän de dunkle Diestanis en Eewichkjeit oppbewoat es.

¹⁴Oba daut haft uk Henoch, de säwenda von Adam, von dise profezeit un jesajcht: «Kjikj, de Har es jekomen met siene 1000-de Heilje,

¹⁵Jerecht uttofieren jäajen aule un gaunz to äwafieren aule äare Gottloose (jiedre Seel), von aule äare Woakjen de Gottloosichkjeit, dee see gottloos jedonen ha, un von aul dee hoade Wieed, dee gottloose Sinda jäajen am jerät ha».

¹⁶Daut sent Murrkjap (Murrende), met äarem Loss ontofräd, dee no äare Lost waundlen; un äa Mul räd stolte Wieed, un väadeels haulwen bewundre see Persoonen.

¹⁷Oba jie, Jeleewde, jedenkjt aun de Wieed, dee von de Apostel von onsem Harn Jesus Christus verhäa jerät worden sent,

¹⁸daut see junt säden, daut aum Enj de Tiet Spata sennen woaren, dee no äare ieejne Lost de Gottloosichkjeit waundlen woaren.

¹⁹Dise sent dee, dee sikj aufsondren, fleeschliche (seelische) Menschen, dee dän Jeist nich ha.

²⁰Oba jie, Jeleewde, erbut junt selfst opp junen aulaheilichsten Gloowen, bäd em Heiljen Jeist,

²¹bewoat (erhoolt) junt selfst en de Leew Gottes, endäm jie luaren opp de Erboarmunk von onsem Harn Jesus Christus toom eewjen Läwen.

²²Un de eene, dee doa strieden (twiewlen), wies trajcht,

²³oba de aundre rad met Angst, riet an ut däm Fia, endäm jie uk daut von däm Fleesch beflekjte Kjleet haussen.

²⁴Oba däm, dee junt onen Faul (stolpren) to bewoaren un ver siene Harlichkjeit onen Dodel hanstalen kaun met Jubel (Freid),

²⁵däm eensjen (auleenjen) Gott, onsem Rada (Heilant), derch Jesus Christus, onsem Harn, es Iea (Harlichkjeit), Majestät, Macht un Jewault, ver aule Tiet un nu un en aule Eewichkjeit! Amen.