Read De Bibel JHF Openboarunk 15 Bible Online

Openboarunk 15 - De Bibel JHF bible

Openboarunk 15

¹Un ekj sach een aundret Tieekjen em Himmel, groot un wundaboa: säwen Enjel, dee säwen Ploagen hauden, de latste; dan en (met) an es de Oaja Gottes vollbrocht.

²Un ekj sach aus een glausnet Mäa, met Fia jemischt, un de Jewenna äwa daut Tia un äwa sien Bilt un äwa de Zol von sien Nomen aun daut glausne Mäa stonen, un see hauden Hoapen Gottes.

³Un see sinjen daut Leet von Moses, däm Kjnajcht Gottes, un daut Leet von daut Laum un sajen: Groot un wundaboa sent diene Woakjen, Har, Gott, Aulmajchtja! Jerajcht un woarhauft sent diene Wäaj, oo (du) Kjennich äwa de [Heilje] Velkja.

⁴Wäa sull [die] nich ferchten, Har, un dienen Nomen veharlichen? Dan du auleen best heilich; dan aule Velkja woaren komen un ver die aunbäden, dan diene jerajchte Doten (Uadeelen) sent openboa jeworden.

⁵Un no dit sach ekj; un de Tempel, daut Zelt, daut Zeichnis em Himmel wort opjemoakt.

⁶Un de säwen Enjel, dee de säwen Ploagen hauden, kjeemen ut däm Tempel rut, aunjetrocken met reine, blanke Leiwent, un om de Brost jebungen met eenen goldnen Gort.

⁷Un eent de vea läwendje Wäsent jeef de säwen Enjel säwen goldne Kommen, voll met Gott sien Oaja, dee doa läft von Eewichkjeit to Eewichkjeit.

⁸Un de Tempel wort met Ruak jefelt von Gott siene Harlichkjeit un von siene Macht; un kjeena kunn em Tempel nengonen, bot de säwen Ploagen von de säwen Enjel vollbrocht wieren.