Read De Bibel JHF Openboarunk 13 Bible Online

Openboarunk 13 - De Bibel JHF bible

Openboarunk 13

¹Un ekj sach ut daut Mäa een Tia nohecht komen, daut tieen Hieena un säwen Kjap haud, un opp siene Hieena tieen Kroonen, un opp siene Kjap Nomes de Lastrunk.

²Un daut Tia, daut ekj sach, wia soo aus een Leopard, un siene Feet aus dee von eenen Boa, un siene Frät aus eene Frät vom Leiw. Un de Droak (Drachen) jeef am siene Krauft un sienen Troon un groote Macht.

³Un ekj sach eenen von siene Kjap aus toom Doot jeschlacht. Un siene Doodeswund wort jeheelt, un de gaunze Ieed vewundad sikj äwa daut Tia.

⁴Un see bäden dän Droak (Drachen) aun, wiels hee daut Tia Macht jeef, un see bäden daut Tia aun un säden: Wäa es dit Tia änlich? Un wäa kaun met am kjamfen?

⁵Un daut wort am een Mul jejäft, daut groote Dinj un Lastrungen räd; un daut wort am Macht jejäft, 42 Moonat to wirkjen (doonen, oabeiden). {Dan.8,24}

⁶Un daut muak sien Mul op to Lastrungen jäajen Gott, sienen Nomen to lastren [un] sien Zelt, [un] dee, dee em Himmel wonen (dee äa Zelt em Himmel ha / äare Wonstäd ).

⁷Un daut wort am jejäft, met de Heilje Kjrich to fieren un an to jewennen (äwawinden); un daut wort am Macht jejäft äwa jiedren Staum un Volkj un Sproak un Nazion.

⁸Un aule, dee oppe Ieed wonen, woaren daut aunbäden, een jiedra, däm sien Nomen nich jeschräwen es en daut Läwensbuak, von daut jeschlachte Laum, von Gruntloag de Welt aun.

⁹Wan wäa een Ua haft, hee hia!

¹⁰Wan wäa en Jefangenschoft [fieet], soo jeit hee en Jefangenschoft; wan wäa met daut Schwieet doot moaken woat, soo mott hee met daut Schwieet doot jemoakt woaren. Hia es de Jedult (daut Uthoolen) un de Gloowen de Heilje.

¹¹Un ekj sach een aundret Tia ut de Ieed nohecht komen; un daut haud twee Hieena soo aus een Laum, un daut räd aus een Droak (Drachen).

¹²Un de gaunze Macht von daut ieeschte Tia eewd daut ver am ut, un daut muak, daut de Ieed un dee opp ar wonen daut ieeschte Tia aunbäden, däm siene Doodeswund jeheelt wort.

¹³Un daut deit groote Tieekjen, daut et selfst Fia vom Himmel opp de Ieed raufkomen leet ver de Menschen;

¹⁴un daut veleit, dee opp de Ieed wonen wäajen de Tieekjens, dee am jejäft worden ver daut Tia to doonen, endäm daut dee, dee opp de Ieed wonen, oppfoddat, een Bilt däm Tia to moaken, daut de Wund vom Schwieet haft un läft.

¹⁵Un daut wort am jejäft, en daut Bilt von daut Tia Jeist to jäwen, om daut et Bilt von daut Tia uk räd un wirkjt, daut aula doot jemoakt worden, dee daut Bilt von daut Tia nich aunbäden.

¹⁶Un daut brinjt aule doahan, de Kjliene un de Groote, un de Rikje un de Oame, un de Friee un de Kjnajchts, daut see een Moltieekjen aunnämen aun äare rajchte Haunt ooda aun äarem Stiern;

¹⁷un daut kjeena kjeepen ooda vekjeepen kaun, aus blooss dee, dee daut Moltieekjen haft, dän Nomen von daut Tia ooda de Zol von sien Nomen.

¹⁸Hia es de Weisheit. Wäa Vestentnis haft, beräakjen de Zol (daut Numma) von daut Tia, dan daut es eene Menschen Zol; un siene Zol es 666.