Read De Bibel JHF Openboarunk 2 Bible Online

Openboarunk 2 - De Bibel JHF bible

Openboarunk 2

¹Däm Enjel de Jemeent en Efesus schriew: Dit sajcht dee, dee säwen Stierns en siene Rajchte helt, dee doa waundelt enne Medd de säwen goldne Laumpenhoola (Laumpen):

²Ekj kjan diene Woakjen un diene Oabeit (Mieej), un diene Jedult, un daut du Beese (Menschen) nich vedroagen kaust; un du hast dee jeprooft, dee sikj Apostel nanen, un sent daut nich, un hast an aus Läajna utjefungen;

³un du hast Jedult un hast jedroacht (utjehoolen) wäajen mienen Nomen, un best nich Meed jeworden.

⁴Oba ekj ha dit jäajen die, daut du diene ieeschte Leew veloten hast.

⁵Aulsoo jedenkj, von wua du jefollen best, un denkj om (doo Busse) un doo dee ieeschte Woakjen; oba wan nich, soo kom ekj no die un woa dien Laumpenhoola von siene Städ wajch schuwen, wan du nich om denkjst (Busse deist).

⁶Oba dit hast du, daut du de Woakjen de Nikolaiten haust, dee uk ekj hauss.

⁷Wäa een Ua haft, hia (horch), waut de Jeist de Jemeenten sajcht! Däm, dee doa uthelt (äwasteit, jewent), däm woa ekj to äten jäwen von däm Läwensboom, dee en Gott sien Paradies es.

⁸Un däm Enjel de Jemeent en Smierna schriew: Dit sajcht de Ieeschta un de Latsta, dee doot wia un wada läwendich jeworden es:

⁹Ekj kjan diene Triebsaul (Bedrenkjnis) un diene Oamoot [oba du best rikj] un de Lastrunk von dän, dee sajen, see sent Juden, un sent daut nich, sonda eene Sienagog vom Soton.

¹⁰Enjst die nich ver daut, waut du lieden woascht. Kjikj, de Diewel woat atelje von junt em Jefenkjnis schmieten, om daut jie jeprooft woaren, un jie woaren Bedrenkjnis haben tieen Doag. Sie tru batem Doot, un ekj woa die de Kroon vom Läwen (Läwenskroon) jäwen.

¹¹Wäa een Ua haft, hia (horch) waut de Jeist de Jemeenten sajcht! Wäa uthelt (äwasteit, jewent), woat nich beschädicht woaren von däm tweeden Doot.

¹²Un däm Enjel de Jemeent en Pergamon schriew: Dit sajcht, dee daut schoape, tweeschniedje Schwieet haft:

¹³Ekj weet, wua du wonst, wua de Troon vom Soton es; un du helst faust aun mienen Nomen un hast dän Gloowen aun mie nich veloagen, uk en dee Doag, aun dee Antipas mien trua Zeij wia, dee bie junt, wua de Soton wont, omjebrocht wort.

¹⁴Oba ekj ha een weinich jäajen die, daut du doa soone hast, dee de Lia von Bieleam fausthoolen, dee däm Balak lieed, een Oajanis ver dee Säns Israel to lajen, Jetzenopfa to äten un Huararie to driewen.

¹⁵Soo hast uk du soone, dee uk de Lia de Nikolaiten fausthoolen.

¹⁶Aulsoo denkj om; oba wan nich, soo kom ekj boolt no die un woa met an Kjrich fieren met daut Schwieet ut mien Mul.

¹⁷Wäa een Ua haft, hia, waut de Jeist de Jemeenten sajcht! Däm, dee doa äwasteit (uthelt), däm woa ekj von däm vestoaknem Mauna jäwen; un ekj woa am eenen witten Steen jäwen, un opp däm Steen een nia Nomen jeschräwen, dän kjeena kjant, aus wäa am kjricht.

¹⁸Un däm Enjel de Jemeent en Tiatira schriew: Dit sajcht de Sän Gottes, dee siene Uagen haft aus eene Fiaflaum un siene Feet aus blenkjajet Koppa:

¹⁹Ekj kjan diene Woakjen un diene Leew un dien Gloowen un dien Deenst un diene Jedult, un weet, daut diene latste Woakjen mea sent aus de ieeschte.

²⁰Oba ekj ha jäajen die, daut du de Fru Isebel duldst (lieren latst), dee sikj eene Profeetin nant, un see lieet un vefieet miene Kjnajchts, Huararie to driewen un Jetzenopfa to äten.

²¹Un ekj jeef ar Tiet, daut see omdenkjt, un see well nich omdenkjen von äare Huararie.

²²Kjikj, ekj schmiet ar en een Bad un dee, dee Ehebruch met äa dreewen, en groote Bedrenkjnis, wan see nich omdenkjen von äare (Isebels) Woakjen.

²³Un (Isebel) äare Kjinja woa ekj metem Doot dootmoaken, un aule Jemeenten woaren erkjanen, daut ekj daut sie, dee, Nieren un Hoaten utforscht; un ekj woa junt eenem jiedrem no june Woakjen jäwen.

²⁴Oba ekj saj junt, de äwaje, dee en Tiatira sent, soo väle dise Lia nich haben, dee dän Senn (daut Deepe, dän Grunt) von Soton, aus see sajen, nich erkjant ha; ekj laj kjeene aundre Laust opp junt;

²⁵doch waut jie ha hoolt faust, bot ekj kom.

²⁶Un wäa uthelt (jewent, äwasteit) un miene Woakjen bewoat, bot aum Enj, däm woa ekj Macht äwa de Velkja (Nazionen) jäwen;

²⁷un hee woat an weiden met ne iesane Wäd (Stock, Iesastang), aus Leemtap veschmatat woaren,

²⁸aus uk ekj von mienem Voda jekjräajen ha; un ekj woa am dän Morjenstiern jäwen.

²⁹Wäa een Ua haft, hia (horch), waut de Jeist de Jemeenten sajcht!