Read De Bibel JHF Openboarunk 18 Bible Online

Openboarunk 18 - De Bibel JHF bible

Openboarunk 18

¹No dit sach ekj eenen aundren Enjel ut däm Himmel rauf komen, dee groote Macht haud; un de Ieed wort dach von siene Harlichkjeit.

²Un hee roopt met ne stoakje Stemm un säd: Jefollen, jefollen es Babel, de Groote, un es eene Behusunk von Dämonen jeworden un een Jefenkjnis fa aule orreine Jeista un Jefenkjnis fa aule orreine un vehauste Väajel.

³Dan von dän Wien de Wutt äara Huararie ha aule Velkja jedrunken, un de Kjennichs de Ieed ha Huararie met äa jedräwen, un de Haundelslied de Ieed sent derch de Macht von äa Woolstaunt rikj jeworden. {Jer.51,7; Nah.3,1-4}

⁴Un ekj hieed eene aundre Stemm ut däm Himmel sajen: Got ut ar rut, mien Volkj, doamet jie nich aun äare Sinden deelhauftich woaren, un om daut jie nich emfangen von äare Ploagen;

⁵dan äare Sinden sent bot däm Himmel jekomen, un Gott haft aun äare Ojjerajchtichkjeit jedocht.

⁶Vejelt ar, aus uk see vejelt haft, un vedobbelt [ar] dobbelt no äare Woakjen; en daut Kuffel (Drunk), dän see enjeschonken (jemischt) haft, schenkj ar dobbelt en.

⁷Wooväl see sikj veharlicht un schomploosen Luksus jedräwen haft, soo väl Kwol un Trua jeft ar. Dan see sajcht sikj en äa Hoat: Ekj sett aus Kjennijin, un Wätfru sie ekj nich, un Truarichkjeit woa ekj nich seenen.

⁸Doarom woaren äare Ploagen aun eenem Dach komen: Doot un Truarichkjeit un Hungaschnoot, un met Fia woat see vebrent woaren; dan stoakj es de Har, Gott, dee ar jerecht haft.

⁹Un daut woaren äwa äa hielen un weekloagen de Kjennichs de Ieed, dee met ar Huararie jedräwen un en schomploosen Luksus jeläft ha, wan see dän Ruak von äa brennen seenen;

¹⁰un see woaren von wiet auf stonen ut Angst wäajen äare Kwol haben un sajen: Wee, Wee! De groote Staut, Babel, de stoakje Staut! Dan en eene Stund es dien Jerecht jekomen.

¹¹Un de Haundelslied de Ieed hielen un truaren äwa ar, wiels kjeena mea äare Woa kjaft:

¹²Woa von Golt un Selwa un wieetvolle Steena un Parlen un fiene Leiwent un Purpur un Sied un Schoarlach, un aulet von Tujaholt (Ziepressenholt) un jiedret Jefäss von Aulfenbeen un jiedret Jefäss von wieetvollet Holt un Koppa un Iesa un Marmel,

¹³un Kerneel un Kjriedarie (Hoa Saulw) un Rieekjastoff (Weiruak, seeta Ruak) un Saulw un Weiruak un Wien un Eelj un fienet Mäl un Weit un Vee un Schop, un Pieed un Woages un Sklowen (Kjarpa) un Menschenseelen.

¹⁴Un de Oft (de Frucht) de Lost von diene Seel es von die wajch jegonen, un aul de Glauns un Prachtvollet es die veloaren (venicht) jegonen, un du woascht daut nich mea finjen.

¹⁵De Haundelslied von dise Dinj, dee aun ar rikj jeworden sent, woaren ut Angst fa äare Kwol wiet auf stonen, hielen un truaren,

¹⁶un woaren sajen: Wee, wee! De groote Staut, de jekjleet wia met fiene Leiwent un Purpur (bleiwroodet Zeich) un Schoarlach (blootroodet Zeich) un met Golt betrocken un wieetvolle Steena un Parlen! Dan en eene Stund es daut groote Rikjtum vewust worden.

¹⁷Un jieda Stiamaun un een jiedra, dee no irjent eenem Uat säajeld, un Seemana un soo väle opp daut Mäa beschafticht sent (äa Läwen moaken), stunden von wiet auf

¹⁸un roopten, aus see daut Ruak von äa brennen sagen, un säden: Woone Staut es änlich dise groote Staut?

¹⁹Un see schmeeten Stoff opp äare Kjap un roopten hielent un truaden un säden: Wee, wee! De groote Staut, en dee aula, dee Schäp opp daut Mäa hauden, rikj worden von äare Kostboakjeit! Dan en eene Stund es see vewust worden.

²⁰Frei die äwa ar, du Himmel, un jie Heilje un jie Apostel un jie Profeeten! Dan Gott haft jun Uadeel (Jerecht) aun ar vollbrocht. {Jes.34,8}

²¹Un een stoakja Enjel hoof eenen Steen opp aus eenen groote Molsteen un schmeet am en daut Mäa un säd: Soo woat Babel, de groote Staut, met Jewault rauf jeschmäten un niemols mea jefungen woaren.

²²Un de Stemm de Hoapensenja un Musikjspäla un Fleetenspäla un Trompeetenspäla woat niemols mea en die jehieet woaren, un niemols mea woat een Kjensla, irjent eene Konst en die finjen, un daut Jeruzh von een Molsteen woat niemols mea en die jehieet woaren,

²³un daut Licht von eene Laump woat niemols mea en die schienen, un de Stemm vom Briegaum un de Brut woat niemols mea en die jehieet woaren; dan diene Haundelslied wieren de Groote opp de Ieed; dan derch diene Zaubarie sent aule Velkja vefieet worden.

²⁴Un en ar wort daut Bloot von Profeeten un Heilje jefungen un von aul dän, dee oppe Ieed omjebrocht worden sent.